Read Rongmei Naga ISAIA 36 Bible Online

ISAIA 36 - Rongmei Naga bible

ISAIA 36

¹Hezekia rui Judamei guangc swmei tuang 14mei kwm Asiria tuang guanghdaihmei Sennakerib rui Juda tuang raengh raengloumei kaidai guay ta adowna mi guay tei laa kan the.

²Khoutei kamei rui katuang rihpy daihmei ta rihmei kangdai nduanghna Guangh Hezekia ta gutlou la tho twna sa khang Lakis khou rui Jerusalem thangc tat khang latdanv pat the. Pheysoumei nunc tuang chaeng khou naimei, zeih karuc thangc rui zay keymei duiriang daeng khou mi ricpy tei ding bam khou,

³Judamei gaanv thumh kata ariw khang pat khwan e. Mi nunc kiu thu guangh kai khou kapouc karaamc swmei meicdaihmei Hilkia nac mpouh Eliakim; guangh tuang latrik hymei Shebna, khatni dihchakh sinmeipu Asap rui puanhmei Joa hei nunc hei the.

⁴Guangh Hezekia rui heidi kadu daicna bammei hei tabui khou lwmgay bam lana cho twmei guanghdaihmei rui thay nii e twna Asiriamei meicdaihmei tei rui sa the.

⁵Kamei rui sa the, “Rihmei nunc kazauh makna lat na rui rih ngam diu e twna nangniw ningna cho? Asiriamei ta athwng khang nangniw ningna cho?

⁶Nangniw ta Izipmei rui nkhavlou pwng e twna nangniw ning e, tiki hei tei ntou builwang ntunghmei kumc tuang de hei tei ntungh bakna nangniw baanc zamh puni. Izipmei guangc khou ngangvloumei kathuicna khou hei tei kumna pat kanmei tuang the.”

⁷Asiriamei meicdaihmeipu tei rui heikumna sa key dat re, “RINGHPOUC nangniw Racguangc khou nangniw ngangvlou e twna nangniw sa nina cho? Judamei lev Jerusalemmei ta ravchabamv akhat na khou kalum nina de twna Hezekia rui RINGHPOUC tuang Ravkai guay khatni ravchapaeng guay sw kasic kan tu hamhna cho?

⁸Ai rui guanghdaihmei zanc khou rui mi hei ndynna sa puni the. Nangniw rui takuanh 2000 tuangh khang maansei nai diu e thei ai rui nangniw khang takuanh 2000 tii puni.

⁹Nangniw rui Izipmei takuanh gari khatni takuanh ricmei thouc guang pw khang lwmna bam sini nangniw hei Asiriamei tuang nthyam liangmei rihpy na ta sini dingda ngam lak ge.

¹⁰RINGHPOUC rui nkhavlou makna ai rui nangniw ta adowna nangniw kandic swkamut kamailou the twna nangniw ning buna cho? RINGHPOUC rui mi kandic ti hei sw kasic o twna akhou samei tuang de.”

¹¹Khoutei Eliakim, Shebna, khatni Joa rui Rabshake khou tei sa the, “Aramianmei lat rui aniw khou sa o. Mi lat tei aniw thay de. Ibrimei lat sa riu; raengh khou bammei guay hei nkingna bam e.”

¹²Kamei rui kumna daw e, “Mi guay hei guangh lev nangniw khou na sa o twna guanghdaihmei rui ata thouc guangmei tuang e twna nangniw ningna cho? Ai rui sa bammei hei raengh khou dungc bammei nunc, nangniw kumcna kaniw bav tu nimei khatni kaniw zwn zangv nimei nunc khou ni sa bammei tuang e.”

¹³Hei khou tei mipu tei ding thauna Ibrimei lat khou rui kumna kauc the, “Guanghdaihmei Asiriamei guangc rui nangniw khou samei hei nking o.

¹⁴Hezekia rui nangniw ta guat mak khang ramh thay lo twna kamei rui sa e. Hezekia rui nangniw ta kanlou ngam ni tuang hamh e.

¹⁵RINGHPOUC khou lwmlou khang kamei rui sa bammei tei nangniw lwmlou riu. RINGHPOUC rui nangniw ta kanlou puni kumna Asiriamei ta nangniw tuang kaidai tilai ni tuang hamh e twmei kakhanh rio.

¹⁶Hezekia lat tei nkinglou riu; kalam thu Asiriamei guanghdaihmei rui heikumna sa e: nangniw patna nchu-nzaengh khang akhou guat sw tho, kum e thei nangniw meic kaguayna katuang katuang drakha bang khou rui kathai tu puni, tadut bang khou rui kathai tu puni kumlana katuang katuang duikhunc khou rui dui zangv bam puni;

¹⁷guanghdaihmei rui guangna nangniw ta nangniw kandic na rapmei nap-bi, drakhadui, taektw khatni drakhalau rui padikmei kandic thangc phungc tat mak saanv lungc bam khang e.

¹⁸RINGHPOUC rui nangniw ta kanlou puni de twna Hezekia rui nangniw khou sa bammei lat tei rui nangniw ta tiguat riu. Zaatc baihmei nunc tuang rav nunc rui kaniw kandic ta Asiriamei guanghdaihmei baanc khou rui kanlou kanmei tuang naina cho?

¹⁹Hamat khatni Arpad tuang rav nunc tei tabui thangc tat kan tha? Sepharvaim tuang rav nunc tei tabui thangc tha? Thow rui Samaria ta kanlouna cho?

²⁰Mi kandic guay tuang rav nunc rui kaniw kandic ta aniw tuang guanghdaihmei baanc khou rui kanloumei tuang naina cho? Kum e tw e thei RINGHPOUC rui Jerusalem ta kanlou puni twna tabui zaeng rui ning bam tu cho?”

²¹Guangh Hezekia rui saloumei kumcna kaniw reih reina bam the; kaniw lat akhat na sini sa mak khe.

²²Khoutei Eliakim, Shebna, khatni Joa kaniw lungh kabiu langvna kaniw phey siatkaekna Asiriamei Rabshake, meicdaihmeipu rui samei tei guangh khou poulou the.