Read Rongmei Naga ISAIA 14 Bible Online

ISAIA 14 - Rongmei Naga bible

ISAIA 14

¹RINGHPOUC rui kamei Isaraelmei ta zauc-nzianlou datna kamei khang kadahlou dat puni. Kamei rui kaniw tuang kandic khou tilungclou dat puni, kumna gin nunc ni hei khou tei guangna kaniw pang khou lungc bam puni.

²Isaraelmei nunc tei RINGHPOUC rui kaniw khang tiiloumei kandic khou hanc guang dat khang zaatc mpeyna rui nkhavlou puni, kumna hei khou tei zaatc nunc rui bangh swna Isaraelmei khang taanvtaanclou puni. Kaganv akhat khou Isaraelmei nunc ta nym kanmei nunc ta tei Isaraelmei rui nym dat puni, kumna Isaraelmei rui kaniw ta rairiu khwanmei nunc ta tei sin dat puni.

³RINGHPOUC rui Isaraelmei nunc ta, kaniw tuang ryanra ryanriu khou rui, khatni taanvtaanc lakna taanc bammei khou rui laa duaklou puni.

⁴Kamei rui mi hei taanclou pwkhou, kaniw rui Babilonmei guangc ta nuicna kumna sa puni: “Meic nzimei guangc tei bow key kan the! Kamei rui meic gaanv khat na ta sini rai dat ni tuang hamh the!

⁵RINGHPOUC rui meicsimei nunc tuang builwang tei swbau the khatni mi tuang ngamv guay ta,

⁶maansei guay ta zauzian maekna khatni nthaekc makna raibammei lungpuam ta khatni hei tei rui zaatc guay ta raibammei ngamv tei dapralou the.

⁷Ntaw thu kandih kapwm nchu nrina nthaekc puni the, kumna meic kathuicna neihlana suan puni the.

⁸Alu thingbang guay khatni Lebanon tuang sidar bang guay mi guangc tei bow kanmei khang tei neihla puni the, ntaw thu mi guay tei gaibau dat nimei maek khe, mi ganv tei tat kan the!

⁹“Babilonmei guangc ta ariw khang taruaih rui chamdaanvna bam the. Kandih khou tanc baucna lungcloumei nunc tuang bumaengc nunc tei kalung thau the. Guangh nunc tuang bumaengc nunc tei kaniw tuang guangc bamvpaeng khou rui ding thau the.

¹⁰Kaniw rui kakhou kumna sa the, ‘ntaw thu nang ni aniw kumcna pumtan maek khe la! Nang ni aniw lev akhat na di the!

¹¹Nrah downa nang ta ngamziw swna bammei tei, ntaw thu taruaih khou bam dyng the la. Ntaw thu nthanv laeng khou nthanv rui pheypuangh swna zip bam dyng the.’

¹²“Babilonmei guangc, karangmei lauthwan gaanphiu, nang tingkauh thangc rui taek key the! Rey khou tei nang zaatc nunc ta ngamna bam khwan e, ntaw thu nang ta kandih khou ganclou the.

¹³Nang tingkauh thangc kuna kauh liangmei gaanchuangcna guay ruc khou nang guangc bamvpaeng lou ni twna nang ning khwan e. Dihpy thangc naimei rav nunc guang kariumei chyng ruc khou tei nang guangh kumcna dungc bam ni twna ning khwan e.

¹⁴Nang muangh ruc khou kuna Ngamparymeipu kumc ni twna nang sa kan e.

¹⁵Tiki ntaw thu nang ta taruaih tuang nthuk liangmei bamv khou phungc keylou the.

¹⁶“Theihmei nunc rui nang ta how kaluangna hahlah la puni the. Kaniw rui kumna sa puni, ‘Mipu hei kandih ta kanukcmeipu khatni guanghdic guay ta tikadunhmeipu tei cho?

¹⁷Mipu hei kaidai guay swkamut kamailoumeipu khatni kandih ta tazikramv tiguanhloumeipu tei cho? Mipu hei katuang kangmei nunc ta mpat dat zat makmeipu khatni kakai titat dat zat makmeipu tei cho?’

¹⁸Kandih nam ruc khou guangh guayna katik kagunc daicna katuang katuang tarou khou zip bam e,

¹⁹tiki nang thu nang tuang tarou sini maek khe, nang pumc tei taamcna kaliang ganclou the. Hei tei rih bamv khou swluailoumei rihmei nunc tuang pumc rui khwan binlou the, khowlang khou ganclou the, khatni nii binlou the.

²⁰Nang rui nang kandih ta swkamut kamai pui zaeng rui khatni nang meic nunc ta swluaipui zaeng rui, nang ta baihmei guangh nunc ta kumcna mbeihlou lak ge. “Si kanmei nang kai kaikhuncmei gaanv khat na sini ringc pat lak ge.

²¹Kumhpui zaeng rui mipu tei rui puanhmei nac nunc ta swluai khang chamvdaanv tho, kalam thu mi pu tei khuay mpeyna nailou kan the, kumlamak ge thei kanac guay rui thau datna mi kandic ti hei laana kaidai mpeyna kasiamh thau dat puni e.”

²²Ngamparymei RINGHPOUC rui sa e, “Ai rui Babilon ta adowna swmutsutlou puni. Ai ramhkhat na sini nsaekclou lak ge, alauc nunc ni, meic gaanv khat na ta sini nsaekclou lak ge. RINGHPOUC ai rui sa pat kan the.

²³Ai rui Babilon ta zouckuangh bampui bamv khatni duisi maisi ramv tiguanhlou puni. Ai rui Babilon ta laengphiak rui giak puni kumna ramh kaguayna giak ganc puni. Ngamparymei RINGHPOUC ai rui mi hei sa pat kan the.”

²⁴Ngamparymei RINGHPOUC rui syangdyng swna sa kan the: “Ai rui ninglou kanmei tei taanc pat puni the. Ai rui taanc ni twna ninglou kanmei tei taanc pat puni the.

²⁵Ai rui Asiriamei ta Isaraelmei kandic khou swmutlou puni the khatni atuang luangcbut guay ruc khou kaniw ta niibin puni the. Ai rui amei nunc ta Asiriamei nunc tuang guangkhap khou rui khatni kaniw rui phungc nimei puatrith khou rui tiduaklou puni the.

²⁶Ai rui kandih kapwm khang taanc nimei kiu mi hei the, kumna zaatc nunc ta dandi tii khang abaancpwam ntyng pat the.”

²⁷Ngamparymei RINGHPOUC rui mi hei taanh khang kalung dinglou the; dandi tii khang kabaancpwam ntyng pat the; meic gaanv khat na rui sini kata khaam dat ngam lak khe.

²⁸Guangh Ahaz Theihmei Kwm mi Lat hei Tiguang the.

²⁹Philistinmei nuncle, nangniw ta baimei builwang tei swbau kan the, tiki nang neihla bam khang kalam maek ge. Nrui akhat theic kan sini si ranvmei nrui akhat lyn dat puni. Nrui duy khou rui thaanngangc samhmei kak pat the.

³⁰RINGHPOUC rui lungcsi lungcroumei kamei nunc ta makuatlou puni kumna kaniw ta giuga maekna tibamlou puni. Tiki Philistinmei nangniw ruc khou si sihmei nkow- ndaapcmei tiguang puni, kumna nangniw gaanv khat na ta sini tiringc pat ni tuang hamh e.

³¹Philistinmei kaidai guayle, nkhavlou khang puihuayna kap tho! Nangniw kaguayna ping tho! Dihpy thangc rui mbut katungh thungh thung key the zammei gaanv khat na sini nai dat makmei rihmei pang e.

³²Philistinmei latpaumei nunc khou tei tabui kumhna sa daw nina cho? “RINGHPOUC rui Zaion ta ntipna kasiamh thaulou kan the, kumna ryanra ryanriumei kamei nunc tei mi khou tei giuga makna bam puni the,” twna aniu rui kaniw khou dinclou ni.