Read Rongmei Naga ISAIA 10 Bible Online

ISAIA 10 - Rongmei Naga bible

ISAIA 10

¹Nchumh makmei riak kasiamhna amei nunc ta sintuna bammei nangniw sansi e dav!

²Heikumna lungcsi lungcroucmei nunc khang nangniw zauclou mak khe khatni nchumhna taanclou mak khe. Heikumna nangniw rui swmmaypui nunc khatni nkhu nruna nunc tuang tei asut the.

³Ravguangc rui nangniw ta riap pwkhou nangniw tabui sw nina cho? Kandih duh thangc rui sw kasic karoucmei nangniw khou tiguang pwkhou nangniw tabui sw nina cho? Nkhavlou khang thow khou nangniw paklou nina cho? Tabui khou nangniw tuang lanv rylou nina cho?

⁴Nangniw ta suc-rih bamv khou swluai puni khatni kangmei swna nym zay tat puni. Kum bam sini RINGHPOUC tuang lungpuam luai mak ge; riap khang kabaanc ntyng patna bam puni di he.

⁵RINGHPOUC rui sa e, “Asiria! Ai rui alungpuam meic nunc ta riap khang Asiriamei nunc ta meicbaimei thing ngwn swna piu the.

⁶Rav ta thay makmei zaat, alungpuam sw thau bammei zaat ta tei adow khang ai rui Asiriamei ta thouclou the. Ai rui kaniw ta tei asut khang, houh khang, khatni meic nunc ta tei chaeng khou taniang ta kumc nii bin key khang thouclou the.”

⁷Tiki Asiriamei guangc tei sw kasic karouc nimei tuang kalung khou nai e. Kamei zaatc mpeyna ta swkamut kamailou khang kalung khou dinglou the.

⁸Kamei rui kagaengh swna sa e, “Atuang ricpy guayna hei guangh rana de!

⁹Ai rui Kalno khatni Karkemis kaidai nei, Hamat lev Arpad tuang kaidai nei ta laa the. Ai rui Samaria lev Damaskas ta ni laa the.

¹⁰Jerusalem khatni Samaria khou suangc sini ravmaengc geicna naimei guangcdic guay ta tei dandi tii khang ai abaanc haamv pat the.

¹¹Ai rui Samaria khatni mi tuang ravmaengc guay tei swkamut kamailou the hei tei kumcna ai rui Jerusalem khatni mi khou kalum bammei ravmaengc guay ta tei swkamut kamailou puni.”

¹²Tiki RINGHPOUC rui sa e, “Ai rui Zaion Chyng khatni Jerusalem khou swlou nimei tei swlou tang e thei, ai rui Asiriamei guanghdaihmei ta kamei kagaengh swna ramhkhe sw bammei zaeng khang rui dandi tii puni.”

¹³Asiriamei guanghdaimei rui kagaengh swna kumna sa e, “Mi hei ai rui taanhmei tuang e. Ai hei tanc e khatni ningtyng ntak ge. Zaatc akhat lev akhat kak khou ramvrei guay tei ai rui giak ganc the khatni kaniw tuang lanv guay tei asut the. Hei khou tei lungc bammei guangh nunc ta tei ai rui guaituamchic kumcna nii bin key the.

¹⁴Kandih khou guanghdih guay hei nruay bou na kumc tuang de, kumna nruayna duy khuaih kumc ai rui kaniw lanv tei chalahna khuam the. Ata mpinna kaniw swkaeng na sini kalaapc pat mak ge; kamwang hah patna rah ndyloumei na sini maek ge!”

¹⁵Heikum e tiki RINGHPOUC rui sa e, “Nrih rui kata sinmeipu khang tei suangc tanc e twna sa nuhna cho? Thingruamh baeng rui ruamhmeipu khang tei suangc kagaengh sw bam nuhna cho? Paengpeic rui maansei ta zay thaumei tuang hamh e; maansei rui paengpeic ta zay thaumei tuang de.”

¹⁶Ngamparymei RINGHPOUC rui kapumc gaymei rihmei nunc ta sw kasic karouclou nimei ravpyan tiguang puni. Kaniw pumc khou tei chuangcna chuangcna bammei mai tiilou puni.

¹⁷Ravguangc Isaraelmei khang gaanhmei swmeipu tei, mai sw puni the. Isarael tuang nthanmei Racguangc tei maibwang sw puni the, hei tei rui neih khat na rui ramh katana, sauh raengh ta nganvna raw mutsutlou puni the.

¹⁸Theic nimei sunu rui meic gaanv khat pumc swkasicmei kumcna ngouh tazingh khatni kandih gaymei lauphung guay tei swkamut kamai key puni the.

¹⁹Ngasatna nunc rui sini kasing pac biuhmei thingbang zu na nsaekclou puni the.

²⁰Mi nungc kiu nsaekcloumei Isaraelmei nunc tei kaniw ta sw kasic karoucloumei zaat khou tei ngangvlou taanna RINGHPOUC nthanmei Isaraelmei Racguangc khou lwmlou dat nimei ganv guang puni.

²¹Isaraelmei meic gaanvsaekc ngammei Ravguangc khou guang dat puni.

²²Ntaw hei Isaraelmei duipui syniang zu geic bam sini meic katit na kha hanc guang dat puni. Kaniw ta swkamut kamai nimei latdanv tipat kan the, mi hei biuc rapmei e.

²³Ngguay, kamei rui sw puni twna sa kanmei kumcna Ngamparymei Daic liangmei Racguangc rui mi kandic kapwm khou hei swkamut kamaimei tiguang puni the.

²⁴Ngamparymei Daic liangmei RINGHPOUC rui Zaion khou lungc bammei kamei nunc khou sa e, “Izipmei nunc kumcna Asiriamei nunc rui nangniw ta rairiu bam sini kaniw ta tei nangniw ping riu.

²⁵Asaanh mak khou ai nangniw ta lungpuamc taan puni, kumna ai rui kaniw ta swkamut kamailou puni.

²⁶Midianmei nunc ta Oreb Taucdaic khou kathamvmei kumcna Ngamparymei RINGHPOUC ai rui kaniw ta kathamv puni. Ai rui Izipmei nunc ta dandi tiimei kumcna ai rui Asiriamei nunc ta dandi tii puni.

²⁷Mi ganv kiu guang pwkhou, ai rui nangniw ta Asiriamei nunc baanc khou rui tiduaklou puni, khatni kaniw tuang guangkhap tei nangniw bou khou nai dat lak khe.”

²⁸Zauczihmei rui Ai kaidai laa kan the! Kaniw Migron tat kaan gut the! Mikmas khou kaniw tuang puktaek peic kaduailou the!

²⁹Kaniw chaeng tei kaan patna Geba khou zingbangc ziplou the! Rama kaidai khou bammei nunc ping the, khatni Guangh Saul tuang kaidai Gibeamei nunc pak kan the.

³⁰Kauc tho, Gallim aluc nunc! Nking o, Laishamei nunc! Mundaw o, Anathotmei nunc!

³¹Madmena khatni Gebimmei nunc pak duak khang pak kan the.

³²Ntaw hei zauczihmei nunc Nob kaidai khou bamna, Zaion Chyng khatni Jerusalem kaidai khou kaniw baancduai lyanna kadung bam e.

³³Ngamparymei RINGHPOUC rui kaniw ta thingchy bangv key kumh bangv key puni the. Kauhmei bang guay tei gaibau key puni the. Kauh taph tapmei bang guay tei dow ana key puni the.

³⁴RINGHPOUC rui kaniw ta ngouh laa khou nrih rui thingbang gaikey kumc Lebanon tuang thingdai gaibow keymei kumcna gaibow key puni the.