Read Rongmei Naga ISAIA 30 Bible Online

ISAIA 30 - Rongmei Naga bible

ISAIA 30

¹RINGHPOUC rui sa e! “Juda ta sin bammei nunc hei sansi e dav! Kalam thu kaniw ata liam the. Ai rui swlou makmei raeng kaniw tat key the, kumna ai rui kahaw makmei khou champanv khanvmei tuang suaic sw the, paapc akhat ruc khou akhat khwan kasuanh suanh ku bam the.

²Akhou thanvtow makna nkhavlou khang kaniw Izip thangc tat the. Izip rui kaniw ta gaeklou pw khang kahaw e, kumna kaniw Izipmei guangc khou ngangvlou the.

³Tiki kaniw ta nkhavlou khang guangh tei kangamv nai lak ge, Izip rui gaekloumei tei zaw tisilou puni.

⁴Kaniw tuang dihkhyn nunc Izip tuang kaidai Zoan lev Hanes khou guang tangc bam sini,

⁵Judamei nunc tei kaniw rui lwmlou nuh makmei zaat, kaniw ta nkhavlou pw khang ningmei ganv khou nkhavlou ngam lakmei zaat khou lwmloumei khang tei zakna kaniw lungh kabiu puni.”

⁶Mi hei dihba tuang tazikramv khouringc nunc lam khou Ravguangc rui sa guangmei lat re: “Dihkhyn nunc tei kamangliangpui nunc, kakhay tanhmei nrui nunc khatni samhmei thaanngangc mpeyna naimei meic pingmei kandic khou tat ruanna ngginlou the. Kaniw ta nkhavlou ngam lakmei zaat khang tei kaniw tuang kuanniam nunc khatni guaikuan nunc khou kaipat rui puatc swna tat the.

⁷Izip rui nkhavloumei tei nsa di the. Kumhpui zaeng rui ai rui Izipmei zanc khang ‘kangamv maekmei thaanngangc’ twna phuaklou the.”

⁸Meic nunc tei adihkamv si cho twmei hylouna tingsaengzaeng nai bam khang, meic nunc tei akumh cho twmei latrik buk khou hy keylou o twna Ravguangc rui akhou sa the.

⁹Kaniw kaganv kathuicna Ravguangc ta liamna bam e, kaganv kathuic saraamcna bam e, Ravguangc rui nchamloumei ta nuh muna bam e.

¹⁰Muhzwng nunc ta reih reina bam o twna kaniw rui sa e. Kaniw rui sa e, “Nchumhmei lam khou aniw khou sa bam nangh e. Aniw rui chu nii niimei lat na sa o. Aniw rui lwmmei lwm bam kan ni de.

¹¹Aniw chaeng sw thingh riu aniw khou rui tat kan o. Nangniw tuang nthanmei Racguangc lam khou aniw chu nii mak ge.”

¹²Tiki nthanmei Isaraelmei Racguangc rui sa e: “Ai rui nangniw khou samei tei nangniw thouh sw mak ge kumna meicngam meicliammei taanv khatni meicguatmei khou tei nangniw ngangvlou the.

¹³Nangniw hei nkhuai the. Nangniw hei nkakc padakmei raengh kauhmei kumc the; thay mak daek khou nangniw hei pangv puni the.

¹⁴Nangniw hei nianglai bak kumc bak puni the, hei tei heidikamv bak kasicna maithyn suak thau biuhmei kiak na sini hamh e thei laibung khou rui dui suak thau biuhmei kiak di na sini nai dat ni tuang hamh the.”

¹⁵Kauh Liangmei RINGHPOUC, Isaraelmei tuang nthanmei Ravguangc rui meic nunc khou sa e, “Hanc guang dat ro, kumna reih reina akhou lwm bam o. Kum e tw e thei nangniw hei tanc puni khatni giuga makna lungc bam puni.” Tiki nangniw ai rui samei piu mak ge!

¹⁶Mi phaan tei katumhmei takuanh tuangcna nangniw ta zauczihmei nunc khou rui pak duak khang karamc e. Ngguay, nangniw rui sw bammei tei nchumh the nangniw duak khang sw nina the! Nangniw tuang takuanc nunc tei katumc the twna nangniw ning e, tiki nangniw ta nthaumei nunc tei katumc ranv puni!

¹⁷Zauczihmei ricmei gaanv khat ta how pwkhou nangniw meic 1000 pak puni, kumna nangniw meic guayna ta nthau ganh khang rihmei gaanv panguh rui biuc puni. Chyngtwan khou tei nangniw tuang chuanghphey tiangc karana ding bam duhmei tei hamhna nangniw tuang ricmei nunc tuang ramhkhat na sini ganclou ni tuang hamh the.

¹⁸Kum bam sini RINGHPOUC nangniw ta zauc nzianlou khang nkhwanna bam e. Kamei nangniw ta kadanlou khang nkhwanna bam e. Kalam thu kamei nchumhmei na taancna bam e. RINGHPOUC khou lwmloumei nunc tei sangaymei nunc e.

¹⁹He Jerusalemmei, nangniw kap dat lak khe. Ravguangc hei thu zauzian thaymeipu e, nangniw rui nkhavlou khang kauc pwkhou kamei rui nangniw khou dawlou puni.

²⁰Kaipouc rui nangniw khou ryanramei tiguanglou sini, nangniw ta nchamlou khang kamei hei khou tei bam puni de, kumna nangniw kata phu bam dat lak khe.

²¹Nangniw rui baanzat thangc pwni baandau thangc pwni chaeng khou rui ducna tat mbiangh tat kan pwkhou kamei rui nangniw thei khou, “Khou hei chaeng nai e. Mi khou tei tat ro,” twna samei chu puni.

²²Nangniw tuang daandi kachaekc rui luploumei ravmaengc nunc tei laana “Tat kan tho!” twna kauc lana mphuammei puat ta kumc kaliang ganc puni.

²³Nangniw rui phunling phunlu lingc key pwkhou, hei tei thau khang RINGHPOUC rui ting tiriu key puni kumna nap-bi thuihna laa puni, kumna nangniw tuang khouringh khounah nunc ni kataek mphamh mphahna tu khang nai puni.

²⁴Nangniw lau suak bammei guaichic nunc khatni kuanniam nunc tei gay liangmei taek tu puni.

²⁵Nangniw ta zauczihmei nunc tuang rihgaekkai guay tei laipui nungc kiu kaniw mei nunc ta tei nangniw swluai puni khatni chyngbut kathuic khou rui khatni luanghbut kathuic khou rui duithuak luangc key puni.

²⁶Bw tei neih kumc gaanc puni, kumna neihmik ni kadam chanei gaanc ranv puni, zaeng neih khat khou zaeng chanei rui gaanh kumc gaanc puni. RINGHPOUC kamei rui kamei nunc ta tizamhloumei zamzei guay tei duamlouna tigaylou datmei nungc kiu mi guay hei guang puni.

²⁷RINGHPOUC tuang ngamv khatni kahym duhmei kandih thangc ni how puni. Mai lev maikhou rui kalungpuam lyan e. Kamei rui sa pat pwkhou kalat guay tei mai kumcna chuangc e.

²⁸Ramh katana phungc tatmei duidaih kumc kamei rui kahu khou mpwan ta thouclou the. Hei tei zaatc nunc ta tei hunc kamut kamailou the kumna kaniw tuang simei raeng guay tei swmaan ngamlou the.

²⁹Tiki nangniw Ravguangc mei nunc thu nangniw tuang nthanmei khumngai zingbangc kumc neihlana lu suan puni. RINGHPOUC Isaraelmei ta gaekloumeipu tuang Ravkai nzwanna nlim khwan theilayna kaamcna tat bammei nunc ram neila tei kumc nangniw neihla puni.

³⁰RINGHPOUC rui katuang katik kahym daihmei khwan tei meic kathuicna khou tichulou puni khatni kalungpuam thiu tikahitowlou puni. Khoutei maibwang, chapuakting, nrihthai, khatni ting dui bun kumc bun keymei kazauh guang puni.

³¹Asiriamei nunc tei RINGHPOUC khwan chu pwkhou khatni kamei dandi tiimei thiu tei kahitow pwkhou ping puni.

³²RINGHPOUC rui kaniw ta kathamv bammei lwan tei meic nunc rui khuangh hiwna nrah dow puni. Ravguangc kamei kahak rui Asiriamei ta adow puni.

³³Asiriamei guanghdaihmei ta ntei nimei chakhuanmaipui tei rey khou rui kasiamh luailou tang the. Hei tei nthuk ge khatni daic e, khatni thing rui khuan nsuanglou e. RINGHPOUC mwang khou rui mai mphiu patna mi ta tei raw puni.