Read Rongmei Naga ISAIA 41 Bible Online

ISAIA 41 - Rongmei Naga bible

ISAIA 41

¹Ravguangc rui sa e, “Reih reina ai samei hei nking o, he duhmei kandic guayle! Nangniw ruc khou naimei latbamv hei latzan kai khou daw khang chamdaanv la tho; nangniw sa khang kaganv tii puni. Thow tei nchumh cho twmei kaphianh khang aniu guang kaduai di kho.

²“Neihpat thangc rui rihngammeipu ta, phungc guangmeipu hei, kamei tatloumei bamv kathuic khou rih tingamloumeipu hei thow cho? Thow rui kaguangc nunc ta khatni guanghdic guay ta rih tingamlou tu cho? Katuang baengsaeng rui kaniw ta taniang ta kumc kaphangv key the. Katuang sauhpai rui kaniw ta mpwan rui napgung hunc ganh kumc alay ganc the.

³Kamei kabiu kabaeng makna kaniw ta nthauna kanglwan gut the, kamei kaphay sini kandih kahitow makna nthau gut the!

⁴Thow rui mi hei kumna tiswlou tu cho? pat bammei dihlwan hei thow rui tipatlou tu cho? Thaurey khou RINGHPOUC hei nai bam khwan the, nkhamh khou ni RINGHPOUC ai nai bam puni.

⁵“Ai rui taancloumei tei duh thangc mei kandicmei nunc rui how kan the, kaniw pingna kadunh the. Kumna kaniw guang kachunna guang the.

⁶Baanh thaymei nunc kaniw khat khat ta nkhav kary the khatni katiu kary the.

⁷Thing taanhmei nunc rui kachaekc dymei nunc khou sa e, ‘Taanc chuy dyng the!’ Ravmaengc dy palik bammeipu rui mi tei hian kariulou bammeipu ta katiu thau the. Kaniw rui sa e, ‘nap ntip chuy the’— kumna kaniw zuatpi rui raengh guay tei charaph charapna duanclou the kalung dat pw lak khe.

⁸“Tiki, abangc Isaraelmei, nangniw thu ai rui kadahloumei nunc e, apam Abraham kikta nunc e.

⁹Ai rui nangniw ta kandih tin thangc rui phungc guang the, ai rui nangniw ta duc liangmei kwn thangc rui kaw guangna ai rui nangniw khou sa e, ‘nangniw hei abangc nunc e.’ Ai nangniw ta ganc pat makna kadahlou the.

¹⁰Ping riu ai nangniw ta bam nduanghlou bam e! Ai hei nangniw Racguangc e ramh khat na ta sini ping riu! Ai rui nangniw ta titanclou puni khatni nkhavlou puni, ai rui nangniw ta gaeklou puni khatni kanlou puni.

¹¹“Nangniw ta lunghpuamc bammei nunc tei zawsina zakmei ariw puni. Nangniw ta adowmei nunc tei theic puni

¹²Nang ta zauczihmei nunc ta phubam sini kaniw ta how dat pw lak khe, kumna kandih khou rui amaan kan puni.

¹³Ai hei RINGHPOUC nangniw Racguangc e; ai rui nangniw baanzat tei zaylou bam e, ‘Ping riu, ai rui nangniw ta nkhavlou puni.’ ”

¹⁴RINGHPOUC rui sa e, “Isaraelmeile, nangniw nthyamna nsuanna bam sini, ping riu; ai rui nangniw ta nkhavlou puni. Isaraelmei tuang nthanmeipu ai hei nangniw ta kanloumeipu e.

¹⁵Ai rui nangniw ta laudy naplaek tiswlou puni the, kathanc khatni ntukmei naplaek rau duanclou puni the. Nangniw rui chyngbut guay ta kathamv key puni the, kumna swkamut kamailou puni the, chyngbut guay kandih khou mbut mbaih key puni the.

¹⁶Nangniw rui kaniw ta mpwan khou phaic thau puni the; mpwan rui kaniw ta phungc ganc puni the, khatni kaniw ta pwanzingh rui zinphaklou puni the. Hei khou kiu nangniw neihla puni the ai hei nangniw Racguangc swmei zaeng rui; nthanmei Ravguangc ata nangniw thuanc puni the.

¹⁷“Amei nunc rui dui phu pwkhou, tarina kaniw ruak kaengv ni kumc pwkhou, RINGHPOUC ai rui kaniw ravsuai dawlou puni; Isaraelmei Racguangc ai rui kaniw ta ganclou zat lak ge.

¹⁸Ai rui kykaengmei luangcbut guay khou duithuak tiluangclou geic puni khatni nzaengc guay khou duithuak tiluangclou puni. Ai rui sypungramv ta zeih tiguanhlou puni, khatni kykaengmei ramv khou duithuak tiluangclou puni.

¹⁹Ai rui tazikramv khou sidar bang, akasia bang, mirtal bang khatni laengkic bang tithau padiklou puni. Kykaengmei ramv tei ngouh guanh puni, nlu bang, junipar khatni saipres ngouc guanh puni.

²⁰Meic nunc rui hei tei how lana RINGHPOUC ai rui taancloumei tuang the twmei thay puni. Isaraelmei tuang nthanmei Racguangc rui mi guay hei tipatloumei tuang the twmei thay puni.”

²¹RINGHPOUC, Isaraelmei Ravguangc rui heikumna sa e: “Zaatc nunc tuang rav nuncle, nangniw latbamv khou sa tho. Nangniw rui sa nimei kamv sa tho!

²²Khou hei guangna guang pw nimei ta dinc kasuakc tho, mi kiu nchumh pwkhou aniw thay puni. Tat kanmei ganv khou pat kanmei guay lam tei latzankai khou dinclou o. Mi tuang kabac guay tei aniw khou dinclou o.

²³Thei thangc tabui guang puni cho dinclou o kum pw e thei nang hei rav dyng e twmei aniw thay puni. Gaymei bu ny simei bu ny aniw ta tipingna lungh tikabiulou zauc o.

²⁴Nangniw khatni nangniw tuang taanv guay ramhkhat na sini hamh e; nangniw ta kalummei nunc hei meic chanymei tuang e!

²⁵“Neihpat thangc bammei gaanv khat ta ai kadah the; dihpy thangc adow key khang ai rui kata phungc guang the. Kamei rui guangh nunc ta bih ta kumc nii bin key the, lai kasiamhmei rui bih kuat kumc kuat the.

²⁶Mi hei pat puni twna nangniw pang khou thow rui dinc kasuakclou bo, nangniw hei nchumh dyng e twmei thay khang? Nangniw gaanv khat na sini mi lam khou hei latkaeng akhat na sini salou mak ge; nangniw rui sa kanmei meic gaanv khat na sini chu kan mak ge!

²⁷RINGHPOUC, ai rui mi chamv hei Zaion khou dinclou rey liang the; ai rui Jerusalem khou gaychamv phungc guang the.

²⁸Ai rui rav pang khou zauc pwkhou, kaniw gaanv khat na sini ramh lat sa khang maek ge; ai rui thanvmei latthanv guay tei gaanv khat na rui sini daw ngam mak ge.

²⁹Zauc lo, mi rav kaguayna hei nsa de; kaniw ramhkhat na sini taanc ngam mak ge— mi ravmaengc nunc hei pumtan khat na sini maekmei nunc de.”