Read Rongmei Naga ISAIA 23 Bible Online

ISAIA 23 - Rongmei Naga bible

ISAIA 23

¹Mi hei Tur lam khou samei lat re. Puihuay tho, duipui khou rungh chau tat bammei nuncle! Nangniw tuang rungc banghbamv Tur tei sw kasic kan the; mi khou naimei kaguay khatni mi tuang runghthaekc bamv sw kasic ngam the. Nangniw tuang rungh guay Saipras khou rui hanc guang dat pwkhou, mi chamv tei chu the.

²Rimh rim tho, Sidonmei nang tuang chamv phunghmei tei duipui kaanna tat kan the.

³Duipui kaanna Izip khou rui patmei nap liuna zuancna zaatc guayna khou lanvguanh tat khang.

⁴Sidon kaidaile, nang hei zak the! Duipui khatni daihmei duipui zeih guay rui nang ta katuang sw zihna “Ai anac khat na sini puanc patlou mak ge. Ai nah mpouh ni aluh ni makuat thau mak ge,” twna sa the.

⁵Tur ta swkamut kamai ngam the twmei Izipmei nunc rui chu pwkhou kaluang puni the khatni lungh kabiu puni the.

⁶Puihuayna kap tho, Phoenikiamei nuncle! Spain kandic thangc pak duak khang sw la tho!

⁷Mi hei reynungc rui kasiamh thauloumei neihlamei Tur tuang kaidai tei dina cho? Mi hei namvdow khang duipui paengc thangc meic thouc pat bammei kaidai tei dina cho?

⁸Guangh kaidai, katuang lanvguanh lanvdaenghmei guangc nac nunc ta tei kandih nam ruc khou chakhwang champouh sw liangmei swna bammei Tur kaidai ti hei heikumna swmut key khang thow rui raengc pat pw tu cho?

⁹Ngamparymei RINGHPOUC rui mi hei taancloumei tuang e. Kaniw taanv khang rui kaniw gaengh sw bammei ta tei swmaanlou khang khatni kaniw tuang chakhwang champouh sw bammei nunc ta sw zaklou khang mi hei kamei rui tipatmei tuang the.

¹⁰Spain khou lungc bammei nangniwle, Nail duithuak kumcna nangniw kandic khou lyam pat tho! Nangniw ta swkhamv swnamv dat nimei maek khe.

¹¹RINGHPOUC rui kabaancpwam dui ruc khou ntyng pat the kumna guanghdic guay ta sw key the. Phoenikiamei nunc tuang lanvguanh lanvdaenghmei bamv guay tei swkamut kamailou khang kamei rui latdanv pat the.

¹²Sidonmei alucle, nang tuang neihlamei tei luai the, kumna nang mei nunc ta rairiu the. Kaniw Saipras thangc pak tat bam sini, kaniw tei duak mak ge.

¹³(Nwmbangc khouringc nunc rui Turmei ta sw kasic karouc keymei hei Asiriamei nunc rui hamh e, Babilonmei nunc rui de. Babilonmei rui Turmei tuang kaidai guay ta rigaanvkai kasiamh nkuay binlou the, raengh raenglouna kaidai guay tei swra key the, kumna kaidai guay tei meic lungctaekna ganc ringh ruih ruilou the.)

¹⁴Puihuayna kap tho, duipui khou rungh chau tat bammei nuncle! Nangniw rui ngangvlouna bammei kaidai guay tei swkamut kamai ngam kan the.

¹⁵Tur ta tei tingkwm 70, guangh akhat tuang panty saanvsaengh amuclou nimei ganv guang pw the. Mi tingkwm guay tei luai kan pwkhou, Tur hei lu khou kumna naimei mangcsangmeiluc tei kumc puni the:

¹⁶Nrah sinna kaidai tei tat nkuay tho, sansimei gancloumei mangcsangmeilucle! Nggaanvmei nunc ta kaw guang dat khang nrah downa nang tuang lu guay tei suan dat tho.

¹⁷Tingkwm 70 tei luai kan pwkhou, RINGHPOUC rui Turmei ta katuang reynungc taanv bamv tei titaanclou dat puni, kumna karana kata kandih kapwm tuang guangcdic guay khang zuanc puni.

¹⁸Kaniw rui lanvguanh lanvdaenghna ntaanv guangmei siandui guay tei RINGHPOUC khou kat gutlou puni. Kamei rui hei tei duh thangc rylou ni tuang hamh the, tiki kaniw tuang siandui guay tei RINGHPOUC ta kalummei nunc rui kaniw tuang taektw khatni pheybaan liu khang sinsw puni.