Read Rongmei Naga ISAIA 24 Bible Online

ISAIA 24 - Rongmei Naga bible

ISAIA 24

¹RINGHPOUC rui kandih ti hei sw kasic karouclouna ganc rymlou puni the. Kamei rui kandih zaw ti hei kariang kadat kadaenglou puni the kumna mi khou lungc bammei nunc ti hei zinphak zinzalou puni the.

²Mi hei amuh nunc khou ni, meic nunc khou ni, bangh nunc khou ni, kaipouc nunc khou ni, liumei nunc khou ni, zuanhmei nunc khou ni, tipou patmei nunc khou ni, poumei nunc khou ni, lungcsimei nunc khou ni, lungcgaymei nunc khou ni nchamcna guanglou puni the.

³Kandih hei sw kasic karouc ngamna ganclou puni the. RINGHPOUC rui sa pat kan the kumna mi hei pat rap puni the.

⁴Mbaanv kandic hei kangc key the kumna tuai the; kandih kapwm hei kasic key the; tingpuk kandih hei tuai ngam the.

⁵Meic nunc rui Ravguangc tuang latdanv guay twanlyamna khatni tingsaengzaeng khang kamei rui swloumei latdyng tei sw bakna kandih ti hei swtanac the.

⁶Kumna Ravguangc rui kandih khou kasyang kauc patlou the. Meic nunc tei kaniw tuang taanvphy laa the. Ringc bam duhmei maansei rau hay hay guang the.

⁷Drakhaluai guay kangc key the, kumna drakhadui nkow the. Neihlana bammei nunc tei ntaw thu ryanra the,

⁸khatni kaniw tuang neihlamei nrah khwan khatni nkhuangh khwan tei ntaw thu nthaekc kan the.

⁹Zouh zangvna lu suanna bammei tei nai dat mak khe; meic gaanv khat na khang sini zouh ni zangv gay dat mak khe.

¹⁰Kaidai khou tei ramh kaguayna kaguakc kagah ngam the, kumna kaniw kaguayna kaikhamv taan binlouna dup bam the.

¹¹Zouh maek tina meic nunc tei chaengdai chaengdai khou kaucna tat bam the. Neihlamei twmei tei tingsaengzaeng khang tat kan the; neihlamei hei mi kandic khou rui maan kan the.

¹²Kaidai tei kasic karouc ngam the khatni karaengcmun guay tei ra ngam the.

¹³Mi hei kandih kapwm khou zaatc kaguayna khou guanglou puni the. Hei tei laengkic bang kaguayna khou rui kathai kathamv key ngam tangmei kumc khatni drakhathai guay tei karyangmei thai nganvna rei ngam tangmei kumc puni the.

¹⁴Theic nsaekcloumei nunc tei neihlana lu suan puni. Neihkey thangc bammei nunc rui RINGHPOUC tikgunc dinc puni,

¹⁵neihpat thangc bammei nunc rui kata thuanc puni. Duipui paengc khou lungc bammei nunc rui RINGHPOUC, Isaraelmei Racguangc ta thuanc puni.

¹⁶Duh liangmei kandic bamv bamv guay thangc rui Isaraelmei, ravchaptatmei zaat ta thuanhmei lu khwan aniu rui chu puni. Tiki akhang thu ramh gay nimei tuang maek khe! Ai hei mut key the. Meicguatmei nunc rui zuanctu the, kumna kaniw tuang meicguatmei taanv tei si hay si hayna taanc the.

¹⁷Meic mathiuna, ai rui samei hei nkinglou o! Meicpingmei, khunh, khatni phahraengh mpeyna nang ta nkhwanna bam the.

¹⁸Meicpingmei bamv khou rui pak duak patmei kathuicna kwam khou keylou puni, kwam khou rui pak patmei kathuicna phahraengh khou manc puni. Tingpuk thangc rui ting dui bun key kumc bun key puni, khatni kandih bam kadunh puni.

¹⁹Kandih hei nkakc puni the khatni bakpuat paruat puni the kumna kandih hei kanukc ranvna kanukc puni the.

²⁰Kandih kahak hei zouh mbamei kumc kazit puni the, pwanzingh akhangvmei kailauna kumc kanukc pat pat gut gut puni the. Kandih ti hei paapc rui thaengc pangv key puni the; kumna hei tei thau dat ngam ni tuang hamh the.

²¹Hei nungc kiu RINGHPOUC rui kauh thangc naimei ngamv guay ta khatni kandih kaipouc nunc ta dandi tii nimei ganv guang puni the.

²²Ravguangc rui guangh nunc ta khunhkai khou kangbangc kaduailou kumc bangc kaduailou puni. Kaniw ta dandi tii nimei ganv tei guang tangh mak saanv kaniw ta mbanghlou puni.

²³Bw zingc puni, neihmik gaanc dat lak khe, kalam thu Ngamparymei RINGHPOUC rui guangh sw puni the. Kamei Zaion Chyng khou Jerusalem khou rui guangh sw puni the, kumna meic nunc tuang kapy swmei nunc rui kahym tei how puni the.