Read Rongmei Naga ISAIA 31 Bible Online

ISAIA 31 - Rongmei Naga bible

ISAIA 31

¹Nkhavlou khang Izip thangc tatmei nunc tei mut puni the. Kamei rui daihmei Izipmei tuang rihngam takuanc nunc, takuanh gari pang khatni rihmei nunc khou ngangvlou the. Tiki kaniw tei RINGHPOUC, Isarael tuang nthanmei Racguangc khou thu ngangvlou mak ge khatni nkhavlou khang kakhou sa mak ge.

²Kamei rui taanc bammei tei kamei thay e. Kamei rui sw kamut kamai khang tiguang e. Kamei rui meicsimei nunc ta khatni meicsimei nunc ta nkhav bammei nunc ta dandi tii khang thau puni the.

³Izipmei nunc hei rav hamh e kaniw ni maansei de. Kaniw tuang takuanc nunc ni rav hamh e. RINGHPOUC rui taanvtaanc thau pwkhou tanhmei zaat tei bow key puni khatni kamei rui nkhav bammei nsuanmei zaat tei ni bow puni. Kaney gaanv neimei ta swkamut kamailou puni.

⁴RINGHPOUC rui akhou sa e, “Lauziu gaenghmei nunc rui adihkamv kahahna kaucna bam sini, kamangliangpui ta tei kamei rui swluailou bammei khouringc khou rui alay ganc ngam makmei kumcna Ngamparymei RINGHPOUC ai rui Zaion Chyng ta gaek bammei khou rui ata alay ganc dat nimei ramhkhat na sini maek khe.

⁵Nruayna rui kanac nunc ta gaekna kabow khou dungc nkhwan bammei kumcna Ngamparymei RINGHPOUC ai rui Jerusalem ta gaeklou bam puni.”

⁶RINGHPOUC rui sa e, “Isaraelmei nuncle, nangniw aruc khou paapc taanc the khatni ata liam the. Tiki ntaw thu, akhou guang dat tho!

⁷Daandi khatni kachaekc rui kasiamhloumei paapc tuang ravmaengc guay tei nang mei guayna kaliang ganc nimei ganv guang pw the.

⁸Asiriamei ta rih khou rui swkamut kamailou puni the, tiki hei tei maansei tuang ngamv paan rui hamh e. Asiriamei nunc tei rih bamv khou rui pak puni the, kumna kaniw tuang chabwan nunc ta tei bangh tisw puni the.

⁹Kaniw tuang guanghdaihmei tei pingna pak puni the, khatni kaniw tuang meicdaihmei nunc tei ping langvna rih bamv chuanghphey ganclouna pak puni the.” RINGHPOUC rui sa the Jerusalem khou kalum bammei kakhang khaengmei mai Jerusalem khou chuangcna bammeipu RINGHPOUC rui sa the.