Read Rongmei Naga ISAIA 32 Bible Online

ISAIA 32 - Rongmei Naga bible

ISAIA 32

¹Zauclo! Zaeng neih khat thu nchumhna dih sinmei guangc khatni nchumhna kandih sinmei kaipouc nunc lungc guang puni.

²Kaniw kathuicna tei mpwan khatni pwanzingh khou rui duppuibamv sw puni. Kaniw tei sypungramv khou luangc bammei duithuak guay kumc khatni ramkaengdic khou tautuangc daih swng kumc puni.

³Kaniw mik khatni kaniw nu tei meic nunc tuang kage naimei tei chu khang how khang laanclou bam puni.

⁴Kaniw tei kaniw lung dui bam dat lak khe, tiki kaniw kabah thayna taanc puni khatni kalingmei lat sa puni.

⁵Mpangmei ta meicdaihmei e twna gaanv khat na rui sini sa dat lak khe khatni ramh thay makmei ta chakhwang sw nuhmei e twna kaw dat lak khe.

⁶Mpangmei nunc rui mpangna sa e khatni simei taanv taanh khang kakhanh e. Kataanv khatni kalatsav tei rui Ravguangc zaw sw kasic e, kumna ndaapcmei ta titu mak ge khatni tarimei khang tizangv mak ge.

⁷Ningtyng maekmei ni simei e kumna simei taanv taanc e; kamei saraamhmei lat sana lungcsi lungcroumei ta sw kasic khang sw e kumna kaniw khang swlou nimei zi tei swlou mak khang thingc e.

⁸Tiki kalung daihmei nunc tei rui lungning nthanna taanc e khatni nchumhmei khang ntipna ding e.

⁹He amanvna ramh ningtow makna lungc bammeipui nunc, ai rui sa bammei hei nking o.

¹⁰Nangniw ntaw thu tu padik zangv padikna bam nuh e, tiki nkun hei kumhmei ganv khou thu nangniw kadunh puni the kalam thu drakhathai lw dat khang nai dat lak khe.

¹¹Nangniw amanvna ramh ningtow makna lungc kan the; tiki ntaw thu ping kadan tho! Nangniw tuang pheybaan luak gancna pheyraan nsuay tho.

¹²Nangniw lung kabiuna nangniw ngaengv hiw tho, kalam thu kandih gaymei laupuk guay khatni drakhalau guay tei sw kasic ngam the,

¹³Kumna amei nunc tuang ramv khou sauhraengh thau padik the. Meic nunc neihlana bammei kai guay khatni neihla zaenggayna bammei kaidai khang tei kap tho.

¹⁴Guanghkai tei nganvna ganclou puni the khatni kaguangc kaidai tei ganc ringh ruih ruilou puni the. Kai guay khatni mi guay tei gaek bammei rihmei nunc bamv guay tei tingsaeng swkamut kamaina ganclou puni the. Nwmbangc kuanniam nunc khou tei ruan bam puni, khatni lauziu nunc khou tei kataek mpac bam puni.

¹⁵Ravguangc rui kabumaengc aniu khou tiguang dat puni. Tazikramv tei kandih gaymei ramv sw dat puni, kumna laupuk guay khou nap-bi nthuih dat puni.

¹⁶Mi kandic kabamv kathuicna khou nchumhmei khatni nchumh nzihmei taanc dat puni.

¹⁷Meic kathuicna nchumhmei taancna lungc pwkhou, nchu-nzaenghmei khatni kadan makna lunghmei tingsaengzaeng nai dat puni.

¹⁸Ravguangc mei nunc lunghgeih kadanmei nai dat lak khe, kumna kaniw kaikhunc guay tei nchu-nzaenghna pingmei maekna lungc bam puni.

¹⁹(Tiki nwmbangc khou nrihthai key puni, kumna kaidai tei swra key puni.)

²⁰Nap-bi khang dui gaat makna khatni kabamv kathuicna khou kuanniam nunc khatni kiruai guay khang giuga makmei bynbamv naina meic kathuicna neihla bam puni the.