Read Rongmei Naga ISAIA 29 Bible Online

ISAIA 29 - Rongmei Naga bible

ISAIA 29

¹Ravguangc tuang ravchabamv, David rui lungclou khwanmei Jerusalem, ryanra zaengsi e dav! Tingkwm kasuanh keyna ngay bam la ho.

²Tiki ai rui nang tuang ravchabamv tei sw kasic key puni the, mi khou tei kapna puihuay puni the, Jerusalem tei rav khaengpui bamv kumc puni the.

³Ravguangc rui mi kaidai ta tei adow puni the, hei tei rihmei rui bam nkuay puni the.

⁴Jerusalem hei theihmei bumaengc rui kandih bangc thangc rui kamwang thingcna kauc tamih mi patmei kumc kauc bam puni the.

⁵He Jerusalem, nang ta adoumei zaatc baihmei guay tei mbut ta mpwan rui hunc ganh kumc hunc ganc puni the, kumna kaniw tuang meic pingmei rihmei nunc ta tei napgung ta kumc aliu ganc puni the. Lwm mak daekna dyng mak khou rui,

⁶Ngamparymei RINGHPOUC rui ganh khatni baengla chinh chin guangna nangniw ta kanlou puni. Kamei rui pwanzingh khatni raw kamut kamaimei mai tiguang puni;

⁷khou kiu Ravguangc tuang ravchabamv kaidai ta adow bammei zaatc nunc tuang ricmei nunc, kaniw tuang ricpwan rih na guay ramh katana mang kumcna maan kan puni;

⁸Jerusalem ta adow khang guang kaduaina bammei nunc tei kabung ndaapcmeipu kamang thangc thu tu bam tiki rak pat dat ki ndaapc bam khwan, hamh e thei tari luai kan ni kumhmeipu rui kamang thangc thu zangv bam tiki rak pat dat pwkhou karuak kaengv kan ni kumc bammei kumc puni.

⁹Nangniw rana nangniw ta sw mpangna mpangmei sw tho! Nangniw rana nangniw mik swtiatna mik tiat tho! Zouh zangv makna mba tho! Zouh thu akhat na sini zangv key makna mbana kazut tho!

¹⁰RINGHPOUC rui nangniw ta tizip niilou the, theih kumc zip khang chamdaanv tho. Muhzwng nunc hei meic nunc tuang mik sw nimei tuang e, tiki Ravguangc rui meic nunc tuang mik kagouc kan the.

¹¹Ndawman tuang kabah guay tei nangniw khou rui nkamhlou puni the; hei tei karakcloumei latrikzy kumc puni the. Nang rui hei tei sinna pac thaymeipu khou pac o twna laaguang pwkhou hei tei karakclouna pac nuh mak ge twna sa puni e.

¹²Nang rui hei tei pac thay makmeipu khou pac o twna laaguang pwkhou kamei pac thay mak ge twna sa puni e.

¹³RINGHPOUC rui kumna sa e, “Mi mei nunc hei kaniw mwang thu ata kalum e twna sa bam e, tiki kaniw tuang lat kaguayna tei kabah maek ge, khatni kaniw lung tei kabamv baih thangc bam e. Kaniw ramkalum tei maansei rui kasiamhloumei thiak tei kaniw mwang khou na suaic bam tuang na de.

¹⁴Kaniw rui ning makmei tuang taanv taanc katwan katwanlouna kaniw ta tingaksakh saklou puni. Ningtyngmei nunc tei mpangmei nunc sw puni the, khatni, kaniw tuang takh guay tei guang dat ni tuang hamh the.”

¹⁵Kaniw tuang raeng guay RINGHPOUC khou nkamh khang sw bammei nunc tei sansi e dav! Kaniw rui taanc bammei guay tei meic thay pw lak ge, meic how pw lak ge twna nkamhna taanc bam e.

¹⁶Kaniw kabangc karuc swkadat kadaengv ngam the. Tabui tei rui daicna cho, lai kasiamhmeipu tei ny gambic tei cho? Maansei rui kasiamhloumei puat akhat rui “Nang rui ata kasiamhlou tuang hamh e,” twna maansei khou sa nuh dina cho? Hamh e thei, “Nang ramh thay mak ge” twna kakhou sa nuh dina cho?

¹⁷Sana bammei kumcna, asaanh mak khou Lebanon ngouh tazingh tei kathai karwan gaymei laupuk guanh puni the, khatni laupuk tei ngouh guanh dat puni the.

¹⁸Mi ganv kiu guang pwkhou, nu ndymei nunc tei ni latrik pac ranvna pac patmei ta chu dat puni the, khatni kamik tiatmei nunc zinghmei khou lungc bammei nunc ni kaniw mik rak pat datna how puni the.

¹⁹Lungcsimei khatni lungcthuy makmei nunc tei ni RINGHPOUC, Isaraelmei tuang nthanmeipu rui tiimei neihla tei laatow dat puni.

²⁰Hei tei meickai ta rairiu bammei Ravguangc ta malana bammei nunc tuang nganvmei puni the. Paapcmei kaguayna ta swkamut kamailou puni the.

²¹Meickai ta kaniw rui sa nkhuailoumei, nkhuaimei ta dandi tii mak khang sa khaamvloumei, khatni lungning nthanmei nunc khou nchumhna taanclou mak khang saraamcna samei mi kumhmei nunc ti hei Ravguangc rui swmaan puni.

²²Abraham ta thuakpatloumei RINGHPOUC rui Jakob lam khou kumna sa e, “Jakob kai hei zakna zaw haengc bam dat lak khe.

²³Ai rui nangniw khang tii pw nimei alauc nunc ta kiuc nangniw how pwkhou, ai hei Isaraelmei tuang nthanmei Racguangc e twmei nangniw thay puni. Nangniw ata champouh puni kumna ata ping puni.

²⁴Mpangmei nunc rui kabah thay khang ncham puni, khatni kaganv kathuicna khanc lanc bammei nunc tei dincloumei ta kahaw puni,” twna sa e.