Read Rongmei Naga ISAIA 3 Bible Online

ISAIA 3 - Rongmei Naga bible

ISAIA 3

¹Ntaw thu meic nunc rui lwmgayna bammei puat khatni maansei guay ta tei Ngamparymei RINGHPOUC rui Juda khatni Jerusalem khou rui laa ganc kan puni the. Kaniw tuang taektw nap-bi guay, kaniw tuang dui guay,

²kaniw tuang tancbauhmei guay khatni rihmei guay, kaniw tuang latzanpouc guay khatni muhzwng guay, kaniw tuang mangmuc guay khatni gaanvsuh gaanvthaih guay,

³kaniw tuang rihpy[1] guay khatni kapy swmei guay, kaniw tuang guangh tuang baanhza guay, kaniw tuang pat ni guang nimei tikalaic kalw khang duaih-raengh swna bammei guay laa ganc kan puni the.

⁴RINGHPOUC rui alauc nunc ta kaniw kandic tisin puni the.

⁵Meic kathuicna khat lev khat ta guattu puni the, alauc nunc rui gaanvthaih ta chakhwang sw mak puni the, kabangc khou bammei nunc rui karuc khou bammei nunc ta chakhwang sw mak puni the.

⁶Kaikhwang akhat tuang mei nunc rui kachana punav akhat ta “Nang khang thu nsuay mbaanv khang ni nai maih the, mi ryanramei ganv khou hei nang rui kapy swlou o,” twna sa puni.

⁷Tiki kamei rui “Ai tigay ngam mak ge, akhang tuzangv khang ni maek ge pheybaan ni maek ge,” twna kapy sw mu akhyam puni the.

⁸Jerusalem hei mut puni the! Juda hei bow key puni the! Kaniw latsa khatni kaniw taanv guay RINGHPOUC rui nuh makmei rana sa the, taanc the; kaniw ndauhna Ravguangc zaw tikasic the.

⁹Kaniw zaw rui kaniw khuay lyan the. Sodommei nunc kumc kaniw ndauhna paapc taanc the; kaniw nkamh dat mak khe. Kaniw hei sansi e dav! Kamut kamaimei kaniw rana kaniw ruc khou phungc guang the.

¹⁰Ravchaptatmei nunc tei neihla puni twna kaniw khou salou tio, kalam thu kaniw tei kaniw taanvthai laa tu puni the.

¹¹Meicsimei nunc tei sansi e dav! Kaniw rui meic nunc ruc khou swloumei tei kaniw ruc khou keylou dat puni the.

¹²Amei nunc ta alauc nunc rui sintu the, ntumei rui kaniw ta sin the. He amei nuncle, nangniw tuang kapy swmei nunc rui nangniw ta chaengzay laanh the; nangniw tat thau tat guang khang thay mak khe.

¹³RINGHPOUC katuang latzan bamv khou guang dungc kan the; kamei nunc ta latzan sw khang kamei ding thau kan the.

¹⁴RINGHPOUC latzan sw khang gut kan the, gaanvthaih guay ta khatni kapy swmei guay ta latzan sw khang. “Atuang drakhalau sw kasicmei hei nangniw rui e; lungcsi lungcroumei nunc tuang asut guangmei puat rui nangniw kai padik the.

¹⁵Nangniw rui amei nunc ta niak piakna khatni lungcsimei nunc ta sintuna bammei thouc mak ge,” twna Kaipouc, Ngamparymei RINGHPOUC rui sa the.

¹⁶RINGHPOUC rui sa e, “Jerusalemmeipui nunc hei kaniw zaw puanc ngangc sanglouna, talehmei mikseic sw lana, kaniw phaytyang ntah kadiw khingh khingna, suaic suaicna kaamc lana daihlwn sw the.

¹⁷Tiki ai rui kaniw py tiguat nkuaklou puni the, kaniw py ti-nkuaklou puni the.”

¹⁸Mi nungc kiu RINGHPOUC rui Jerusalemmeipui nunc gaengh swna karuh bammei guay kaniw phaytyang khou, kaniw py khou, kaniw guang khou,

¹⁹kaniw baanctyang khou, kaniw tuang ngaengv gumphey,

²⁰kaniw tuang pykha, kaniw baancpwam khou khatni kaniw syan khou ntalou bammei gah khatni thauh;

²¹kaniw baanczung khatni kaniw nwkwang khou lou bammei tadip,

²²kaniw tuang kamanv kunghmei pheybaan guay khatni syankhau guay;

²³kaniw tuang pheychuanh, kamanv kunghmei pheyzai, kaniw py khou khaek bammei khatni kamc bammei pykam khatni pytin guay tei laa ganc ngam kan puni the.

²⁴Mwndui thauc phaan namhsimei namh puni the; bungkam phaan riang nta puni the; sam karuhmei phaan py nkuakc puni the; kamanv kunghmei phey phaan zaengsiphey nsuay puni the; howgaymei phaan zak puni the.

²⁵Nggaanvmei guay buy-baeng hu khou theic puni the, rihphianh guay rih bamv khou theic puni the.

²⁶Zaion tuang raengckat guay kapna latlu puni the; kaidai kahak tei pheybaan luakganclouna paliucna kandih khou dungc bammeipui kumc puni the.