Read Rongmei Naga ISAIA 21 Bible Online

ISAIA 21 - Rongmei Naga bible

ISAIA 21

¹Mi hei Babilonmei lam khou tii guangmei lat re. Meicsi kanmei kandic thangc rui tazikramv khou rui swkamut kamaimei pwanzingh guangc kumc guang puni the.

²Si sihmei tuang akhat pat nimei ndawman akhat meicguatmei nunc rui zuanctumei khatni swkamut kamai nimei ndawman akhat how the. Elammei ricmei nuncle, adow tho! Mediamei ricmei nuncle, kaidai guay tei ding kuam tho! Babilonmei rui tiryanra ryanriu bammei guay tei Ravguangc rui laa ganclou kan ni the.

³Ai mi ndawman tei how pwkhou pingmei rui padik the khatni akhang suhmei hei nahbam nimeipui rui suhmei kumcna suc the.

⁴Apy nguang the, khatni ping kadunh the. Tingzyn keymei ta ai kahaw the, tiki tingzyn guang bam ni pingmei hamhna ramhkhat sini maek khe.

⁵Mi ndawman khou kiu khwmkih taektw tu khang chamdaanvlou bam khwan the; guangmei nunc tei dungc key khang phey ntyng patna bamclou the. Thay mak daekna latdanv akhat tiguang the: “Kapy nuncle! Nangniw tuang nggih guay tei chamdaanv tho!”

⁶Khoutei RINGHPOUC rui akhou sa the, “Nang tatna rigaanv tiding tho, kumna kamei rui howmei tei dinc o twna sa tio.

⁷Maansei takuanh tuangcna gaanv nei gaanv nei guangmei, khatni meic nunc kuanniam tuangcna, guaikuan tuangcna guangmei how e thei, kamei hei tei zauc mincna zauc nina e.”

⁸Rigaanvpouc tei rui kumna kauc pat the, “Kaipoucle, ai zingbangc kalaanv abamv khou rigaanv ding bam the.”

⁹Thay mak daekna mi kiu guang the. Meic nunc takuanh tuangcna gaanv nei gaanv nei dacna guang the. Rigaanvpouc tei rui chamv tei kumna dinc the, “Babilon bow key kan the! Kaniw rui kalum bammei ravmaengc guay tei ganczin ganczalou bam the.”

¹⁰Amei Isaraelmeile, nangniw ta gehu dy kumc dy kan the, tiki ntaw thu ai rui Ngamparymei RINGHPOUC, Isaraelmei Racguangc khou rui chumei gaymei chamv nangniw khou tithaymei tuang the.

¹¹Mi hei Edom lam khou tii guangmei lat re. Seir thangc rui gaanv khat rui kumna kauc guang “Rigaanvpouc, zingbangc asaanh nai he cho? Tinggaanh khang asaanh nai he cho?”

¹²Ai rui kumna mundaw the, “Lauthwan guang pw the, tiki zingbangc ni guang dat puni he. Nang thanv dat nii e thei, guangna thanv dat ro.”

¹³Mi hei Arabiamei lam khou tii guangmei lat re: He Dedanmei nunc, kaniw tuang puat phunghmei guaikuan pang Arabiamei tuang ramvpuk khou zypui sw bammei nunc,

¹⁴tarina nangniw khou guangmei nunc khang tei dui tii tio. Tema kandihmei nuncle, rih pingna pak tat bammei nunc khang tei titulou tio.

¹⁵Suc-rih pingna buy-baeng hu khou khatni luhpai hu khou pak tat bammei nunc khang tei.

¹⁶Khoutei kaipouc rui akhou sa e, “Chapchana tingkwm akhat lungc khou, Kedarmei tuang hym tei luai puni the.

¹⁷Sauhpai sinmei hei Kedarmei tuang bauc liangmei nunc e, tiki kaniw meic katit na ta nsaekclou puni the. RINGHPOUC ai, Isaraelmei Racguangc rui sa pat kan the.”