Read Rongmei Naga ISAIA 1 Bible Online

ISAIA 1 - Rongmei Naga bible

ISAIA 1

¹Mi hei Uzzia, Jotham, Ahaz khatni Hezekia rui Judamei guangc swna bammei douc Juda kandic khatni Jerusalem lam khou Amoz nac mpouh Isaia khou ndauhloumei lat re.

²He tingpukle, nking o! Kandih ni chu lo! RINGHPOUC rui kumna sa the: “Ai rui nah mpouh mpeyna makuat pat the, tiki kaniw alat liam the.

³Guaih nunc rui kakaipouc ta thay e, kuanniam ni kakaipouc rui titu bammei kakuak bamv thay e, tiki Isaraelmei thu ramhthay mak khe, amei nunc hei kabah thay mak khe.”

⁴Is, paapc padikmei zaat, khuay puatrith bin bammei nunc, simei taanv taanhmei kikta, nkhuaimei taanv taanhmei nac nunc! Nang RINGHPOUC ta ganclou the; nang nthanmei Isaraelmei Racguangc ta mpatlou kan the, nang kakhou rui namthei karih tat kan the.

⁵Nang tabui swna hei suangc baic ranvmei ta laa niina cho? Tabui swna liam hay hay bam tu cho? Nang py kapwm hei zamh ngam the, nang lungthw kapwm hei kabiu ngam the.

⁶Nang phaypav khou rui nang py kanthingh nganv gay rimei bam maek khe, kazam kazei rana di the, taamcrumh ngam the, khiu ni khiulou mak khe, duam ni duamlou mak khe, puc ni teylou mak khe.

⁷Nang kandic guay lungc taek ngam the, nang tuang kaidai guay mai raw ngam the; nang hu khou rui zaatc baihmei rui nang laupuk guay tei swpuat paruat key the, gin nunc rui mi hei ntou kykaengvlou kan the.

⁸Jerusalem ta na ganclou the, zauczihmei rui dingbin the, drakhalau nkhwanmei laupah na kumc the, ngeihnathailau baap laupah na kumc the.

⁹Ngamparymei RINGHPOUC rui gaanvsaekc ta na sini nsaekclou mak khwan e thei, Jerusalem hei Sodom kumc kan ni tuang the, mi hei Gomora kumc kan ni tuang the.

¹⁰RINGHPOUC lat hei nking o, Sodommei dihsinpouc nuncle; Ravguangc tuang mei nuncle!

¹¹RINGHPOUC rui sa e, “Nangniw rui heizu ravkhaeng bammei tei ai kahaw puni twna cho? Nangniw tuang lauziu rawna khaengmei tei, ai kahaw puni twna cho? Nangniw tuang lauziu rawna khaengmei tei, khouringh thav rawna khaengmei tei geic langv khe; lauziu zei ni, ziuh zei ni, guaituamchic zei ni ai kahaw mak ge.

¹²Ata kalum khang guang pwkhou mi guay hei akhang phungc guang nina e twna thow rui sa puna cho? Heikumna atuang Ravkai ta katwan kaluihmei taanv hei thow rui taanc o twna sana cho?

¹³Kabah maekmei puatkat kat taan tho! Nangniw tuang agaw rym tei ai karaeng e. Nangniw tuang bw thanh ngai, nangniw tuang Sabbath, nangniw tuang kachap kariak tuang charuangc tei ai karaeng e.

¹⁴Nangniw tuang bw thanh ngai, nangniw tuang ngai guay tei alung rui karaeng e. Mi guay tei rui ata tikabiu the; ai akhaengv liat lak khe.

¹⁵“Nangniw huayney khang nangniw baanc haamvthau pwkhou, ai zauclou mak ge; nangniw rui ravsuai geicna suaic bam sini, ai chulou ni tuang hamh e. Nangniw baanc tei zei rui haengc the.

¹⁶Hei tei khiu nthan o. Nangniw tuang simei taanv guay tei ahu khou rui laa ganc kan o! Simei taanv taanc nthaekc tho;

¹⁷Gaymei taanv taanc chada tho! Nchumhmei ta phu o, rairiu khaengvmei nunc ta nkhavlou o. Nruna nunc khang kaphianhlou o, swmmaypui nunc ta gaeklou o.”

¹⁸RINGHPOUC rui sa e, “Ntaw guang tho, aniu kaphianh kariu dikho. Nangniw paap guay haengc bam sini, gunh kumc ti- mphwanlou ni, nangniw paap guay haengcmumh bam sini, lauziu hiw kumc ti-mphwanlou ni.

¹⁹Nangniw lat piu e thei, mi kandic khou rui patmei gay liangmei thai nangniw tuna lungc puni;

²⁰Nangniw latliam e thei, buy-baengmun khou theic puni.” RINGHPOUC mwang kahak rui mi hei sa e.

²¹Zauc lo, nchanghmei kaidai tei mangcsangmeiluc sw kan the! ravchaptatmei rui lungc padik bam khwanmei tei ntaw thu meicdowmei rui padik the!

²²Daandi kumhmei Jerusalem tei ntaw thu ntanhbav di the, nthanmei drakhadui kumhmei nang hei ntaw thu dui di the.

²³Nang tuang dihsinpouc nunc hei meicliam the, kaihouhmei nunc di the; kaniw kaipat kahaw the, kaniw lanvbiwmei tu nii the. Nruna nunc khang kaphianhlou mak khe, swmmaypui nunc lat chulou mak khe.

²⁴Kumhpui zaeng rui Ngamparymei RINGHPOUC, Isaraelmei tuang ngammei Ravguangc rui kumna kauc pat kan the: “Ata zauczihmei nunc ruc khou alungpuam keylou puni the, ata howmumei nunc khwm ai khangc puni the.

²⁵Ai rui nang ruc khou taanv sinthau puni the, ntanh ta kumc nang ta raw nthan puni the, nthan makmei guay ta laa ganc puni the.

²⁶Ai rui nang khang reynungc latzanpouc nunc kumhmei tiilou dat puni, reynungc tuang guangh tuang baanhza nunc kumhmei tiilou dat puni. Khou kiu Jerusalem ta ravchaptatmei Kaidai, nchanghmei Kaidai twna kaw puni.”

²⁷RINGHPOUC hei nchumhmeipu e, kamei rui Jerusalem ta kanlou puni; hei khou tei bammei lunglaihmei guay ta kanlou puni.

²⁸Tiki meicliammei khatni paapcmei kaguayna ta swkamut kamailou puni, khatni RINGHPOUC ta gancpatmei nunc tei theic puni.

²⁹Nangniw neihlana thingbang ta kalum bammei khang tei rui nangniw lung kabiu puni the, khatni nangniw ravbamv pikwan khang tei rui nangniw zak puni the.

³⁰Nangniw hei kanuy ngguaih keymei phauhbang kumc puni the khatni dui maekmei pikwan kumc puni the.

³¹Tanhmeipu tuang simei taanv guay khatni kapumc tei mai kaugaymei thutbou kumcna kataanv tei kau ngam puni the, meic gaanv khat na rui sini amw kim dat pw lak khe.