Read Rongmei Naga ISAIA 40 Bible Online

ISAIA 40 - Rongmei Naga bible

ISAIA 40

¹Ravguangc rui sa e, “Amei nunc ta swmlou o, kaniw ta swmlou o!

²Jerusalemmei nunc khou niamhna salou o. Kaniw ryanra saengc kan the ntaw thu kaniw paap kuaklou kan the twna kaniw khou salou tio. Kaniw tuang paap khang rui riap biuhmei tei riaplou kan the.”

³Khwan akhat kumna kauc pat re, “RINGHPOUC khang tazikramv khou chaeng kasiamhlou o! Aniu Racguangc khang tazikramv khou chaeng sw nthan o!

⁴Nzaengc baek guay thwan padik tho; chyngbut guay swkazaengh key tho. Chyngramv guay tei nzaengc guanh puni the, khatni kabaek kabouc guay tei kasiamh ntyng dynglou puni the.

⁵Hei khou kiu RINGHPOUC tuang hym ndauh pat puni the, mi kiu maansei zaatc guayna rui how puni the. Mi hei RINGHPOUC kahak rui nrianhloumei latdyng the.”

⁶Khwan akhat kumna kauc pat re, “Latchamv akhat kauc pat ro!” “Tabui latchamv ai kauc pat ro twna cho?” twna ai rui thanv e. “Maansei hei pucbwan na kumh tuang de; kaniw panty hei nwmbangc mwnpwang na kumh tuang de.

⁷RINGHPOUC rui thouc patmei pwan tei aliu guang pwkhou, pucbwan guay tei theic e, mwnpwang ni tuai e. Maansei hei pucbwan na kumhmei tuang de.

⁸Ngguay, pucbwan guay theic e, mwnpwang ni tuai e, tiki RINGHPOUC tuang lat thu tingsaengzaeng nai bam e. Mi lat hei kauc pat tho.”

⁹He Jerusalem, chyng kauhmei ruc khou kuna gaychamv hei kauc pat tho! He Zaion, gaychamv tei kauc ranvna kauc pat tho, sa pat tho, ping dat ri tho. Juda tuang kaidai guay khou dinclou ti tho kaniw tuang Racguangc guang pw the twna!

¹⁰Kauh Liangmei Ravguangc ngamv padikna dih sin khang guang the, kamei rui kanpatloumei nunc ta kamei nduanghna guang the.

¹¹Kamei rui kalauziu nunc ta kadanna swlou puni; kamei rui lauziunac guay ta khuam kaduaina puanc thaulou puni; kamei rui kakui guay ta nzaengna gaengclou puni.

¹²Thow rui duipui ta kabaanc kiw khou ndath ngam nina cho khatni tingpuk ta kakw rui ndat ngam nina cho? Thow rui kandih taniang ta haandat khou ndath ngam nina cho khatni chyngbut ta duh khou nthau ngam nina cho?

¹³Thow rui RINGHPOUC ta thouc ngam nina cho khatni thow rui kata nchamc ngam nina cho?

¹⁴RINGHPOUC kamei rui ramh thay makna dinclou khang thow khou thanv buna cho, khatni thow rui kakhou nchumhmei chaeng dinclou buna cho? Thow rui kakhou ningting takh nchamlouna cho?

¹⁵RINGHPOUC khang zaatc nunc hei ramhkhat na sini hamh e, duithw akhat na kumh tuang de; duh thangc naimei pukakdic guay tei taniangthw rith na kumh tuang de.

¹⁶Lebanon ngouc khou naimei khouringh kaguayna hei sini aniu Racguangc khang kat khang biuh mak ge, mi tuang thing guay tei rui ni raw biuh lak ge.

¹⁷Kakhou zaatc nunc hei ramhkhat na sini hamh e.

¹⁸Ravguangc hei thow lev kida nuhna cho? Kamei hei tabui kumc e twna sa nuh cho?

¹⁹Kamei hei maansei baanc rui kasiamhmei kachaekcdui luplouna daandi tuang bamv khou tidinglou bammei ravmaengc tei kumhmei hamh e.

²⁰Daandi kachaekc rui swbow lakmei nunc rui raam dat lakmei thing rui sw e. Kalung lakmei maengc tei kasiamh khang baanh thaymei ta phuna tikasiamh e.

²¹Nangniw thay makna cho? Kandih hei akumhna kahouh kan tu cho twmei nangniw chu mak gena cho? Nangniw khou rei khou rui hei tei raclou makna cho?

²²Mi hei tingpuk kandih ruc khou kaguangc bamvpaeng khou dungc bammeipu rui damcloumei tuang e; kandih khou lungc bammei nunc hei ntiang na kumcna howlou e. Kamei rui tingpuk ta khamthinghphey katingh kumc katingh pat the, lungh khang pheykai katingh pat kumcna katingh pat the.

²³Kangamv naimei guangh nunc ta kamei rui kathangv key the kumna kaniw ta ramhkhat na sini hamhmei tiswlou the.

²⁴Kaniw hei ramhbwan na kumhmei tuang e, kabwan thau patna kamaan sini zangc key nangh makmei bwan kumh tuang e. RINGHPOUC rui mpwan thouc guang pwkhou, mi guay tei kangcna napgou ta kumc mpwan rui aliu ganc the.

²⁵Nthanmei Racguangc ti hei thow lev kida nina cho? Kamei kumhmei baihmei naina cho?

²⁶Tingpuk thangc zauc ku zauc o! Gaanchuangcna guay hei thow rui damclou tu cho? Rihmei nunc ta kumc mi guay ti hei chaengzay tat bammeipu, mi guay sing tei thay ngamna kazanc akhat akhat phuaklouna kaw bammeipu kamei rui e. Kangamv hei heidikamv daic kan the, mi guay tei akhat na sini amaan zat mak ge.

²⁷He Isaraelmeile, “RINGHPOUC rui ai ryanramei ta thaylou mak ge, nkhuaina ata tiryanra bammei ta kadanlou mak ge,” twna tabui swna sa bam tu cho?

²⁸Nangniw thay makna cho? Nangniw chu makna cho? RINGHPOUC hei tingsaengzaeng Ravguangc e, kandih kapwm damcloumeipu e. Kamei ryanra mak ge khatni lak mak ge. Kalungning meic gaanv khat na rui sini thay tangh mak ge.

²⁹Suanna ryanra bammei nunc ta kamei rui titanclou e.

³⁰Chabwan nunc ni nsuan key de; alauc nunc ni lak key de.

³¹Tiki RINGHPOUC khou ngangvlou bammei nunc thu kaniw pumtan tikaluanlou bam puni. Kaniw tei mouckauh kumc samc ku puni, kaniw pak sini lak la ge; kaniw tat bam sini nsuan key zat lak ge.