Read Rongmei Naga ISAIA 33 Bible Online

ISAIA 33 - Rongmei Naga bible

ISAIA 33

¹Aniu ta swkamut kamai khang swbammei nunc tei ryanra zaengsi e dav! Kaniw meic khat na rui sini kwamlaa mak sini khatni kaniw ta guattu mak sini kaniw thu kwamlaa the khatni guattu the. Kaniw rui kwamlaa bammei khatni guattu bammei ganv tei luai kan puni the kumna kaniw tuang kwamlaa dat puni the khatni kaniw ta guattu dat puni the.

²He RINGHPOUC, aniw ta zauc nzianlou o. Aniw nang khou lwm e. Aniw ta tingmik kathuic gaeklou o kumna aniw ta ryanramei ganv khou kanlou o.

³Nang tuang tingthinc ganh key kumhmei khwan khou tei meic nunc pak ge, nang thau pwkhou zaatc nunc pak phak ngam kan the.

⁴Kaniw tuang puat guay ruc khou tei meic nunc tei kachuamh kachuamhna hei tei laa the.

⁵RINGHPOUC hei adih daic cho! Kamei ramh katana ruc khou kaipouc swna sin bam e. Kamei rui Jerusalem khou nchumhmei khatni nchumh nzihmei tipadiklou puni

⁶kumna kakandic tei sw ntiplou puni. Kamei rui kamei nunc ta gaek tanh tan bam e khatni kaniw khou ningting takh tiilou e. Kaniw tuang lanvdaih kiu kaniw rui RINGHPOUC ta ngamziw swmei hei e.

⁷Tancbauhmei nunc ni nkhavlou khang kaucna bam e. Nchu-nzaenghmei phungc guang khang sw bammei dihkhyn nunc ni kap ranv sihna kap bam e.

⁸Chaengdai guay tei meic tat dat bauh makna meic maek khe. Champanv chamgay swmei latdyng guay ni sw bak ngam the. Meic gaanv khat na ta sini chakhwang swlou dat mak khe.

⁹Kandih tei sinswmei maekna ganclou the Lebanon tuang ngouc guay theic ngam the, kandih gaymei Sharon nzaengc tei tazikramv kumc the, Bashan khatni Karmel Chyng khou thingnuy guay tang ngam the.

¹⁰RINGHPOUC rui zaatc nunc khou sa e, “Ntaw ai taanvtaanc puni the. Ai adihkamv baantan nai cho twmei ai rui lyanlou puni.

¹¹Nangniw gaeng makmei raeng raengc bam e kumna nangniw rui taanhmei taanv kaguayna hei nsa de. Atuang bumaengc hei nangniw ta swkamut kamai khang mai kumhmei tuang e.

¹²Nangniw hei ntauh ta chaniu ntei mbaih kumc, sauhraengh ta mai ntei kumc pangv key puni the.

¹³Duh khou ana khou bammei meic kathuicna rui ai rui taancloumei ta chu kan diu kumna angamv thay kan diu.”

¹⁴Zaionmei paapcmei nunc tei ping kadunhna bam the. Kaniw rui sa e, “Ravguangc tuang latzan hei thu tingsaengzaeng chuangc bammei mai kumhmei tuang e. Hei kumhmei mai khou tei ringc ngam nimei thow naina cho?”

¹⁵Nangniw nchumhmei lat sana khatni nchumhmei taancna lungc e thei nangniw ringc ngam puni. Lungcsimei nunc ta guat khang nangniw pumtan sinsw riu khatni lanvbiwmei laa rio. Meicdow khang hamh e thei baihmei simei taanv taanh khang raengc bammei pang khou tei kazauh riu.

¹⁶Kum e tw e thei nangniw kadan khang maek khe; nangniw tanhmei rih raengh lungc khou bam kumc giuga dat khang maek khe. Nangniw tu khang zangv khang nai puni the.

¹⁷Guangh tei katik kahym daicna mi kandih ti hei sinna bammei ta nangniw how puni, Kaguanghdic duh duh thangc nganv baengc tangc bammei ta how puni.

¹⁸Nangniw reynungc rui pingna bammei dihkhav laamei nunc khatni gwanrummei nunc tei ningtow bammei pary na sw puni the.

¹⁹Nangniw thay makmei lat samei daic tuh tumei gin nunc ta tei nangniw how dat pw lak khe.

²⁰Zaion, aniu tuang ravriak khumngai ngaymei bamv ta tei zauc lo! Jerusalem ta zauc lo! Mi hei adih giuga makna lungc nuhpui bamv cho! Mi hei kalung dat zat makmei, katiangh sat pat zat makmei, khatni kariang tap dat zat makmei pheykai kumc e.

²¹RINGHPOUC rui kahym aniu khou lyanlou puni. Aniu duithuak daihmei khatni duithuak guay daeng khou lungc puni, tiki zauhzihmei nunc tuang rungc guay thu mi guay khou tei chau tat bam lak ge.

²²RINGHPOUC hei aniu tuang latzanpouc e, RINGHPOUC hei aniu khang riakdanv tiimeipu e, RINGHPOUC hei aniu guangc e, kamei kahak rui aniu ta gulou puni.

²³Mi rungc guay khou kana katinghlou bammei guay tei nsa de; rungh phey guay tei ntyng pat mak ge! Zauczihmei rihmei nunc tuang lanv guay tei aniu rui asut puni, kumna hei tei heidikamv geicna katan baumei nganvna kadam laa puni the.

²⁴Zaion khou lungc bammei gaanv khat na rui sini sucnu naunianmei nai dat lak khe, khatni paapc kaguayna kuaklou puni the.