Read Rongmei Naga ISAIA 19 Bible Online

ISAIA 19 - Rongmei Naga bible

ISAIA 19

¹Mi hei Izip khang tii guangmei lat re: RINGHPOUC muangh khou tuangcna katumcna guang pw the. Izipmei tuang ravmaengc guay kahu khou kadunh e, khatni Izipmei nunc kaniw bau maek khe.

²RINGHPOUC rui sa e, “Ai rui Izip khou kaniw nchamc kak khou suc-rih tipatlou puni the. Chana rui kachana ta, kainingmei rui kainingmei ta, kaidai akhat rui guanghdic akhat ta adow puni the.

³Izipmei nunc tuang taanvraeng guay tei ai rui sw baklou ngam puni the, kumna kaniw tuang bau guay ni laa ganc ngam kan ni the. Nkhavlou khang rui kaniw ravmaengc guay khou huay puni, kaniw amuh nunc khou khatni theihmei bumaengc nunc khou thanv puni.

⁴Ai rui Izipmei nunc ta meicsimei khatni meic nzimei guangc baanc khou tiilou puni. Ngamparymei RINGHPOUC ai rui sa the.”

⁵Nail duithuak dui thip key puni the, kumna mi duibaek tei kangc puni the.

⁶Mi duiriang khou rui zay patmei duiriang dui guay tei luangc taanna namhsi puni the. Zungc ntou khatni tazungbang guay tei theic key puni the,

⁷khatni Nail duithuak paengc khou lingcloumei phunling phunlu guay tei kangc ngamna mpwan rui hunc ganc puni the.

⁸Nail duithuak khou khav nymna ringc bammei nunc tei puihuayna kap puni the; kaniw tuang khavkhuay khatni chiakc guay tei nsa di the.

⁹Kamanv kunghmei phey dak bammei nunc tei ni ningmei guang tangc pw lak khe,

¹⁰phey dakmei nunc khatni thyam taanvtaanhmei nunc tei ni ningmei kai ngam puni the.

¹¹Zoan kaidai tuang kapy nunc tei mpang the. Izipmei guangc tuang ningtyngmei nunc rui ni mpangmei lat nchamlou the. Kaniw hei reynungc ningting ntakmei khatni guangh nunc khou rui lungc keymei kik ge twna akumhna kaniw tuang gaengh khou sa diwna cho?

¹²Izipmei guangcle, nang tuang ntakmei meic nunc kiu tabui sw kan thena cho? Ravguangc rui Izip khou tabui swlou nina bam cho twmei kaniw thay bu ny thanv zauc o.

¹³Zoanmei khatni Memphismei kapy nunc hei mpang the. Kakandih ta chaengzay nimei nunc rui zay laanh the.

¹⁴RINGHPOUC rui kaniw ta tikaguakc kasuakclou kan the. Kum tina Izip rui ramh kaguayna taanc laanh ngam the, khatni kaniw rui ngguak patloumei ding khou kazut bammei zouh mbamei kumc kaniw kaguakc the.

¹⁵Izipmei gaanv khat na rui sini, lungcgaymei rui ni lungcsimei rui ni, daihmei rui ni, nthyammei rui ni nkhav dat ngam mak khe.

¹⁶Mi nungc kiu, Izipmei nunc tei ntumei kumc puni the. Ngamparymei RINGHPOUC rui kaniw ta dandi tii khang kabaanc zay thaumei ta how pwkhou kaniw ping kadunh puni the.

¹⁷Izipmei nunc tei Ngamparymei RINGHPOUC rui kaniw ruc khou ryanramei tiguang khang chamdaanvlou bammei ta tei ningtowmei kathuic Juda ta ping puni the.

¹⁸Mi ganv kiu guang pwkhou, Izip tuang kaidai panguh khou Ibrimei lat sa puni. Mi khou kiu lungc bammei nunc rui Ngamparymei RINGHPOUC zanc khou rui syangdyng sw puni. Mi kaidai pang khou tei akhat ta “Neihmik Kaidai” twna kaw puni.

¹⁹Mi ganv kiu guang pwkhou, Izip kandic lungc khou RINGHPOUC khang katgutloumei tausuam nai puni.

²⁰Hei tei Ngamparymei RINGHPOUC Izip khou bam e twmei tuang lyanmei tuang puni the. Mi khou bammei nunc ta tei rairiu pwkhou kaniw rui kanlou khang RINGHPOUC ta kaw pwkhou, kaniw ta kanlou khang kamei rui meic gaanv khat thouclou puni.

²¹RINGHPOUC kamei rui kata Izipmei nunc khou lyanlou puni, khou kiu kaniw kata thaylouna kata kalum puni, kumna kaniw kakhou puatkat tii puni khatni kakhou khaeng puni. Kaniw rui kakhou ntipmei latdyng swlou puni, kumna kaniw rui kaniw tuang latdyng guay taanc puni.

²²RINGHPOUC rui Izipmei ta dandi tii puni, tiki hei khou kiu rui kaniw ta tigaylou dat puni. Kaniw rui kakhou ngalanc guang dat puni, kumna kamei rui kaniw huayneymei chulouna kaniw ta tigaylou dat puni.

²³Mi ganv kiu guang pwkhou, Izip lev Asiria kak khou chaengdai nai puni. Mi kandic kanei hei khat khat kak khou tatpat tatgutna bam puni khatni mi zaatc kanei hei kalum kariu puni.

²⁴Mi ganv kiu guang pwkhou, Isaraelmei hei Izip lev Asiria ta nchamc puni, kumna mi kandic kathumh hei rui kandih kapwm khang suaihiam phungc guang puni.

²⁵Ngamparymei RINGHPOUC rui kumna kaniw ta suaihiamlou puni, “Izip, amei nuncle, Asiria, ai rui damcloumei nuncle; Isaraelmei, ai rui kadahloumei nuncle; ai rui nangniw ta suaihiamlou the.”