Read Rongmei Naga ISAIA 42 Bible Online

ISAIA 42 - Rongmei Naga bible

ISAIA 42

¹RINGHPOUC rui sa e, “Ai rui pumtan tiiloumei abangc akhat nai e ai rui kadahloumei, ai rui pianmei bangc e. Ai rui kakhou abumaengc tipadiklou the kumna kamei rui zaatc kathuicna khou nchumhmei phungc guang puni.

²Kamei kaucdu kaucdang lak ge khatni chaengdai chaengdai khou kauc tat lak ge.

³Baukey bammei ntou bang ta kamei riam bau ganc lak ge hamh e thei chuangc tamih mina bammei thaucmai ta sw amit lak ge. Kamei rui meic kathuicna khou tingsaengzaeng khang nchumhmei phungc guang puni.

⁴Kamei ramh ngam lakmei tuang nai lak ge; kathouna ni amaan lak ge; kamei rui kandih khou nchumhmei ntipna kasiamh thaulou puni. Kamei rui nchamloumei ta tei duhmei kandic guay rui tarina nkhwan bam e.”

⁵Ravguangc rui tingpuk hei damclou the kumna mi hei lamc ntyng patlou the; kamei rui kandih ta khatni mi khou bammei katana ta damclou the; kamei rui maansei kathuicna khou ringhmei thiu tiilou the. Kumna ntaw RINGHPOUC Ravguangc rui kabangcpu khou sa e,

⁶“Ai hei RINGHPOUC e, Kandih khou nchumhmei taanclou khang, ai rui nang ta kaw patna pumtan ni tiilou the. Nang paan rui ai rui maansei nunc lev latdyng sw puni the; nang paan rui ai rui zaatc guayna khou gaanhmei tiguang puni the.

⁷Nang rui mik tiatmei nunc mik tiraklou puni the, khatni zinghmei kangkai khou dungc bammei nunc ta mpatlou puni the.

⁸“RINGHPOUC twmei hei azanc the akhou naimei hym hei khatni hymthuanhmei hei ravmaengc nunc khou tii mak ge.

⁹Zauc lo, ai rui dinc kasuakcloumei guay ntaw thu guang tangc the. Ntaw ai rui ramh kathanc akhat lam khou pat makmei hu khou rui dinc kasuakclou puni.”

¹⁰RINGHPOUC khou lu thanh suan o, kandihmei guay kata thuancna suan o! Duipui khou rungh chau tat bammei nunc, kata thuanc o; duipui tuang kalung parik guay kata thuanc o! Duhmei kandic guay khatni khou tei bammei meic kaguayna, suan o!

¹¹Tazikramv khatni mi khou naimei kaidai guay Ravguangc ta thuanc o, Kedarmei nunc kata thuanc o! Sela kaidai khou lungc bammei nunc chyng twan chyng twan khou rui neihlana kauc kan diu o!

¹²Duhmei kandic guay thangc lungc bammei nunc RINGHPOUC ta thuanc o khatni kahym tidaic o!

¹³Rihmei kumc adow khang RINGHPOUC tatpat the, kamei rih adow khang chamdaanv the khatni adow nina bam the. Kamei kauc rah ndyna kauc pat the. Zauczihmei nunc hu khou kangamv lyanna pat the.

¹⁴Ravguangc rui sa e, “Kaganv tingsaengna ai reih reina bam kan the; ai amei nunc khou dawlou mak kan the. Tiki ntaw thu ai taanvtaanc nipui ganv guang the; meicpui rui nahbam ni kumc ai kauc the.

¹⁵Ai rui chyngbut khatni luanghbut guay ramhkhat sini tithaulou makna tikangclou puni, khatni ai rui duithuak nzaengc guay sypungramv tiguanhlou puni, kumna zeih guay sw thip kariaulou puni.

¹⁶“Ai rui mik tiatmei amei nunc ta kaniw tat zat makmei chaeng khou zaylou puni. Kaniw khang zinghmei tei ai rui gaanhmei tiguanhlou puni khatni tarat taruaihmei kandic tei kaniw hu khou sw ndiau duaklou puni. Mi guay hei atuang latdyng the, mi guay hei suai makna tiguang nthuihlou puni.

¹⁷Ravmaengc khou lwmloumei nunc, ravmaengc ta kaniw rav swmei nunc ta zaw tisilou puni.”

¹⁸RINGHPOUC rui sa e, “Nking o, nu ndymei nangniw! Zauc diangcna zauc o, mik tiatmei nangniw!

¹⁹Abangc suangc kamik tiatmei nai he cho, ai rui thoucloumei latdiu tatmeipu suangc kanu ndymei nai he cho?

²⁰He Isaraelmei, nang how geic the, tiki mi guay tei rui nang khang tabui tuang gaengmei naina cho? Chu khang nangniw nu nai e, tiki nangniw tabui chu bu cho?”

²¹RINGHPOUC hei kanlou niimei Ravguangc e, kumhpui zaeng rui katuang latdyn guay tikauhlou the kumna kamei nunc rui hei tei chakhwang swmei ta kahaw e.

²²Tiki ntaw kamei nunc tuang zauczihmei ricmei nunc rui asut animna laa the, kaniw ta kangkai khunc khou mbangh binlou the, kumna kangkai khou bangclou the. Kaniw tuang asut laa the khatni asut animna laa the, kaniw ta meic gaanv khat na sini guangna nkhavlou mak khe.

²³Mi hei nangniw nking nimei nai cho? Ntaw khou rui thauna nangniw nking chuyna nking ni cho?

²⁴Thow rui Isaraelmei nunc ti hei kwam tumei nunc baanc khou tiilou tu cho? Mi hei RINGHPOUC, karuc khou aniu rui paapc taanc bammeipu hei rui e. Kalam thu kamei rui kahawmei khou tei aniu lungh mak khe, kamei rui nchamloumei tei aniu piu mak khe.

²⁵Kumna kalungpuam aniu ruc khou keylou the kumna suc-rih hu khou ryanramei ariw the. Kalungpuam hei mai kumc Isaraelmei kandic kapwm khou chuangc bam the, tiki pat bammei hei tabui cho twmei aniu thay mak ge; mi khou rui aniu ramhkhat sini thayloumei tuang maek ge.