Read Rongmei Naga SOLOMON LU 5 Bible Online

SOLOMON LU 5 - Rongmei Naga bible

SOLOMON LU 5

¹Ai atuang pikwan khou gut the, nzianmei amwnpuile. Atuang maruai lev agaw khuam bam e ai atuang nkhuaicdui tu bam e; atuang drakhadui khatni nkhuaihdui zangv bam e. Nzianmeile, tu tho, zangv tho,

²Ai zip sini alung thu zipkey mak ge, amang khou akhaamvpu rui kaikhamv guang nchow the. Amwnpuile, ai gut me, nzianmei atuang akhouhnale. zikdui rui apy timc ngam the, achin rui asam nimh ngam the.

³Ai apwan luak ganc ngam the; ai apwan karuh dat khona cho? Aphay khiu tang the; aphay swtanac dat khona cho?

⁴Akhaamvpu kabaanc kaikhamv guang how tangc the, kamei guang ana pwkhou azaeng gay the.

⁵Kakhang kaikhamv laanclou khang ding thau the. Abaanc khou gumhdui luplou the, khatni abaanczung ni luplou the kumna kaikhamvtaan kouc the.

⁶Ai rui kakhang kaikhamv laanc pat pwki, kamei tat dat kan bam khwan the. Ai kakhwan chu nii khwan e. Ai kata phu the, phutow mak khe; ai kata kauc the, tiki dawlou mak khe.

⁷Kaidai gaekmei nunc rui ata ariw the; kaniw rui ata bai the kumna ai zamh the; kaidai raengc rigaanvmei nunc rui aphey siatkaek the.

⁸Jerusalemmei aluc nuncle, nangniw akhaamvpu ta ariw e thei ai kata ningna lak the twna dinclou nii e twna latdyng swlou o.

⁹Ntumei pang khou rui kalwn gay liangmeipuile, nang khaamvpu kiu nggaanvmei guay pang khou rui baic lath latmei buna cho? Nang khaamvpu kiu meic baihmei suangc akumhmei gay taph tapmei naina cho, aniu rui mi kumhmei latdyng kiu swlou bam khang?

¹⁰Akhaamvpu kiu kalwn gay e, tanc e; kamei hei meic 10,000 khou akhat na de.

¹¹Kazaw hei tanzinc kumc e, ndiau e; kasam hei nkhit re, agaekc kumc miw e.

¹²Kamik tei duithuak daeng khou bammei akhouhna kumc e, guaihnoudui lou lana duithuak daeng khou tou bammei akhouhna kumc e.

¹³Kabiangc tei ramhbwan khatni maruai thau padik bammei pikwan kumc e. Kachy tei gumhdui rui timhmei lilipwang kumc e.

¹⁴Kabaanhpwam tei nthuih e, kunghmei tauc baanrwn run e. Kapumc tei saphir tauc rui karuhloumei guaipuang nei ndiau gaymei kumc e.

¹⁵Katan tei kachaekc haan khou kariloumei alabastar tauc tiangc kumc e. Kamei hei Lebanon chyngbut kumc e. Kauhmei sidar thing thau padikmei chyng tei kumc e.

¹⁶Kachy tei ndeih e, kamei kapwmna gay nthuih e. Kum tina ai akhaamvpu ta nzian tuang e, Jerusalemmei luc nuncle.