Read Rongmei Naga ISAIA 35 Bible Online

ISAIA 35 - Rongmei Naga bible

ISAIA 35

¹Sypungramv neihla puni, sypungramv khou mwn puangc puni.

²Sypungramv tei neihlana lu suan puni khatni kauc puni; Karmel khatni Sharon ramvpuk kumc kandih gay puni. Meic kathuicna RINGHPOUC tikgunc how puni, kahym khatni kangamv how puni.

³Suanmei baanc khou pumtan titanclou e, suanna kadunh bammei khubut titanclou e.

⁴Pingna bammei nunc khou tei kumna sa o, “Tanc o kumna ping riu! Nangniw ta kanlou khang Ravguangc guang e, nangniw ta zauczihmei nunc ta khwm khangh khang guang e.”

⁵Miktiatmei rui how puni, nu ndymei rui chu puni.

⁶Katan baumei rui asanh launa kumcna kachakna alaamh puni, lat sa thay makmei rui neihlana kauc puni. Sypungramv khou duithuak pang luangc puni;

⁷mai kumc bammei sypung pang tei zeih guanh puni, ramvkiang tei duipuakkai rui padik puni. Asacsi nunc bamv sw bammei bamv tei duizaengc ntou rui thau padik puni.

⁸Hei khou tei chaengdai nai puni, hei tei “Nthanmei Chaengdai,” twna kaw puni. Paapcmei gaanv khat na sini mi chaeng khou tei tat zat ni tuang hamh e; mi khou tei tatmei nunc ta tei mpangmei gaanv khat na rui sini chaengzay mbiangh ni tuang hamh e.

⁹Khoutei kamangliangpui nai dat lak khe; meic pingmei khouringc mi chaeng khou tei luic bam lak ge. RINGHPOUC rui kanpatloumei nunc tei mi chaeng tei rui kai nzwan guang puni.

¹⁰Kaniw neihlana Jerusalem tangc puni, neihlana kaucna suanna tangc puni. Kaniw tingsaengzaeng neihla bam puni, tingsaengzaeng ryanra zaengsimei nai dat lak khe.