Read Rongmei Naga ISAIA 43 Bible Online

ISAIA 43 - Rongmei Naga bible

ISAIA 43

¹He Isaraelmei, nang ta damcloumeipu RINGHPOUC rui sa e, “Ping riu ai rui nangniw ta kanlou puni. Ai rui nangniw ta zanh ntana kaw the nangniw hei atuang e.

²Nangniw nthukmei dui tat ruan gut pwkhou, ai nangniw ta nduanghlou puni; ryanra ryanriumei rui nangniw ta ngam lak ge. Nangniw mai khou tat ruan gut pwkhou, nangniw ta raw lak ge; tanhmei nangniw ta nchanvmei tuang guangmei tei rui nangniw ta kabiu lak ge.

³Kalam thu ai hei RINGHPOUC nangniw Racguangc e, Isaraelmei tuang nthanmei Racguangc, nangniw ta kanloumeipu e. Nangniw ta thuakmei manv khang Izip ta tii puni Sudan lev Seba ta nangniw ta akhiak khang tiipat puni.

⁴Nangniw panty kanlou khang ai rui zaatc kaguayna ta tiipat puni, kalam thu nangniw hei akhang kunghmei e, kalam thu ai rui nangniw ta nzian e khatni chakhwang swlou e.

⁵Ping riu, ai nangniw ta lamluailou bam e! “Duhmei neihpat thangc rui, khatni duc liangmei neihkey thangc rui, ai rui nangniw mei nunc ta kai khou phungc guang dat puni.

⁶Dihpy rui kaniw ta tiipat khang ai rui sa puni, dihba rui ni kaniw ta mpat pat khang sa puni. Amei nunc tei duhmei kandic guay thangc rui kandih kabamv kathuic khou rui, tiguang dat kan diu.

⁷Kaniw hei amei nunc e, ahym tidaiclou khang ai rui kaniw ta damcloumei tuang e.”

⁸RINGHPOUC rui sa e, amei nunc ta latzan kai khou kaw guang tho. Kaniw mik nai e, tiki tiat the; kaniw nu nai e, tiki ndy the!

⁹Latzan sw khang zaatc nunc ta kaw kaduai tho. Kaniw tuang tabui rav rui guang nimei ta dinc ngam bu cho? Ntaw pat bammei hei kaniw tuang tabui kumhmei rav rui dinclou rey bu cho? Kaniw nchumh de twmei lyan khang, kaniw tuang lat guay nchumh e twmei lyan khang, mi rav nunc kiu kaniw tuang sakhi phungc guang kan diu.

¹⁰He Isaraelmei nunc, nangniw hei atuang sakhi e; nangniw ata thay khang khatni lwm khang khatni ai na hei Ravguangc e twmei nangniw thay khang ai rui nangniw ta abangc khang kadahlou the. Ai hamhna rav baihmei maek ge; rav baihmei nai kan mak ge nai ni nai ni tuang hamh e.

¹¹“Ai na hei RINGHPOUC, akhat namei nangniw ta kanlou ngammeipu e.

¹²Guang nimei ai rui nangniw khou dinc kasuakclou e, kumna ai rui nangniw ta guang nkhavlou e. Zaatc baihmei rav akhat na rui sini mi heikumna sw mak ge; nangniw hei atuang sakhi e, twna RINGHPOUC rui sa e.

¹³Ai hei ntaw ni tingsaengzaeng ni Ravguangc e. Meic gaanv khat na rui sini abaanc khou rui duak ngam lak ge; ataanv ta meic gaanv khat na sini ti-kalaic ngam lak ge.”

¹⁴Isaraelmei tuang nthanmei Racguangc, nangniw ta kanloumeipu RINGHPOUC rui sa e, “Nangniw ta kanlou khang, ai rui Babilonmei ruc khou rihmei thouc guang puni the; ai rui kaniw tuang kaidai raengh guay tei swra key puni the, khatni kaniw mei nunc neihlana kauhmei tei kapmei guanh puni the.

¹⁵Ai hei RINGHPOUC, nangniw tuang nthanmei Racguangc e. Ai rui nangniw ta damclou the, kumna ai hei nangniw guangc e.”

¹⁶Reynungc duipui chung khou chaengdai kasiamhlou khwan e, duidai lungc khou swlou khwan e.

¹⁷Kamei rui tancbauhmei rihmei kangdai ta takuanh pang khatni takuanh gari pang ta swkamut kamailou khwan e. Kaniw tei bow key kan the, thau dat ngam lak the, khuailiu mairam sw amit kumc swmit kan the!

¹⁸Tiki RINGHPOUC rui sa e, “Reynungc tuang guay tei amuc tho; reynungc pat kanmei tuang khou na tei kakhanh bam ri tho.

¹⁹Ai rui taanv thanh taanclou pw nimei tei zauc o. Mi kiu patna bam the ntaw nangniw hei tei how puni the! Ai rui tazikramv laa khou chaeng swlou puni the kumna hei khou tei duithuak azuh tiluangclou puni the.

²⁰Ai rui sypungramv khou duithuak tiluangclou geic pwkhou, ai rui kadahloupui mei nunc khang dui tii pwkhou nwmbangc khouringc nunc rui nganv ata chakhwang sw puni; asacsi nunc khatni ostrich ruay nunc rui ata thuanc puni.

²¹Kaniw tei ai rui akhang kasiamhloumei mei nunc e kumna kaniw rui ata thuancna suan puni!”

²²RINGHPOUC rui sa e, “Isaraelmei, nangniw ata aliauh the; nangniw ata kalum mak khe.

²³Nangniw rui lauziu rawna khaeng dat mak khe; nangniw khaengna ata ngamziw sw dat mak khe. Nangniw ta khaeng o twna ai nangniw khou puatrith tii mak ge, agaw ntei o twna ai nangniw ta tiryanra mak ge.

²⁴Nangniw akhang agaw liu mak ge, nangniw tuang khouringh thav rui ata tipian mak ge. Mi phaan tei nangniw paap rui apuat ti-nrit the; nangniw nkhuaimei taanv taanhmei tei rui ata tilak the.

²⁵Kum bam sini ai hei nangniw paap kaguay kuakloumei Racguangc e, ai laki kuaklou tuang e. Ai rui nangniw paap nangniw khou chaklou bam lak ge.

²⁶“Aniu latzan khou guang ding di kho, nkhamlou nimei guay kiu ni nkham key tho! Nangniw nchumh de twmei kiu ni sa key tho!

²⁷Reynungc nangniw pupouc nunc rui paapc taanc the; nangniw tuang kapy nunc rui aruc khou paapc taanc the,

²⁸nangniw tuang dihsinpouc nunc rui atuang nthanmei bamv swtanac the. Kumna ai rui Isaraelmei khou swkamut kamaimei tiguang the; ai rui amei nunc kahak ta zaw tisilou the.”