Read Rongmei Naga ISAIA 11 Bible Online

ISAIA 11 - Rongmei Naga bible

ISAIA 11

¹Jesse kaikhwang hei gaibauloumei thingmui di the; tiki kamui khou rui kabwan kasatc patmei kumc Jesse kaikik khou rui guangh kathanc akhat pat dat puni.

²RINGHPOUC tuang bumaengc rui kakhou ningting, khatni kamei nunc ta sin thay khang ningting takh tiilou puni. Kamei RINGHPOUC chwn thayna champouhna lungc puni,

³khatni kalat piu niina piu bam puni. Kamei rui kapaengc khou howmei khatni chumei theilayna latzan sw lak ge;

⁴kamei rui lungcsi lungcroucmei nunc khang nchumhna latzan swlou puni, khatni ngangvbamv maekmei nunc khang nchumhmei lat kaphianhlou puni. Kalatdanv rui meic nunc ta tei dandi tii puni, meicgay makmei nunc theic puni.

⁵Kamei rui kamei nunc ta nchumhna khatni nthanna sin puni.

⁶Angiw lev lauziu lungc nchamc puni, alaih ni ziuhnac nunc lev zip kariu puni. Guaituam launa nunc lev kamangliangpui launa nunc kataek tu kariu puni, kumna ngana nunc rui kaniw ta gaengc puni.

⁷Guaihkui lev chagamh ni tu kariu puni, kaniw nac nunc ni zip kariu puni. Kamangliangpui ni guaih kumc napgou tu puni.

⁸Ngasatna nunc rui nrui kaimun khou dingtaan puni, alauc nunc rui ruigam bou khou num puni.

⁹Zaion Chyng, Ravguangc tuang nthanmei luangcbut khou, kabiu kabaeng nimei khatni simei nai dat lak khe. Duipui khou dui rui padikmei kumc, mi kandic khou tei RINGHPOUC ta thaymei ningting rui padik puni.

¹⁰Mi nungc kiu Jesse kaikhwang khou rui guangmei guangh thanh kiu zaatc nunc khang chuangh kumcna bam puni. Kaniw rui kaguangh kaidai khou nzwan guang kaduai puni kumna kata kangamv kaziu sw bam puni.

¹¹Mi nungc kiu, RINGHPOUC kabaanc haamv pat datna kamei nunc Asiria khatni Izip khou bammei, Pathros, Sudan, Elam, Babilon, khatni Hamat kandic khou bammei duipui paengc khou khatni duipui pukak ramv khou bammei guay ta phungc guang dat puni.

¹²RINGHPOUC kamei rui kamei Isaraelmei khatni Judamei nunc ta kandih kwn padeih khou rui phungc guang dat bam the twna zaatc nunc khou chuangc daanc thau puni.

¹³Isaraelmei guangcdic rui Judamei guangcdic ta mamav dat lak khe, khatni Judamei hei Isaraelmei lev suc-rih sw dat lak khe.

¹⁴Kaney kariuna neihkey thangc Philistinmei ta adow puni the khatni neihpat thangc mei nunc tuang kwam laa puni the. Kaniw rui Edom khatni Moabmei nunc ta laa puni the, khatni Ammonmei nunc rui kaniw lat piu puni the.

¹⁵RINGHPOUC rui Suez duipui ta tithiplou puni, khatni kamei rui mpwan suhmei tiguangna Euphratis duithuak tithiplou puni, duina launa chanei na nsaekclouna, kum pwkhou meic kathuicna tat kaan nuh puni the.

¹⁶Kaniw pupouc nunc Izip khou rui guang dat khang chaengdai nai kanmei kumcna Asiria khou ringc bam duhmei katuang mei Isaraelmei nunc tei hanc guang dat khang chaengdai nai puni.