Read Rongmei Naga ISAIA 44 Bible Online

ISAIA 44 - Rongmei Naga bible

ISAIA 44

¹RINGHPOUC rui sa e, “He Isaraelmei, abangc, ai rui kadahloumei nunc, Jakob kikta nunc, nking o.

²Ai hei nangniw ta damcloumei RINGHPOUC e; nangniw ta puanclou rap khou rui, ai rui nangniw ta nkhavlou the. Ping riu, nangniw hei abangc e, ai rui kadahloumei, ai rui nzianmei nunc e.

³“Tarimei dic khang ai rui dui tii puni khatni kandih phuimei khou duithuak tiluangclou puni. Ai rui nangniw nac nunc ruc khou abumaengc bunkeylou puni, khatni nangniw kikta guay khou suaihiam bunkey puni.

⁴Dui gaymei dic khou thaumei bwan kumc kaniw kathau gayna thau puni, duithuak daeng khou thaumei thingbang kumc puni.

⁵“Gaanv khat gaanv khat swna meic nunc rui sa puni, ‘Ai hei RINGHPOUC tuang e.’ kaniw tei Isaraelmei pang khou guang kazauh puni. Meic kathuicna kaniw baancpwam khou RINGHPOUC zanc hylou puni khatni kamei rui kata Ravguangc mei e twna sa puni.”

⁶RINGHPOUC, Isaraelmei ta sin bammeipu khatni gaek bammeipu, Ngamparymei RINGHPOUC rui sa e; “Ai hei reymei khatni nkhamhmei, akhat namei Ravguangc e; ai hamhna rav baihmei maek ge.

⁷Ai rui taanhmei hei baihmei rui ni taanh bu cho? Reynungc meic damclou rap khou rui thauna luai nimei nganvna guang pw nimei kaguayna dinc kasuakc ngammei thow nai cho?

⁸Ping riu, amei nuncle! Reynungc tei rui ntaw nganvmei khou pat nimei kaguay tei ai rui dinclou rey the twmei nangniw thay e, nangniw hei atuang sakhi nunc e. Rav baihmei nai bu cho? Ai chu zat makmei ngammei rav baihmei nai bu cho?”

⁹Ravmaengc kasiamh bammei nunc tei gaeng makmei nunc e, khatni kaniw rui heidi kungcna sw bammei ravmaengh nunc hei nsa de. Mi rav nunc ti hei kalum bammei nunc hei mik tiatmei mpangmei nunc e kaniw zawsi puni.

¹⁰Rav swna kalum khang ntanh tuang ravmaengc kasiamhlou bammei hei rui gaengmei tuang khat sini maek ge.

¹¹Mi ta tei kalummei kathuicna ta tei zaw tisilou puni. Ravmaengc kasiamh bammei nunc tei maansei de ramh baihmei hamh e. Kaniw latzan khang guang ding kan di tho kaniw ping puni the khatni zawsi puni the.

¹²Mhanh nunc rui ntanh dangv akhat laana hei tei mai khou ntei the. Kabaancpwam tanhmei tei tandiak kazit lana kalwn dy pat the. Kamei hei tei taancna ndaapc the, tari the, khatni lak the.

¹³Thing taanhmei nunc rui thing tei ndath the. Kamei rui thing khou tei kamaengc hy pat the, kumna katuang baansin rui kalwn gaymei maansei lwn kakai khou lou khang kasiamh pat the.

¹⁴Kamei rui mi khang tei sidar bang dow e, nwmbangc thangc rui mphauh thing hamh e thei kamei rui laurel thing lingclouna ting riu keymei ta nkhwan e.

¹⁵Mipu tei rui thing asaekc tei dikmei thing khang asaekc rui ravmaengc kasiamh khang laa the. Mi thingbang khou tei rui asaekc rui nggaan lumh khang khatni ntyan kasiamh khang mai sw khang laa the; asaekc tei rui ravmaengc kasiamhna kalum the.

¹⁶Thing asaekc tei rui kamei rui mai kasiamh the; khou tei zanh rawna tu nggu the. Kamei rui “Adih gay cho lumcgay the! Mai adih gay cho!” twna sana mai tei nggaan bam the.

¹⁷Asaekc tei kamei rui ravmaengc khang kasiamh lana, mi khou tei nkhum keyna kalum the. Kamei rui mi khou tei huayneyna kumna sa e, “Nang hei atuang rav e ata kanlou o!”

¹⁸Hei kumhmei mei nunc hei mpang langvna kaniw rui sw bammei tei tabui cho twmei sini thay mak ge. Kaniw mik tanguihna khatni kaniw lung mbanghna nchumhmei ta thay mak khe.

¹⁹Ravmaengh kasiamhmei nunc tei “Thing akhat khou rui asaekc mai ntei the. Asaekc rui mai swna ntyan raw the khatni zanh rawna tu the. Baihmei tei rui ravmaengc kasiamh the. Kumna ai nkhum keyna kalum bam e!” twna ning pat khang sini ningting maek khe.

²⁰Kamei taniang tu bam lana di the. Katuang mpangmei lungning rui kata chaengzay mbiangh the kumna kata nkhavlou dat nuh mak khe. Kamei rui kabaanc khou sin bammei ravmaengc tei rav hamh e twmei kamei nuh dat mak khe.

²¹RINGHPOUC rui sa e, “He Isaraelmei, mi hei ningtow o; nangniw hei abangc nunc e twmei ningtow o. Ai rui nangniw ta damclou the kumna nangniw hei abangc nunc e kumna ai nangniw ta amuclou zat lak ge.

²²Ai rui nangniw paap guay muangh haganc kumc haganclou kan the. akhou guang dat ro; ai hei nangniw ta kanloumeipu e.”

²³Tingpukle, nangniw neihlana kauc o! Kauc o, kandih tuang nthukmei bamv guayle! Neihlana kauc o, chyngbut guay, khatni ngouh thingbang guay! RINGHPOUC rui kahym lyanlou the kamei rui Isaraelmei nunc ta kanlouna.

²⁴“Ai hei RINGHPOUC, nangniw ta kanloumeipu e; ai hei nangniw ta damcloumeipu e. Ai hei RINGHPOUC, ramh katana damcloumeipu e. Ai rui tingpuk ta lamc ntyng patloumei tuang e; ai rui kandih damh khou, gaanv khat na rui sini nkhavlouna damh mak ge.

²⁵Ai rui ravtow amuc nunc ta mbamei tiswlou the, tingpuk gaanchuangcna ta chakna dinc kasuakc bammei nunc tei ni tiguang tangclou mak ge. Ningtyngmei nunc lat guay tei ni nsa de twmei ai lyanlou kan the, kaniw tuang ningting tei mpangmei de twmei lyanlou kan the.

²⁶Tiki abangcpu rui dinc kasuakc pwkhou, khatni abangc ta thouc guangna atuang chamvraeng ndauhlou pwkhou, ai rui mi dinc kasuakcloumei guay tei khatni mi raeng guay tei tiguang tangclou puni. Ai rui Jerusalem khou sa e, khou tei meic lungc dat puni, Juda kaidai khou sa e, hei tei kasiamh thau dat puni. Juda kaidai guay tei kasic ngamna ganclou bammei khou rui thau dat puni.

²⁷Atuang latdanv latkaeng rui duipui tithip the.

²⁸Ai rui Sairas khou sa e, ‘nang hei akhang kandih sin nimeipu e; ai rui chwnmei tei nang taanc puni: Jerusalem kasiamh thau dat khang, Ravkai kaiphwn kasiamh thau dat khang nang rui latdanv pat puni.’ ”