Read Rongmei Naga ISAIA 22 Bible Online

ISAIA 22 - Rongmei Naga bible

ISAIA 22

¹Mi hei Ndawman Nzaengc lam khou tii guangmei lat re. Tabui tuang sw bam tina cho? Tabui swna meic nunc tei kainam kainam khou kuna bam tu cho?

²Kaidai kapwm hei kachin karo the; neihla zaenggaymei khwan rui chinh chin the. Mi rih khou theihmei nangniw mei nunc hei adowna theih tuang hamh e.

³Nangniw tuang kapy nunc tei pak the pailu akhat na sini kaap pat makna, kumna kaniw ta nym the. Kaniw ducna paktat kan sini ariwmei asaekc ta thu nym the.

⁴Theic kanmei amei nunc ruc khou ai kap ni saanv kaplou me, arana ta mpatlou o, ata swmlou rio.

⁵Mi hei Ndawman Nzaengc khou pingmei, zawsimei, khatni kaguakc kasuakcmei ganv the, kumna mi hei Ngamparymei Kauh Liangmei RINGHPOUC rui aniu khou tii guangmei tuang the. Aniu tuang kaidai raengh hei swpangv the, nkhavlou khang kauhmei khwan rui luanghbut guay khou kagaengv padik the.

⁶Elam kandic thangc rui rihmei nunc sauhpai sinna takuanh tuangcna guang the. Kir kandic thangc mei rihmei nunc kaniw tuang nggih chamdaanvlou bam the.

⁷Juda tuang kandic gaymei nzaengcdic guay khou tei takuanh gari rui padik the; rihmei nunc takuanh tuangcna Jerusalem raengcmun guay khou ding bam geic the.

⁸Juda tuang ricmei nunc duppuibamv guay tei pangv ngam kan the. Hei tei hei kumcna patlou pwkhou tei, nwmbangc tuang guanghkai khou rui rih na laaguang the.

⁹David kaidai tuang raengh tei bakpuat patmei ta nang how the. Kumna kabangcmei duikhunc khou tei rui zu thaulou the,

¹⁰Jerusalem tuang kai guay tei chak lana kai guay tei rakeyna raengh tei titaanclou the.

¹¹Zeih raan khou tei rui luangc keymei dui tei chungclou khang kaidai lungc khou tei duikuak dai kasiamhlou the. Tiki mi guay hei tingsaenghmei hu thangc rui raengclouna mi hei tipatloumei Racguangc ta nangniw thaylou mak ge.

¹²Kauh Liangmei Ngamparymei RINGHPOUC rui nangniw ta kapna huay khang, nangniw py guatna zaengsiphey piu khang kaw bam the.

¹³Mi phaan tei nangniw nuhna khwm ngayna bam e. Nangniw lauziu dowtuna, guaih dowtuna, zouh zangvna bam e. “Aniu tu kho, zangv kho! Nthuanh thu aniu theic kan nimei tuang di ke,” twna nangniw sa bam e.

¹⁴Kauh Liangmei Ngamparymei RINGHPOUC rui akhou sa e, “Kaniw ringc bam saanv mi simei taanv khang hei kuaklou dat ngam mak khe. Kauh Liangmei Ngamparymei RINGHPOUC ai rui mi hei sa the.”

¹⁵Kauh Liangmei Ngamparymei RINGHPOUC rui ata guanghkai khou tamzanh bammeipu Shebna daeng khou guangna kumna sa o twna sa e,

¹⁶“Nang hei thow e twna nang ningna cho? Luanghbut khum khou ntauh khou tei nang rana nang tuang tarou khang thuaiclou bammei tei nang khang tabui ngamv naina cho?

¹⁷Nang hei tancbauhmei bam nuh e, tiki RINGHPOUC rui nang ta khuaicthauna ndat ganc puni the.

¹⁸Kamei rui nang ta sin thauna daic nganvmei kandic thangc phaiclou puni the. Mi bamv khou tei nang nang gaengh swna bammei takuanh gari pang khou theiclou puni the. Nang hei nang kaipouc kai khang meiczakmei tuang di the.

¹⁹RINGHPOUC rui nang ta nang bam khou rui laa pat puni the khatni nang tuang kauhmei bamv khou rui laakey puni the.”

²⁰RINGHPOUC rui Shebna khou kumna sa e, “Mi kiu guang tangc pwkhou, ai rui abangc Eliakim, Hilkia nac mpouh ta kawna,

²¹ai rui kakhou nang tuang pheychuan khatni siangiat tei tipiulouna nang khou naimei ngamv guay tei kakhou tiilou puni. Kamei hei Juda lev Jerusalemmei tuang sw puni the.

²²Ai rui kakhou David kaikhwang khou rui guangmei guanghpu bangc khou ngamv guay tiilou puni. Kakhou tei kaikhamvtaan tiilou puni the; kamei rui laancloumei tei meic gaanv khat na rui sini mbangh ngam mak ge, kamei rui mbanghloumei tei gaanv khat na rui sini laanc dat lak khe.

²³Ai rui kata kabamv khou muihtiangc hian kumc hian ntiplou puni the, kumna kamei rui kakai kaikhunc kapwm khou champouhmei phungc guangmeipu sw puni the.

²⁴“Tiki kariang kaluaic khatni kakhou ngangvlouna bammei nunc rui kapuatrit sw puni the. Ramh thaenghchei khou laibung lairiu thaengcloumei kumc kaniw kakhou thaengc puni the.

²⁵Hei kumhmei ganv khou kiu, ntipna hianloumei muihtiangc tei nliu patna taek key puni. Heikumna hei tei mi khou tei thaengcna bammei guay tuang luaimei puni the.” RINGHPOUC rui sa the.