Read Rongmei Naga ISAIA 45 Bible Online

ISAIA 45 - Rongmei Naga bible

ISAIA 45

¹RINGHPOUC rui Sairas ta guangh khang kadahlou the! Zaatc nunc ta ngamna laa khang RINGHPOUC rui kakhou tiilou the; guangh nunc tuang ngamv guay kathangv ganh khang kamei rui kata thouclou the. RINGHPOUC rui kaidai guay raenghmun guay kakhang laanclou puni. Sairas khou RINGHPOUC rui sa e,

²“Ai rui nang chaeng swlou puni, luanghbut khatni chyngbut guay sw kazaenghlou puni. Ai rui tanzinc tuang raengh kaikhamv guay sw baklou puni, khatni kaniw tuang tanhlubungc khamvtaan guay sw baulou puni.

³Zinghmei khou ryloumei bamv khou naimei lanv guay tei ai rui nang khang tii puni; kum pwkhou ai hei RINGHPOUC e, ntana nang ta kaw pat the twmei nang thay puni.

⁴Abangc Isaraelmei ta, ai rui kadahloumei amei nunc ta nkhavlou khang ai rui nang ta kadahlou the. Nang ata thay mak sini daihmei zanc ai rui nang khou tiilou kan the.

⁵“Ai hei RINGHPOUC e; baihmei rav maek ge. Nang ata thay mak sini nang khang kage naimei pumtan ai rui tiilou puni.

⁶Ai hei RINGHPOUC e, rav baihmei maek ge twmei kandih kwn padeih khou lungc bammei maansei katana rui thay khang ai mi hei taancloumei tuang e.

⁷Ai rui zinghmei ni gaanhmei ni damclou the; ai rui suaihiam ni swkamut kamaimei ni tiguang the. RINGHPOUC ai rui mi guay hei taanclou the.

⁸Ai rui rihngammei ting riu kumc tii key puni; hei tei laalou khang kandih rui laanc pat puni kumna nyngthav swmei khatni nchumhmei mwnpwang kumc puangc pat puni. RINGHPOUC, ai rui mi guay hei tipat puni.”

⁹Nianglaibungc rui kata kasiamhloumeipu ta agi nuh dina cho? Gambic rui lai kasiamhmeipu ta nang sw bammei hei tabui tuang cho twna thanv nuh dina cho? Laibung rui lai kasiamhmeipu ta nang kasiamh thay mak ge twna sa nuh dina cho? Mi kumhmeipu tei sansi e dav!

¹⁰Thowkumhmei rui kapui kapu khou, “Tabui swna ata heikumna damclou bam tu cho” twna thanv nuh dina cho? Mi kumcna thanvmeipu tei sansi e dav!

¹¹RINGHPOUC, Isaraelmei tuang nthanmei Racguangc, guang nimei guay kasiamhloumeipu rui sa e: “Nangniw rui anac nunc lam khou lat thanv bam khang, khatni ai kumna taanc nina e twna ata ncham bam khang nang thouc maek ge!

¹²Ai hei kandih damhmeipu e, kandih khou lungh khang maansei ta ni damcloumeipu e. Ai rui apumtan rui tingpuk ta laamv ntyng patlou the; ai rui neih, bw, gaanchuangcna guay ta sinna bam e.

¹³Ai rui ningmei ti nthuihlou khang khatni sw nthanlou khang taanvtaanh khang Sairas ta katiu thaulou the. Kamei rui tat nimei chaeng kathuic ai rui sw ntynglou puni, kamei rui atuang kaidai Jerusalem ta kasiamh thaulou dat puni, khatni nymlou bammei amei nunc ta mpatlou dat puni. Mi hei katy kamanv khang hamh e, swan khang ni hamh e.” Ngamparymei RINGHPOUC rui sa the.

¹⁴RINGHPOUC rui Isaraelmei khou sa e, “Izip khatni Sudan tuang lanv nang tuang sw puni, khatni kasaanv kauhmei Sebamei nunc tei nangniw bangc sw puni; kaniw tei pareiriang ntalouna nangniw thei lay puni. Kaniw rui nangniw hu khou nkhum keyna kumna sa puni, ‘Ravguangc nangniw ta nduanghlou bam e— kamei na hei Ravguangc e.

¹⁵Isaraelmei Racguangc, kamei nunc ta kanloumeipu kamei hei how makmei Racguangc e.

¹⁶Ravmaengc kasiamhmei nunc tei zak puni, kaniw kaguayna zawsi puni.

¹⁷Tiki Isaraelmei ta RINGHPOUC rui kanlou the, kamei tingsaengzaeng rih ngamna bam puni, kaniw tei zawsi dat zat lak khe.’ ”

¹⁸RINGHPOUC rui tingpuk damclou the— kamei hei Ravguangc e! Kamei rui kandih ta kalwn kasiamhlouna damclou the— kamei rui mi hei ntipna tingsaengzaeng khang damclou the. Kamei rui mi hei meic lungh makmei nsaramv swna damclou mak ge, maansei lunghmei bamv khang damclou the. Kamei rui kumna sa e, “Ai hei RINGHPOUC e, rav baihmei maek ge.

¹⁹Ai nkamhna sa mak ge, khatni ai taanc nimei tei nkamhlou mak ge. ai rui Isaraelmei ta ata meic lungh makmei nsaramv khou phu khang swlou mak ge. Ai hei RINGHPOUC e, kumna latling sa e, nchumhmei tei ai rui tithaylou the.”

²⁰RINGHPOUC rui sa e, “Guang kaduai o, zaatc nunc tuang maansei nuncle, guanghdic daihmei bow key khou nsaekcloumei nuncle; latzan khang nangniw guang tho! Kaniw tuang thing tuang ravmaengh nunc sin lana lwan tatna kaniw ta kanlou ngam lakmei rav nunc ta kalum bammei nunc tei ramh khat na sini thay makmei nunc e!

²¹Nangniw latzan kai khou guangna daw tho; sagaek nimei nunc ni khat khat khou kaphianh kary tho. thow rui guang nimei ta tingsaenghmei hu thangc rui sa kasuakclou buna cho? Hei tei RINGHPOUC, kamei nunc ta kanloumei Ravguangc ai hamhna cho? Rav baihmei maek ge.

²²“Kandih nam ruc khou bammei maansei guayle, akhou hanc guangna kanloumei laa tho! Ai hei akhat namei Ravguangc e.

²³Atuang latdyng guay hei kaling e, hei tei kalaic dat lak khe. Ai kahak rui ai latdyng sw e: meic kathuicna guangna ahu khou khuksun key puni kumna ata nzianna bam khang ai kahak rui latdyng sw puni.

²⁴“Akhou na rui rih ngammei khatni pumtan laatow e; tiki ata karaengmei guay zawsi ariw puni twna kaniw sa puni.

²⁵RINGHPOUC, ai rui Jakob kikta guay ta kanlou puni, kumna kaniw ata thuanc puni.