Read Rongmei Naga ISAIA 13 Bible Online

ISAIA 13 - Rongmei Naga bible

ISAIA 13

¹Mi hei Babilon lam khou Amoz nac mpouh Isaia rui Ravguangc khou rui laatowmei lat re.

²Chuangh chuangmei chyngbut twan khou rih chuang daanc thau tho! Kagaengh swmei kaidai raengckat khou tei adow gut khang rihmei nunc ta tei kaw ti tho khatni nangniw baanc kazaapcna kaw ti tho.

³Nthanmei ric adow khang khatni RINGHPOUC kamei rui lunghpuamhmei nunc ta dandi tii khang katuang kalangv patloumei tancbauhmei rihmei nunc ta kaw pat the.

⁴Chyngramv khou kachin karo bammei khwan tei nking o, meic kangdai khwan, zaatc nunc khatni guanghdic nunc guang kariu bammei khwan tei. Rihmei kaipouc rui rih bamv khou gut khang karicmei nunc ta chamdaanvna bam the.

⁵Kaniw tei duhmei tingpuk kandih tin thangc rui guang e. RINGHPOUC kalungpuam khou mi kandic kapwm ti hei swkamut kamai khang guang e.

⁶Puihuayna kap tho! RINGHPOUC tuang latzan tingmik ana the, Ngamparymeipu rui swkamut kamailou nimei tingmik kiu ana the.

⁷Khou kiu kaniw baanc guay ni thaengc zuatri kan ni the, meic gaanv khat na sini bauc pat ni tuang hamh the.

⁸Kaniw tei ping puni the khatni nahbam nimeipui kumcna suhmei rui khaengv ngam pw lak khe. Kaniw pingna khat khat ta zauc puni the, khatni kaniw zaw tei zakmei rui mai kumc haengc puni the.

⁹RINGHPOUC tuang latzan tingmik, zauzian nai dat makmei lungpuam tingmik guang pw the. Kandih ti hei tazikramv ti-mbaihlou puni, khatni paapcmei guay ta swkamut kamailou puni.

¹⁰Gaanchuangcna guay gaanc taan puni, bw neih pat sini kariw nai dat lak khe.

¹¹RINGHPOUC rui sa e, “Ai rui kandih khou kamut kamaimei tiguang puni khatni meicsimei guay ta kaniw paap zaeng rui dandi tii puni. Ai rui daihriw swmei kathuicna ta ti-ana keylou puni khatni kauh rauh raumei meic nzimei nunc ta tei dandi tii puni.

¹²Ringc bam duhmei hei kachaekc suangc sini tiraukey puni the.

¹³Ngamparymei RINGHPOUC tuang mai thaumei lungpuam lyan pat pui nungc kiu, ai rui tingpuk ta tikadunh puni the khatni kandih ta kabamv khou rui kanukc pat kan puni the.

¹⁴“Babilon khou lungc bammei gin nunc tei khouringh alaymei nunc hu khou rui asanh pak kumc, gaengcloumei maekmei lauziu nunc kumc kakandih dih thangc pak tat kan puni the.

¹⁵Nymtow nymtowmei tei thu buy-baeng mun khou theih khang di the.

¹⁶Ramh sw la khang maekna zauc bammei hu khou kaniw nac nunc ta kathamv paruat paruatlou puni the, kaniw kai tei nuamlaa puni the khatni kaniw now nunc ta sw kasic karouc puni the.”

¹⁷RINGHPOUC rui sa e, “Ai rui Medimei ta Babilon ta adow khang thouclou kan the. Kaniw daandi kachaekc ta kahaw mak ge.

¹⁸Kaniw tuang sauhpai rui chabwan nunc ta swluai puni. Kaniw rui ngasatna nunc ta ni alauc nunc ta ni nzianlou ni tuang hamh the.

¹⁹Babilon hei gay liangmei guanghdic e; mi hei kamei nunc gaengc kiu e. Tiki RINGHPOUC ai rui mi ti hei Sodom lev Gomora ta kumc swkamut key puni the!

²⁰Hei khou tei meic gaanv khat na sini lungc dat lak khe. Lungcruanna tat bammei Arabmei ni khou tei kaniw tuang pheykai katinghlou dat lak khe, khatni lauziu gaenghmei nunc rui ni khou tei kaniw lauziu byn tisw dat lak khe.

²¹Hei tei tazikramv khou bammei khouringh nunc bamv sw puni khatni khou tei puanmangh nunc kabou duanc puni. Ostrich ruay ni khou tei kabamv sw puni khatni nwmbangc chalung nunc kabaihna lungctaekloumei bamv khou tei kachakc bam puni.

²²Kaisaeng kaidai guay khatni guanghkai khou asacsi khatni angiw nunc muc kagaeng giauh giau bam puni. Babilonmei tuang ganv hei luai guang puni the. Katuang ganv hei luai changh luai puni the.”