Read Rongmei Naga ISAIA 48 Bible Online

ISAIA 48 - Rongmei Naga bible

ISAIA 48

¹Mi hei nking o, he Isaraelmei nunc, Juda khou rui lungc guangmei kik nunc: Isaraelmei Racguangc ta kalummei e twna sa e hei tei nangniw mwang khou na de.

²Tiki nangniw hei nthanmei kaidai nac nunc e khatni Isaraelmei tuang Racguangc kazanc Ngamparymei RINGHPOUC twna kawmeipu khou ngangvloumei nunc e twna sana gaengh sw e.

³RINGHPOUC rui Isaraelmei khou sa e, “pat pw nimei tei rey khou rui ai rui sa kasuakclou the; hei tei thay mak daekna tipat the.

⁴Nangniw nu tanc e twmei ai thay e, nangniw hei ntanh kumc tanc e, tanzinc kumc meicbiang guang mak ge.

⁵Nangniw khou thei thangc guang nimei tei tingsaengcna sa kasuakclou the, mi guay tei nangniw tuang ravmaengc nunc rui tipatmei tuang e twna ning mak khang pat nimei guay tei pat mak khou rui sa kasuakclou the.

⁶“Ai rui dinc kasuakcloumei guay tei ntaw thu pat the; ai rui dinc kasuakcloumei guay hei nchumh e twmei nangniw laa nina e. Ramh kathanc guang pw nimei ta ai rui ntaw nangniw khou dinclou puni, ai rui kahu nungc dinclou zat kan makmei e.

⁷Ai rui hei tei ntaw na rui tipat bammei tuang e; hei kumhmei hei kahu nungc pat zat kan mak ge. Ai rui tipat tang bam khwan e thei mi guay tei thay tang the twna nangniw sa ni tuang e.

⁸Nangniw ta lwmnuh mak ge twmei ai thay e, nangniw ta meicliammei e twmei ai thay e. Hei zaeng rui mi lam khou hei nangniw chu zat makmei tuang e, mi lat hei nangniw nu khou guang zat makmei tuang e.

⁹“Meic nunc rui azanc thuanc bam khang, ai rui alungpuam sinriap bammei tuang e; ai rui alungpuam khaam key the kumna nangniw ta swmut lak khe.

¹⁰Daandi ta mai khou sw nthanmei kumcna, ai rui nangniw ta ryanramei mai khou nchanv the. Tiki nangniw hei nsa di the twmei ai thay the.

¹¹Ai rui taanhmei hei azanc khang rui taanhmei tuang e ai rui azanc ta tikasic lak ge, meic gaanv khat na ta sini ahym tila nchamc lak ge, hei tei atuang na sw bam nina e.”

¹²RINGHPOUC rui kumna sa e, “Alat nking o, he Isaraelmei, ai rui kawloupui mei nunc! Ai hei Ravguangc e, reymei khatni nkhamhmei, akhat namei Racguangc e!

¹³Abaanc rui kandih bamv hei kasiamhlou the khatni tingpuk laamv ntyng patlou the. Ai rui tingpuk khatni kandih ta kaw pwkhou, dyng mak khou kaniw tei guang the.

¹⁴“Nangniw meic guayna, guang kaduaina nking o! Ai rui kadahloumeipu rui Babilon ta adow puni twmei, ai rui kata titaanc nimei tei kamei taanc puni twmei rav akhat na rui sini sa kasuakc ngam mak ge.

¹⁵Ai kahak rui lat swna sana kata kawmeipu; ai rui kata nduangh patna tingamlou the.

¹⁶“Ntaw adaeng guang tuancna ai rui samei nking o. Thaurey khou rui ai rui ndauhna sa the, kumna alat tei tiguang tangc tanh tan the.” (ntaw Kauh Liangmeipu RINGHPOUC rui akhou kapumtan tiilouna ata thouclou the.)

¹⁷Isaraelmei tuang nthanmei Ravguangc, nangniw ta kanloumeipu RINGHPOUC rui sa e: “Ai hei RINGHPOUC nangniw Racguangc e, nangniw khang gay khang dincloumeipu e khatni nangniw tat nimei chaeng dincloumeipu e.

¹⁸“Nangniw rui alatdanv guay hei piu rap be thei, luangc taek zat makmei duiriang kumc, nangniw khang suaihiam luangc guang puni! Duipui tin khou kamuatc bammei duimuat kumc nangniw khou rihngammei luangc guang puni.

¹⁹Nangniw kikta syniang thw zu geic puni, kaniw ta swmaan zat lak ge.”

²⁰Babilon khou rui tatpat tho, ningswna tatpat tho! “RINGHPOUC rui kabangc Isaraelmei ta kanlou the!” Mi chamv hei neihlana kauc o, mi hei kabamv kathuicna khou tithay o.

²¹RINGHPOUC rui kamei nunc ta suhmei, kanghmei sypungramv khou zay ruan pat pwkhou, kaniw tari akhaengv kan mak ge. Kamei rui kaniw khang taudaic khou rui dui tipat the, kamei rui taudaic tibaklouna, dui tiluangc pat the.

²²“Paapcmei nunc khang nchu-nzaenghmei maek ge,” twna RINGHPOUC rui sa e.