Read Rongmei Naga ISAIA 37 Bible Online

ISAIA 37 - Rongmei Naga bible

ISAIA 37

¹Guangh Hezekia rui kaniw tuang lat tei chupui lev, kalung kabiuna kaphey siatkaekna, khamseiphey baanvna, RINGHPOUC tuang Ravkai thangc tat kan the.

²Kamei rui guangh kai khou kathouc swmei Eliakim, Shebna, khatni amuh gaanvthaihmei nunc ta muhzwng Isaia, Amoz nac mpouh daeng khou thouc guang the. Kaniw ni khamseiphey baanv the.

³Isaia khou sa o twna guangh rui kadyloumei lat kiu mi hei e: “Aseic hei ryanramei tingmik ge; aniu ta riaplou the khatni aniu hei zak the. Aniu hei nahbam nimeipui kumc bam the, tiki sangc pat khang pumtan maek khe.

⁴Asiriamei guanghdaihmei rui ringhmei Racguangc zaw tisi khang katuang taanv phunghmei daic liangmei ta thouc guang the. Mi tizak bammei lat guay hei RINGHPOUC nang Racguangc rui chulouna mi lat sa bammei nunc ti hei dandi tiilou pw diu. Ringc bam duhmei aniu mei nunc khang hei Ravguangc khou huayneylou o.”

⁵Guangh Hezekia rui tii guangmei lat tei Isaia rui chu lana,

⁶kamei rui heikumna daw guang dat the: “RINGHPOUC rui nangniw ta kanlou ngam ni tuang hamh e twna Asiriamei rui mpin bammei tei nangniw ping riu.

⁷RINGHPOUC rui mi guanghdaihmei khou ramhchamv akhat tichulouna hei tei rui kata kakandih thangc tingalanclou dat puni kumna RINGHPOUC rui kata kakandic thangc tei swluai puni.”

⁸Guanghdaihmei tei Lakis mpatlouna Libna daeng khou naimei kaidai ta adow bam e twmei Asiriamei kapypu tei rui chu lana, kata kachuc khang kamei mi thangc tei tat the.

⁹Izipmei ricmei nunc, Sudanmei Guangc Tirhaka rui nduanghna kaniw ta adow khang guang the twmei Asiriamei nunc khou chu guang the. Guanghdaihmei tei rui hei tei chu pwkhou, kamei rui guangh Hezekia khou tatdyn akhat tiguang the.

¹⁰Kamei rui heikumna sa the, “Nangniw abaanc khou keylou ni tuang hamh e twna nangniw rui lwm bammei rav rui nangniw khou samei tei rui nangniw ta tiguat la rio.

¹¹Asiriamei guanghdaihmei kamei rui sw kasic ni twna ninglou kanmei tei nang chu the. Nang duak ngam puni de twna nang ningna cho?

¹²Aniu pupouc nunc rui Gozan, Haran, khatni Rezep kaidai guay swkamut kamailou the, khatni Telassar khou bammei Bethedenmei nunc ta swluai the. Hei khou tei kaniw tuang rav akhat na rui sini kaniw ta kanlou ngam kan mak ge.

¹³Hamat, Arpad, Sepharvaim, Hena, khatni Ivva kaidai tuang guangc nunc tei tabui thangc tat kan tha?”

¹⁴Guangh Hezekia rui chamv phunghmei nunc khou tei rui tatdyn tei laana pac the. Hei khou tei kamei Ravkai thangc tat lana tatdyn tei RINGHPOUC mav khou lamclouna

¹⁵kumna huayney the,

¹⁶“He Ngamparymei RINGHPOUC, Isaraelmei Ravguangc, kerubim nunc ruc khou kaguangc bamvpaeng ruc khou dungc bammeipu, nang na hei Ravguangc e, kandih guangcdic kapwm ta sinna bammeipu e. Nang rui tingpuk kandih damclou e. Ringcna bammei Ravguangc nang ta tizak khang Sennakerip rui sa bammei lat guay hei chulou o.

¹⁷He RINGHPOUC, ntaw hei aniw rui ney bammei chulou o. Kumna aniw khou guanglouna bammei hei zauclou o. Ringcna bammei Ravguangc nang ta tizak khang Sennakerip rui sa bammei lat guay hei chulou o.

¹⁸He RINGHPOUC, Asiriamei guanghdaihmei rui zaatc mpeyna ta swkamut kamailou the, kaniw kandic guay sw kasic karouclou the,

¹⁹kaniw tuang rav nunc maansei baanc rui thing rui, thing ntauh rui, kasiamhmei maengc guay tei ni mai ntei ngam the twmei aniw chu the.

²⁰Kandihmei zaatc guayna rui nang na hei Ravguangc e twmei thay diu khang, he RINGHPOUC, aniw Racguangc, aniw ta Asiriamei nunc khou rui kanlou o.”

²¹Khoutei Isaia rui Guangh Hezekia khou guangh rui huayneymei tei dawloumei lat tei tiguang the.

²²RINGHPOUC rui heikumna sa e, “Sennakerib, Jerusalem rui nang ta malana nuic the.

²³Nang thow ta tizak bam tw e khatni sinnui bam tw e twmei ningna cho? Nang rui Isaraelmei Racguangc ata chakhwang sw mak khe.

²⁴Nang rui nang bangc nunc ta thouc guangna nang tuang takuanh gari guay rui Lebanon tuang kauh liangmei chyngbut guay ta ngam the twna akhou gaengh sw bam e. Khoutei nang rui kauh liangmei sidar bang guay khatni gay liangmei saipres bang guay dow bau key the, khatni nangniw ngouh nthuk liangmei lungc khou nganvna gut tangc the twna gaengh sw bam e.

²⁵Nangniw rui ginramc khou duikhunc chauna dui zangv the, khatni nangniw tuang ricmei nunc rui Nail duithuak katuan thiplou the twna nang gaengh sw the.

²⁶“Mi guay hei taanh khang ai rui raengclou tang the twmei nang chu mak hena cho? Hei tei ai ntaw taanc patmei tuang e. Raengh raengloumei kaidai guay swpangv key khang ai rui nang khou ngamv tiilou the.

²⁷Mi kaidai guay khou lungc bammei nunc tei pumtan maek khe; kaniw tei ping ndy ngam the. Kaniw tei laupuk khou hamh e thei kainam khou thau bammei puc bwan khou suhmei neihpat pwan aliu guang kumc the.

²⁸“Tiki nang lam khou ai thay ngam de, nang tabui thangc tat bam cho khatni nang tabui taanc bam cho twmei ai thay e. Nang rui nang reic patna aruc khou sw bammei guay tei ni thay e.

²⁹Nang reic patna bammei chamv tei khatni nang gaengh swna bammei chamv tei ai chu the. Ntaw thu ai rui nangniw nukwang khou khavkhuay goulouna khatni nangniw mwang khou mwangkhap khaplouna nangniw rui guangmei chaeng tei zay hanc dat puni the.”

³⁰Khoutei Isaia rui Guangh Hezekia khou sa the, “Guang pw nimei tuang ndanhmei kiu mi hei the. Aseic kwm lev nkun thu karana thaumei phunling nangniw tu puni, tiki kunluai thu nangniw nap-bi lingc keyna kathai laa tu puni the, khatni drakhaluai lingc keyna kathai laa tu puni the,

³¹Juda khou theic nsaekcloumei nunc tei thu thingbang kamaan zangc nthuk keyna kathai nthaimei bang kumc puni the.

³²Theic nsaekcloupuimei Jerusalem khou khatni Zaion Chyng khou nai puni, kalam thu Ngamparymei RINGHPOUC rui mi hei pat khang dinglou the.

³³“Asiriamei guanghdaihmei lam khou RINGHPOUC rui kumna sa e: ‘Kamei mi kaidai khou hei gut ni tuang hamh e khatni mi kaidai ti hei pailu akhat na sini kaap patlou ni tuang hamh e. Rihmei gaanv khat na sini nggih phungcna mi kaidai daeng khou guang ni tuang hamh e, mi tuang kaidai ti hei dingbin ni tuang hamh e.

³⁴Mi kaidai khou hei gutlou makna kamei guangmei chaeng tei kamei ngalanc dat puni. RINGHPOUC ai rui mi hei sa kan the.

³⁵Azanc khang rui khatni ai rui abangc David khou swlou kanmei latdyng zaeng khang rui ai rui mi kaidai ta gaeklou puni.’ ”

³⁶RINGHPOUC tuang baanchara akhat Asiriamei tuang ricmei nunc zypui khou guangna rihmei 1,85,000 ta swluai the. Nthuanh tinggaanc pat pwki kaniw guayna tei theic ngam bam khwan the!

³⁷Khoutei Asiriamei guanghdaihmei Sennakerib Nineve thangc hanc dat kan the.

³⁸Zaeng neih khat kamei katuang rav Nisrok tuang ravkai khou kalum bam khou kanac mpouh gaanv nei Adrammelek khatni Sarezer rui baengsaeng rui kata dowluai the kumna kaney tei Ararat kandic thangc pak tat kan the. Kanac mpouh baihmei gaanv khat Esarhaddon twmeipu rui kaphaan guanghdaihmei sw dat lyn the.