Read Rongmei Naga ISAIA 28 Bible Online

ISAIA 28 - Rongmei Naga bible

ISAIA 28

¹Ephraim guanghdic mut puni the! Katuang hym guay tei zouh mbamei kapy nunc py khou mwnpwang pyrun kumc tuai key the. Daic tuh tumei kaniw tuang kapy nunc tei mwndui thauc lup chuy the, tiki zouh zangv tamaeng taamv taamlouna aliauna bam e.

²Nrihthai key kumc guang punimei, ting bun kumc, tanhmei duidai luangh kumc luangc guangna mi kandic ta liak bin ngamlou nimei RINGHPOUC tuang tanhmei khatni kangamv naimei thowkumhmei kaniw ta adow khang chamdaanvna bammei nai e.

³Zouh mbamei kapy nunc tuang guangc guay tei phay rui niibin puni.

⁴Mi daic tuh tumei hym guay tei tinglwm tangh mak khou nthai pat reymei tadutthai, minc patpui lev rei tu ngam kanmei kumc mak ngam kan puni.

⁵Ngamparymei RINGHPOUC kamei hei ringc bam duhmei kamei nunc khang hym daihmei mwnpwang pyrun kumc nimei ganv guang puni.

⁶Kamei rui latzanpouc nunc khou nchumhmei ta thaymei lung tiilou puni, khatni kaidai raenghkat guay gaekna bammei nunc khou pumtan tiilou puni.

⁷Muhzwng nunc khatni amuh nunc nganvna zouh mba kasicna kazit bam the. Kaniw zouh heidikamv zangv mbana kaniw kaguakc kagahna phay kalanv the. Muhzwng nunc tei zouh mbana Ravguangc rui tii guangmei ndawman tei ni kabah thay mak khe, khatni amuh nunc tei zouh mbamei rui kaniw khou phungc guangmei latzan tei ni swlou thay mak khe.

⁸Kaniw tuang kuakpaeng khou tei nruy padiklou the, nthanmei bamv khat na sini maek khe.

⁹Kaniw ata nsicna kumna sa e, “Kamei thow ta ncham ni twna ning lana cho? Katuang lat tei thow khang dinc bam cho? Kalat tei ngana khang gay e!

¹⁰Kamei rui aniu khou latrik hiak akhat akhat swna, kakaeng akhat khat swna, kalangv akhat khat swna ncham gut khang swna bam e.”

¹¹Nangniw ai samei hei chu zih e thei, nangniw ta nchamlou khang Ravguangc rui baic lath latmei lat samei gin nunc ta piu puni the.

¹²Kamei rui nangniw khang zaeng nthaekcmei khatni amanvmei laa lo twna tii bam e, tiki kamei rui samei nangniw chu nii mak khe.

¹³Hei zaeng rui RINGHPOUC rui nangniw ta kahiak akhat khat swna, kakaeng akhat khat swna, kalangv akhat khat swna nchamlou puni the. Kum pwkhou nangniw kaamcpatmei phaykaamv kathuic khou phaysuy puni the. Nangniw ta tikabiu kabaeng puni the, phah manc puni the, kumna kangmei swna nym tat puni the.

¹⁴Jerusalem khou kaipouc nunc swna meic nunc ta sin bammei daic tuh tupuimei nuncle, RINGHPOUC rui sa bammei hei nking o.

¹⁵Nangniw theihmei lev champanv khanv the, khatni taruaih lev latdyng sw the twna nangniw dai sw bam e. Swkamut kamaimei guang pwkhou nangniw ta daeklou puni de twna nangniw ning e, kalam thu nangniw saraamhmei khatni meicguatmei lat khou tei lwmlou the.

¹⁶Kauh Liangmei RINGHPOUC rui ntaw kumna sa e: “Ai rui Zaion khou tanhmei khatni ntipmei kaiphwn akhat lou the. Mi khou tei ai rui ‘Lwmmei ntipmei lev akhaengv saenghmei,’ twna hyloumei kaikwn taucdwm akhat lou the.

¹⁷Mi kaiphwn tei ndath nimei riang rui nchumhmei rui ndath puni khatni lungh nthanmei rui ding ntyngmei ntyng makmei ndathmei riang sw puni.” Nangniw ngangvlou bammei saraamhmei guay ta tei nrihthai rui phiak ganc ngam puni, khatni duppuibamv guay tei duidai rui swkamut kamailou puni.

¹⁸Nangniw theihmei ta champanv khanvloumei tei swmaanlou dat puni, khatni taruaih lev latdyng swloumei tei laa ganclou dat puni. Swkamut kamaimei tei liak key pwkhou nangniw ta liak bin key puni the.

¹⁹Hei tei nangniw ruc khou guang dat guang dat puni, lauthwan pum guang puni. Nangniw hei tei zingbangc kalaanv akhaengv puni. Ravguangc tuang latthanv tii guangmei kathuic tiping kathanc dat dat bam puni!

²⁰Nangniw hei nangniw tuang latchap khou katan pansav key khang ni kalaeng dui langv, kapumc baanv liam khang ni kaphey nthyam langv twmeipu tei kumc puni the.

²¹RINGHPOUC kamei rui taanc ni twna ningmei tei taanc pat khang, kamei rui Perazim chyng khou khatni Gebeon nzaengc khou sw kanmei tei kumcna adow puni the kamei taanc nimei taanv tei kadath dat bam nuh e. Kamei rui katuang meic thay makmei taanv tei taanc suaklou puni.

²²Ai rui nangniw swriakthay khang sa bammei lat hei nuic la ri tho! Nangniw nuic e thei, nangniw duak dat ngam pw lak khe. Kandih kapwm hei swkamut kamai khang RINGHPOUC rui latdyng laa kanmei tei ai chu the.

²³Ai rui sa bammei hei nking o; ai rui nangniw khou dinc bammei khou hei lungh gutlou o.

²⁴Ramh lingh khang lausuakmeipu rui suak taan zat makna suakna bam mak ge.

²⁵Kamei rui laupuk tei suak luailou lana katuay katingh lingc keylou the. Kamei rui gehu khatni sipian kakin kakin lingclou the, kumna lau tin khou baihmei phunling lingclou the.

²⁶Kamei akumhna taanc nina cho twmei thay e kalam thu Ravguangc rui kata nchamlou the.

²⁷Kamei rui katuay katingh thw tei nritmei thingdangv rui dy mak ge; thingchiang nthyammei kabiucmei na tei rui kathamv e.

²⁸Gehu tei ntyan khang tak piak nina e, tiki dykeyna bam mak ge, Takuanh gari haengv rui tak piak bam sini hei tei takuanh rui thu takpiak tuang hamh e.

²⁹Mi kaguay hei Ngamparymei Racguangc charynmei ningting nchamlou dinclou thaymeipu khou rui guang tuang e.