Read Rongmei Naga ISAIA 47 Bible Online

ISAIA 47 - Rongmei Naga bible

ISAIA 47

¹RINGHPOUC rui sa e, “He Babilonmei liuchangle, nang guangc bamvpaeng khou rui key tho, kumna kandih mbut ding khou key dungc tho. Nang hei kaganv akhat khou liuchang kumc, zauczihmei rui laa makmei kaidai bam khwan e, tiki ntaw thu nang lwn nang cha gay taan the. Ntaw thu nang bangh di the!

²Napriak paan tei riak tho! Zousunc tak tho! Nang zaw gumphey laa ganc tho! nang tuang phey gaymei luak ganc tho! Duikaan khang nang tuang pheysuai kadei kauh tho.

³Nang paliucmei meic nunc how puni the, nang ta malamei lwn swna zakna bammei ta how puni the. Ai rui khwm khangc puni the, meic gaanv khat na rui sini ata khaamvding dat lak khe.”

⁴Isaraelmei tuang nthanmei Ravguangc rui aniu ta ning tiswlou the kazanc hei Ngamparymei RINGHPOUC tw e.

⁵RINGHPOUC rui Babilon khou sa e, “Rimh rimhmei zinghmei bamv khou dungc bam tho; kaniw rui nang ta zaatc nunc tuang liammav twna kaw dat lak khe!

⁶Ai amei nunc ta lunghpuamc khwan e; ai rui kaniw ta amei nunc kumcna swlou dat mak khwan the: Ai rui kaniw ta nang baanc khou tiilou khwan the, kumna nang rui kaniw ta zauc- nzianlou dat mak khwan the; gaanvsuh gaanvthaih nunc ta nganvna nang puatrith tei mphunlou the.

⁷Nang hei liammav sw tanh tan bam pwng e twna nang ning e kumna mi guay hei nang lung khou laalou mak ge, khatni mi guay hei akumhna luailou puni cho twmei nang kakhanh mak ge.

⁸“Mi hei nking o, amanvmei kahawmei nang, giuga mak ge twna kakhanh bammei nang. Nang Ravguangc lev nchamc e twna ning e nang kumhmei baihmei maek ge twna kakhanh e. Nang hei amay sw zat pw lak ge, nang nac nunc amaan zat pw lak ge twna nang kakhanh e.

⁹Tiki kaganv akhat na khou, zaeng neih khat na khou mi kanei hei pat puni the. Nang duaih-raengh azuh swna bam sini nang gaanv nang nac nunc amaan puni the.

¹⁰“Nang simei taanv taancna lunghgeih makna bam e; meic gaanv khat na sini nang ta how pw lak ge twna nang ning e. Nang tuang ningting takh rui nang ta chaeng zay mbiangh the, ‘Ai hei rav e ai kumhmei meic baihmei maek ge’ twna nang rana kakhanh e.

¹¹Swkamut kamaimei nang ruc khou guang puni the, nang tuang duaih-raengh akhat na rui sini hei tei khaam dat ngam pw lak khe. Mang thangc sini how makmei sw kasic karoucmei thay mak daekna nang khou guang puni the!

¹²Nang tuang duaih-raengh guay tei sin bam o, nang chabwan douc rui hei tei sin guang the. Hei tei nang khang gaeng pwng e; mi ta tei zauczihmei nunc ping pwng e.

¹³Nang khang nchamloumei azuh nai bam sini nang hei pumtan maek ge. Nang tuang gaanchuangcna kathaimei nunc rui nang ta guang nkhavlou pw di tho gaanchuangcna ta kathaimei nunc, tingpuk langv langv riatna nangniw khou guang pw nimei tei bw bw khou dinc bammei nunc tei rui nkhavlou pw di tho.

¹⁴“Kaniw tei napgou kumc puni the, kumna kaniw ta mai rui raw puni the! Kaniw tei kaniw rana ta sini kanlou ngam lak ge maibwang tei suc langvna akhaengv ngam ni tuang hamh the, nggaan diwmei mai na ni tuang hamh the.

¹⁵Nangniw panty khou thanvna bammei gaanchuangcna kathaimei nunc rui taanclou ngammei kiu mi hei the. Kaniw meic guayna nangniw ta ganclouna kachaeng kachaeng tat kan ni tuang de, nangniw ta nkhavlou khang meic nai ni tuang hamh the.”