Read Rongmei Naga ISAIA 25 Bible Online

ISAIA 25 - Rongmei Naga bible

ISAIA 25

¹RINGHPOUC, nang hei aRavguangc e; ai nang ta chakhwang champouh sw ni khatni nang zanc thuanc ni. Nang rui charynmei taanv mpeyna taanclou the, nang rui reynungc rui raengcloumei raeng tei kalaih makna taanc pat the.

²Nang rui kaidai guay ta swkatupc tuayna ganclou the khatni kaniw tuang rihphaan guay tei swkamut kamailou the. Aniu ta zauczihmei nunc rui kasiamhloumei bamv guay tei tingsaengzaeng khang maan kan the.

³Kangamv naimei zaatc nunc rui nang ta thuanc puni; meic nzimei zaat nunc tuang kaidai guay khou tei nang ta ping puni.

⁴Lungcsi lungcroucmei ngangvbamv maekmei nunc nang khou paklou the kumna ryanramei ganv khou kaniw duak the. Nang rui kaniw ta pwanzingh khou rui tiduplou the khatni mai kumc chuanghmei thiu khou rui sungclou the. Meic nzimei nunc rui tingsei pwanzingc kumc adow the,

⁵ramvkiang khou neihthiu kumcna adow the. Tiki RINGHPOUC, suhmei kalaanv neicthiu ta muanghbangv rui guam nchuriloumei kumcna nang rui aniu ta zauczihmei nunc ta tirimlou the; meic nzimei nunc rui kaucna bammei khwan tei nang rui tirimh rim keylou the.

⁶Kandihmei zaatc kaguayna khang mi Zaion Chyng khou hei RINGHPOUC rui tugay zangvgaymei taektw khatni zangvgaymei drakhadui tuang khwmkih taektw chamdaanvlou puni.

⁷Zaatc nunc ruc khou gumliam bammei zaengsimei muangcbangv tei kamei rui kadyng mak khou mi bamv khou rui laa ganclou puni.

⁸Ngamparymei RINGHPOUC rui theihmei ta tingsaengzaeng khang swmaan kan puni! Kamei rui meic kathuicna mikdui roulou puni, kamei nunc rui kandih kapwm khou zakna bammei tei laa ganclou puni. RINGHPOUC kamei kahak rui sa kan the!

⁹Mi nungc kiu mi hei pat pwkhou meic kathuicna rui kumna sa puni, “Kamei aniu Ravguangc e! Aniu kakhou lwmlou the kumna kamei rui aniu ta kanpatlou the. Kamei hei RINGHPOUC e! Aniu rui kakhou lwmlou the, kumna ntaw thu aniu neihla the khatni zaenggay the kalam thu kamei rui aniu ta kanlou the.”

¹⁰RINGHPOUC rui Zaion Chyng ta gaeklou puni, tiki napgou ta chaba khunc khou nii bin keymei kumcna Moab ta nii bin key puni.

¹¹Kaniw duizaek ni kumcna kaniw baanc haamv pat puni, tiki Ravguangc rui kaniw zaw tisilou puni kumna kaniw ngangvbamv maekna kaniw baanc tei mphumh key kan puni.

¹²Kamei rui Moabmei tuang rihgaekkai guay khatni raengh kauhmei guay tei swkamut kamai key puni kumna mi guay tei kandih khou swpangv keylou ngam puni.