Read Rongmei Naga ISAIA 26 Bible Online

ISAIA 26 - Rongmei Naga bible

ISAIA 26

¹Meic nunc rui mi lu hei Juda kandic khou suan nimei ganv guang puni: Aniu tuang kaidai hei tanc e! Ravguangc kamei kahak rui mi kaidai raengh ti hei gaeklouna bam e!

²Kaidai raenghmun guay tei laancpat tho kumna lwmnuhmei zaatc nunc ta tigut tho, nchumhmei taanhmei zaat nunc ta tei.

³He, RINGHPOUC, kaniw lung nang khou ntipna bammei nunc khou khatni nang khou lwmlouna bammei nunc khou nang rui nthuihmei nchu-nzaenghmei tiilou the.

⁴RINGHPOUC khou tingsaengzaeng lwmlou o; kamei rui aniu ta kaganvthuic gaeklou puni.

⁵Daihriw swmei nunc ta kamei ti-ana keylou the; kaniw tuang tanhmei kaidai guay kamei rui swkamut kamailou the, khatni kaniw tuang raengh guay kandih khou siaucpuat paruat keylou the.

⁶Kaniw rui rairiu bammei nunc tei ntaw thu mi khou tei ruan tat bam the, kaniw phay rui nii bin lana.

⁷He RINGHPOUC, nang rui meic gaymei nunc khang kaniw tat nimei chaeng sw ndiaulou the; kaniw tatmei chaeng hei chaengphai gay the.

⁸Nang rui ningmei khou aniw tat bam e khatni aniw nang khou lwmgayna bam e; aniw rui kahawmei kapwm kiu nang hei rap di the.

⁹Zingbangc alung kapwm rui ai nang ta kahaw e; lauthwan ni abumaengc rui nang ta ning e. Nang rui kandih khatni kandihmei guay ta latzan sw pwkhou, nchumhmei kiu tabui tei cho twmei kaniw thay puni.

¹⁰Nang rui meicsimei nunc ta zauc nzianlou bam tisini, kaniw nchumhmei taanh khang karamc zat mak ge. Mi nchumhmei nunc tuang kandic khou hei nganvna kaniw nkhuaimei taancna bam e; kaniw nang hym ta thaylou nii mak ge.

¹¹Nang ta zauczihmei nunc tei kaniw ta nang rui dandi tii puni twmei kaniw thay mak ge. RINGHPOUC, kaniw ta tizaklou o; kumna kaniw ta tiryanralou o, nang rui chamdaanvloumei dandi tei kaniw khang tiilou tho. Nang rui nang mei nunc ta adih nzian cho twmei kaniw khou lyanlou o.

¹²He RINGHPOUC, nang rui aniw khang lungcgay chingkhiuhmei tiilou puni, aniw rui taanc pat kanmei kaguayna tei nang rui taancloumei tuang de.

¹³He RINGHPOUC, aniw Racguangc, aniw ti hei meic baihmei mpeyna rui kaipouc swna sinna lungc guang the, tiki nang zanc na ta chakhwang sw e.

¹⁴Ntaw thu kaniw theic kan the, ringc dat ni tuang hamh the; kaniw tuang bumaengc ni thau dat ni tuang hamh the, kalam thu nang rui kaniw ta swkamut kamailou the. Meic gaanv khat na rui sini kaniw ta ningtow bam dat ni tuang hamh the.

¹⁵He RINGHPOUC, nang rui aniw zaat ti hei tidaicthaulou the, aniw ramvrei neihpat neihkey, dihpy dihba tidaic patlou the, mi rui nang hym tidaiclou the.

¹⁶He RINGHPOUC, nang rui nang mei nunc ta riap the, kaniw ryanra pwkhou kaniw nang khou huayney the.

¹⁷Nahbam nimeipui rui sucna kapmei kumc, he RINGHPOUC, nang rui aniw ta tikaplou the.

¹⁸Aniw sucna ryanra khwan the, tiki aniw ramhkhat sini puanc pat mak ge. Aniw rui aniw kandic khang rih akhat na sini ngamlou mak ge; aniw ramhkhat na sini ngam kan mak ge.

¹⁹Theic kanmei nang mei nunc tei ringc dat puni! Kaniw pumc tei ringc guang dat puni. Kaniw tuang tarou khou zip bammei nunc tei thau datna neihlana lu suan puni. Karangmei zikduibungc rui kandih kachaengc tiringcloumei kumcna tingsaengcna theic kanmei nunc ta RINGHPOUC rui tiringcthaulou dat puni.

²⁰Amei nuncle, nangniw kai khou gutna kaikhamv mbanghlouna bam la tho. Ravguangc lungpuam tei luai mak saanv matat khat nkamh la tho.

²¹Kandihmei nunc ta kaniw tuang paap dandi tii khang RINGHPOUC kabamv tingkauh thangc rui key pw the. Kandih khou meic thay makna meicdowmei nunc ta ni ndauhpat puni, khatni swluai kanmei nunc ta tei ni kandih rui nkamh bam dat ni tuang hamh the.