Read Rongmei Naga ISAIA 2 Bible Online

ISAIA 2 - Rongmei Naga bible

ISAIA 2

¹Mi hei Ravguangc rui Amoz nac mpouh Isaia khou Juda khatni Jerusalem lam khou tiiguangmei lat re:

²Nkhamhmei ganv guang pwkhou, Ravkai ding bammei chyngbut hei kauh liangmei chyngbut sw puni, chyngbut guay khou rui kauh taph tap bam puni. Zaatc mpeyna rui khou hei dui luangh kumc guang puni,

³khou kiu meic nunc tei rui kumna sa puni, “Aniu RINGHPOUC tuang chyngbut khou ku di kho, Isaraelmei Racguangc tuang Ravkai khou ku di kho. Kamei rui aniu khou kachaeng tei dinclou puni the; kamei rui dincloumei chaeng khou aniu tat puni. RINGHPOUC tuang latdyn Zaion khou rui pat puni, kalat Jerusalem khou rui pat puni.”

⁴Kamei rui zaatc khat lev khat kak khou latzan nzanhlou puni, kumna zaatc nunc kak khou agay agi bammei latzan tei tatkeylou puni. Kaniw rui kaniw tuang buy-baeng guay tei phu-baeng khang dy kan puni. khatni kaniw tuang buy-baeng tei ramhbang rapmei guanh puni the. Zaatc akhat rui zaatc akhat ruc khou buy-baeng sinthau dat lak khe, kaniw suc-rih khang ni chamdaanv lak khe.

⁵Guang tho, Jakob kaikhuncmeile, aniu RINGHPOUC tuang riw khou tat di kho.

⁶He Ravguangc, nang rui nangmei nunc ta, Jakob kai kaikhunc ta ganclou the. Kalam thu kaniw khou hei neihpat thangc tuang mangmuc rui padik the, Philistinmei tuang duaih-raengh sinmei kumcna kaniw zaatc baihmei thei nzeih the.

⁷Kaniw kandic hei daandi kachaekc rui padik the; kaniw tuang lanv hei kanganv maek khe. Kaniw kandic hei takuanh rui padik the; kaniw tuang takuanc gari hei kanganv maek khe.

⁸Kaniw kandic hei ravmaengc rui padik the; kaniw baanc rui kasiamhmei ravmaengc khou kaniw py bumkeyna kalum the.

⁹Meic kathuicna ta tizaklou puni the. Kaniw ta kuaklou dat ri tho!

¹⁰RINGHPOUC tuang lungpuam ley duak khang, katik kahym khou rui nkamh khang kaniw khowlang khou nkamh puni the, khunh khou dup puni the.

¹¹Kauh rauh rauna bammei nunc ta ti-ana key puni the, daihriw swmei nunc ta tiniamhkey puni the; mi nungc kiu RINGHPOUC na kha daicna bam puni.

¹²Mi nungc kiu Ngamparymei RINGHPOUC rui daihriw swna kauh rauh rau bammei nunc, puanc kauh khamh khamlou bammei guay ta tei ti-ana keylou puni the.

¹³Kamei rui kauhmei Lebanon tuang sidar bang guay ta, Bashan tuang mphauhbang guay ta ni swkamut kamailou puni the.

¹⁴Kamei rui kauhmei chyngbut guay ta, kauh taph tapmei luangcbut guay ta,

¹⁵kauhmei rihphaankai guay ta, rihgaekkai raengc guay ta kagatc mphamh phe key puni the.

¹⁶Tarsis tuang rungc guay, kalwn gaymei rungc guay ta ni tikalimh kan puni the.

¹⁷Maansei tuang kauh rauh raumei guay tei tiniamhkey puni the, gaengh swmei guay tei ti-ana key puni the tiki mi nungc kiu RINGHPOUC na kiu daicna bam puni the.

¹⁸Ravmaengc guay tei ni akhat na sini how dat pw lak khe.

¹⁹Kamei kandih ta kanukc khang guang pui nungc RINGHPOUC lungpuam khou rui ley duak khang, katik kahym khou rui nkamh khang meic nunc rui khowlang khou dup puni the khatni khunh khou nkamh puni the.

²⁰Mi nungc kiu meic nunc tei kaniw rui kalum khang kasiamhloumei daandi kachaekc tuang ravmaengc guay tei mpiu apuakc khatni laamtuaih khang kaliang ganclou puni the.

²¹RINGHPOUC rui kandih ta kanukc khang guang pwkhou, RINGHPOUC lungpuam khatni katik kahym ta ley duak khang meic nunc tei khowlang khou nkamh puni the, khowkai khou dup puni the.

²²Maansei khou lwmlou dat ri tho. Kaniw rui tabui sw ngamna cho?