Read Rongmei Naga SOLOMON LU 8 Bible Online

SOLOMON LU 8 - Rongmei Naga bible

SOLOMON LU 8

¹Nang hei achaic khwan e thei mu, apui rui puanc nouc thaumei khwan e thei mu ai rui nang ta chaengdai khou ariw pwkhou, ai rui nang ta kaput tisini meic nunc rui ramh lat sa bam lak ni tuang e.

²Ai rui nang ta apui kai thangc phungc guang nii e, khou tei nang rui akhou nzian nchamlou khang. Ai nang khang maruai loumei drakhadui tii ni, puc-heithai tuang drakhadui tii ni.

³Nang baanc baandau khou apyban swna, baanzat rui pamclou e.

⁴Jerusalemmei luc nuncle, anei nzianmei ta sw kaguakc lak ge twna latdyng swlou o.

⁵Mi tazikramv thangc rui kakhaamvpu baanc ngguakna guangmeipui hei thow cho? Appal bang bangc khou tei ai rui nang ta nchyang thau the, nang ta puancloumei bamv khou tei.

⁶Ata na hamhna meic baihmei ta nzian dat ri tho, ata hamhna meic baihmei ta nang baancpwam khou pamclou dat ri tho, nzianmei hei theihmei kumc kangamv nai e, kahawmei twmei hei theihmei kumc tanc e, hei tei kabwang chuangc thauna mai kumc chuangc the.

⁷Mitei dui rui swmit dat ngam mak khe, duidai rui ni phungc ganc dat ngam mak ge. Nzianmei ta syan rui liu e thei karaengmei laatow puni.

⁸Aniw tanpui gaanv khat nai e, kangaengv nthyam di he. Nggaanv nunc rui tarai guang pwkhou, aniu kakhang tabui swlou ni?

⁹Kamei hei raengh bam khwan e thei aniu rui kakhang daandi tuang rihphaankai kasiamhlou ni, kamei raenghmun bam khwan e thei aniu rui sidar thingpaek rui mbanghlou ni.

¹⁰Ai hei raengh the, angaengv hei rihphaankai the. Ai hei kamei lev pianna bam e twmei akhaamvpu rui thay e.

¹¹Baal Hamon khou Solomon tuang drakhalau nai e. Mi lau tei nngepui mei nunc nai e. Kaniw kathuic rui daandi paek ching khat ching khat tii e.

¹²Solomon rui katuang daandi paek 1000 tei laalou the, lau nngemei nunc rui kaniw dam phaynei laa the; arana tuang drakhalau nai e.

¹³Amwnpuile, pikwan khou tei rui nang khwan tichulou o; nang rui sa patmei khwan chu niina apammei nunc nkhwan bam e. e;

¹⁴Akhaamvpule, adaeng khou guang o, maruai bang thaumei chyngbut guay khou rui asanh, sangai pak guang kumc guang o.