Read Rongmei Naga ISAIA 38 Bible Online

ISAIA 38 - Rongmei Naga bible

ISAIA 38

¹Mi ganv khou tei Guangh Hezekia theic ni kumcna nnau the. Muhzwng, Isaia Amoz nac mpouh rui kata guang zaucna kakhou heikumna sa the, “Nang gay dat ni tuang hamh the kumhpui zaeng rui ramh guayna nzang ndiaulou tho, theih khang chamdaanv tho twna RINGHPOUC rui nang khou sa the.”

²Hezekia ngaengsaengc biak thangc namthei karih patna kumna kalum the:

³“RINGHPOUC, ai rui lwm nuhmei swna lungc guangmei khatni nzianna nang siamruai sw guangmei, khatni nang rui ningmei tei na taanh khang karamc bammei kaguayna hei ningtowlou o.” Kumna kamei kap ranv sihna kap the.

⁴Mi tangv RINGHPOUC rui Isaia khou lat sa guang the;

⁵Tat datna Hezekia khou tei kumna sa o, nang pu nangpouc David tuang RINGHPOUC Ravguangh rui sa e: “Zauc lo! Nang rui huayneymei tei ai rui chulou the khatni nang mikdui tei how the. Ai rui nang panty khang tingkwm 15 zaysaengcpatlou dat kan the.

⁶Ai rui nang ta khatni Jerusalem kaidai ta Asiriamei guanghdaihmei baanc khou rui kanlou puni the, kumna ai rui mi kaidai ti hei gaeklou bam puni the.”

⁷Isaia rui daw e, “RINGHPOUC kamei rui kalatdyng suai makna taanclou puni twmei tuang madanhmei akhat tiilou puni.

⁸Guangh Ahaz rui kasiamhloumei kailaak khou tei RINGHPOUC rui neihlim tei kaamv ruh thei biak thangc tihanc puni.” Kumna neihlim tei thei biak thangc kaamv ruh hanc pat the.

⁹Hezekia kamei nnaumei khou rui gay pat datmei tangv, kamei mi thuanhmei lu hei phuak the:

¹⁰Apanty karin khou ai taruaih key pwng the, ai ringc dat pw lak khe twna ning khwan e.

¹¹Ai mi kandic khou hei RINGHPOUC ta ni maansei ta ni how dat pw lak khe twna ning khwan e.

¹²Lauziu gaenghmei rui pheykai lai key kumc khatni pheyzy kazih gut kumc apanty hei dan taplou khwan the kumna luai key khwan the. Ravguangc rui apanty timutlou bu the twna ninglou khwan e.

¹³Suhmei rui ai zingbangc kauc gaanc the, kamangliangpui rui arou nkiakc tikumc the. Ravguangc rui apanty tiluai nina khwan the twna ninglou khwan e.

¹⁴Akhwan pat ngam mak khwan the, akhouhna khwan kumc khwan the. Tingkauh thangc zaucna amik nnang guang the. He Kaipouc, mi ryanra guay khou rui kanlou o.

¹⁵Ai rui tabui sa ngam ni? Mi hei RINGHPOUC rui taancloumei tuang de. Alung kabiu the, kumna ai zip ngam mak khe.

¹⁶He RINGHPOUC, ai nang khang na lungclou ni; ata tigaylou o khatni tiringclou o.

¹⁷Alung kabiumei tei nchu-nzaenghmei guanh dat puni. Nang rui apanty hei theic sucnumei khou rui kanlou e; nang rui apaap guay kuaklou o.

¹⁸Taruaih khou meic gaanv khat na rui sini nang ta thuanh mak ge, theihmei rui ni nang khou lwmlou dat mak ge.

¹⁹Ringhmei rui nang ta thuanhmei tuang de, ai rui ntaw nang ta thuanhmei kumcna, nang hei adih lwmnuhmei cho twna pu nunc rui kaniw nac nunc khou raclou e.

²⁰He RINGHPOUC, nang rui ata tigaylou the. Aniw nrah downa nang ta thuancna suan ni, aniw rui ringcna bam saanv nang tuang Ravkai khou thuancna suan bam ni.

²¹[2] Ntaw thu Isaia rui sa the, “Asuh tei gay dat khang rui suhzam khou tei tadut thaihuai teylou ti tho”

²²Hezekia rui ni sa dat khwan e, “Ai rui RINGHPOUC tuang Ravkai thangc nganghdat ngam nimei tuang madanhmei tuang hei tabui tei cho?”