Read Rongmei Naga ISAIA 17 Bible Online

ISAIA 17 - Rongmei Naga bible

ISAIA 17

¹RINGHPOUC rui kumna sa e, “Damaskas hei kaidai sw bam dat ni tuang hamh the; mi hei kasic karoucna lungctaekna ganclou puni the.

²Siria tuang kaidai guay hei tingsaengzaeng meic lungctaekna ganclou puni the. Mi guay tei khouringh khounah byn sw puni the, meic gaanv khat na rui sini alay ganclou dat lak khe.

³Isaraelmei khang raengh nai dat lak khe, khatni Damaskasmei khang guanghdic nai dat lak khe. Ringc bam duhmei Siriamei nunc tei Isaraelmei nunc kumcna zak puni the. Ngamparymei RINGHPOUC ai rui sa pat kan the.”

⁴RINGHPOUC rui sa e, “Mi nungc kiu Isaraelmei hym guay luai kan puni the, kumna katuang lanv guay phaan tei lungcsimei rui lyn puni the.

⁵Isaraelmei hei lau tay tangmei laupuk kumc puni the khatni Rephaim nzaengc khou napthai guay tay tangna gancloumei laupuk kumc puni the.

⁶Meic katit na kha theic nsaekclou puni, kumna Isaraelmei hei laengkic bang kathai lw ngamna kachy phaan phaan khou khatni thaigeihmei chy khou kathai padeih panguh na nthaina bam puni the twna RINGHPOUC Ravguangh rui sa pat kan the.”

⁷Mi tingmik kiu guang pwkhou, meic nunc tei kaniw ta Damhmeipu, nthanmei Isaraelmei Racguangc khou nkhavlou khang hanc guang puni.

⁸Kaniw baanc rui kasiamhloumei agaw nteimei tuang ravchapaeng guay khou kaniw ngangvlou bam dat lak khe, khatni kaniw baanc rui kasiamhloumei Ashera ravpui maengc khou tei lwmlou bam dat lak khe.

⁹Mi nungc kiu, kaniw tuang raengh raeng piangh pianghloumei kaidai guay tei Hivimei khatni Amormei rui Isaraelmei ta pingna ganclouna pak kanmei kaidai guay tei kumcna lungctaekna ganclou puni.

¹⁰Isaraelmeile, nangniw ta kanduakloumeipu khatni taucdaic kumc nangniw ta tiduakloumeipu Ravguangc ta nangniw amuh the. Kumna nangniw ravbamv pikwan thingbang lingclouna rav baihmei ta kalum the.

¹¹Nangniw rui hei tei lingcloumei lauthwan kahak tei kabwan thau patna kapwang puangc bam sini, kathai nthai lak ge. Ryanra ryanriumei khatni tigay dat ngam lakmei suhmei guang puni.

¹²Kapumtan naimei zaat nunc tei duipui ninna rah kumc, daihmei duimuat kapyang kumh kachin karo bam the.

¹³Zaatc nunc tei duiluat luangh kumh luangc guang the, tiki Ravguangc rui kaniw ta luh tina kaniw hanc kan the, mpwan rui luangc ngangh khou syniang hunc ganh kumc, napgung aliu ganh kumc alay ganc kan the.

¹⁴Tingzyn kaniw mpinlouna, lauthwan thu kaniw amaan kan the. Mi hei aniw ruc khou rih keymei kathuicna khou pat kan the.