Read Rongmei Naga ISAIA 16 Bible Online

ISAIA 16 - Rongmei Naga bible

ISAIA 16

¹Tazikramv khou naimei Sela kaidai khou rui Moabmei nunc rui Jerusalem khou guanghtu bammeipu khang lauziunac akhat kaipat swna tiiguang e.

²Kaniw Arnon duithuak paengc khou, kabou khou rui alay gancloumei nruayna kumc ramh sw khang maekna tat pat tat gutna nkhwan bam e.

³Kaniw rui Judamei nunc khou sa e, “Tabui tuang sw khona cho dinclou o. Kalaanv neihrinkin khou nchumei thingswng rui sungcloumei kumc, nang swng khou aniw ta ti-nthaekclou o. Aniw hei rih pingna pak guangmei nunc e; meic gaanv khat na rui sini phutow lakmei bamv khou aniw ta nkamhlou o.

⁴Aniw ta nangniw tuang kandic khou tibamlou o. Aniw ta swkamut kamai khang phu bammei nunc khou rui gaeklou o.” (Rairiumei khatni swkamut kamaimei hei luai kan puni, mi kandih ti hei sw kasic karouc bammei nunc hei tat dat kan puni.

⁵Hei tangv kiu David kikta akhat rui guangh sw puni, kumna kamei rui meic nunc ta nzianna khatni lwm nuhmei swna sin puni. Kamei rui nchumhmei tei katumc katumcna taanc puni, khatni nzihmei tei tat key puni.)

⁶Judamei nunc rui sa the, “Moabmei nunc hei adihkamv kagaengh sw cho twmei aniu chu the. Kaniw hei kauh rauh rau khatni daic tuh tu the, tiki kaniw rui ramhkhe sw bammei tei karaeng de.”

⁷Moabmei nunc tei kaniw ramrianra khang tei rui kaniw kap puni the. Kaniw Kir Heres kaidai khou tu bam khwanmei tugay zangvgaymei taektw tei ningtowna kaniw meic guayna kap puni.

⁸Heshbon daeng khou naimei pikwan khatni Sibma tuang drakhalau zaatc nunc tuang dihsinpouc nunc ta tizangv mba bammei mi drakhalau kanei ti hei swmut the. Kaganv akhat khou mi chy guay tei Jazer kaidai baanc tangc khatni neihkey biak thangc theihmei duipui baanc tangc bam khwan e.

⁹Ai rui Jazer khang kapmei kumc ntaw ai Sibma tuang drakha bang guay khang kap be. Heshbon khatni Eleale khang amikdui key e, kalam thu nangniw kathai laaguangna neihlamei khwan chu mak khe.

¹⁰Kandih heidi gaymei laupuk guay khou tei neihla bammei maek khe. Meic gaanv khat na sini drakhalau guay khou lu suan bammei maek khe. Drakha dui kasiamh khang meic gaanv khat na sini drakhathai nii bammei maek khe; neihlana kauc bammei tei luai the.

¹¹Ai Moab khang rui azaengsina nrah khwan kumc kap be, khatni Kir Heres khang rui lungh kabiuhna kap be.

¹²Moabmei nunc tei kaniw tuang ravkai khou kalum khang chyngtwan ravbamv thangc tei tat liat lak khe, tiki hei tei rui kaniw khang ramh gaenghmei tuang maek khe.

¹³Mi hei RINGHPOUC rui Moab lam khou tiguang reymei lat the.

¹⁴Ntaw RINGHPOUC rui kumna sa dat re, “Chapchana tingkwm kathumh lungc khou Moab lanv heizumei tei amaan puni. Meic heizumei khou rui, meic katit na theic nsaekclou puni, khatni kaniw tei nsuan puni the.”