Read Rongmei Naga ISAIA 34 Bible Online

ISAIA 34 - Rongmei Naga bible

ISAIA 34

¹Guang tho, zaatc kapwmna! Guang kaduaina nking o. Kandih khou lungc bammei kaguayna nking khang guang tho.

²RINGHPOUC rui zaatc kapwmna ta khatni kaniw tuang ricmei nunc ta lungpuamh the. Kamei rui kaniw ta swkamut kamailou puni the.

³Kaniw tuang phouh guay tei mbeihlou dat ni tuang hamh the, mi guay tei taamc rumhna ganclou puni the; kumna chyngbut guay tei zei rui luangckey puni the.

⁴Neihmik, bw, khatni gaanchuangcna guay mbut mbaih puni the. Latrikzy kazih kumc tingpuk hei ni amaan kan ni the, khatni gaanchuangcna guay ni drakhanuy tangmei kumc, tadutnuy tangmei kumc taek key puni the.

⁵RINGHPOUC tingkauh thangc katuang baengsaeng chamdaanv bam the, ntaw kamei rui swkamut kamai khang ganc patloumei Edommei ti hei hei tei rui dow key puni the.

⁶Ravkhaengmei lauziu khatni ziuh zei rui khatni kathav rui thuap liammei kumcna katuang baengsaeng tei kaniw zei khatni kaniw thav rui thuap liam puni the. RINGHPOUC rui Bozra kaidai khou khaeng puni the, kamei rui dow luai dai dow luaimei tei Edom kandic khou sw puni the.

⁷Meic nunc tei nwmbangc guaituamchic nunc kumc khatni guaituamchic launa nunc kumc bow key puni the, kumna kandih hei zei rui khatni kathav rui padik puni the.

⁸Mi ganv hei RINGHPOUC rui Zaion ta kanlou nimei khatni kata zauczihmei nunc ta khwm khangc nimei ganv kiu the.

⁹Edommei tuang duithuak guay tei khidui guanh puni the khatni kaniw tuang taniang tei maipu guanh puni the. Mi kandic kapwm tei khidui kumc chuangc puni the.

¹⁰Hei tei zingbangc kalaanv chuangcna bam puni, kumna mi khou tei rui tingsaengzaeng maikhou kuna bam puni. Mi kandic tei meickin meickin nsa ganclou bam puni, kumna mi khou tei meic gaanv khat na sini tat ruanlou dat lak khe.

¹¹Mouc nthyammei khatni zouckuangh bamv sw puni the. Pwanmangh khatni agaekc nunc rui hei tei kaniw bamv sw puni the. RINGHPOUC rui hei tei kandih damh makmei hu khou nai bammei kumc nsaramv tiswlou puni the.

¹²Mi kandic tei sin khang guangh nai dat ni tuang hamh the, khatni kapy swmei guay theic ngam kan ni the.

¹³Kabamv kathuicna khou khatni raengh raengloumei kaidai guayna khou sauhraengh thau padik puni the kumna asacsi khatni puanmangh nunc khou tei kaniw bamv sw puni the.

¹⁴Nwmbangc khouringc nunc hei khou tei ruan bam puni the khatni ravsic nunc khat khat ta kaucna bam puni the. Zingbangc ravsicpui nthaekcloumei bamv phuna khou tei guang puni the.

¹⁵Pwanmangh nunc khou tei kaniw bou duanclouna, kaduy nduihlouna, kanac kak patlouna khou tei makuat bam puni the. Khoutei langdia nunc kakui kaduic guang kaduaina bam puni the.

¹⁶RINGHPOUC tuang ringhmei khouringc nunc tuang latrikzy khou tei phu zauc o, kumna mi khou tei sa bammei tei pac zauc o. Mi khouringc nunc tei akhat na sini amaan lak ge, khatni akhat na sini nowpu maek tuang nai lak ge. Heikum diu khang RINGHPOUC rui latdanv tii kan the, kumna kamei rui mi guay tei khuam guang kaduailou puni.

¹⁷Kumna RINGHPOUC rui mi kandic tei kaniw khang nzanhlou puni kumna kaniw kathuicna khang kadam akhat akhat nai puni. Kaniw mi kandic khou tei meickin meickin lungc bam puni, kumna hei tei tingsaengzaeng kaniw tuang sw puni.