Read Rongmei Naga ISAIA 49 Bible Online

ISAIA 49 - Rongmei Naga bible

ISAIA 49

¹Alat nking o, he duh thangc mei zaat nunc, duh thangc lungc bammei nuncle! Ata puanclou mak khou ruina, RINGHPOUC rui ata kabangc khang kadahlouna laalou the.

²Kamei rui alat guay hei baengsaeng kumc ti-ntukclou the. Kabaanc kahak rui ata gaeklou the. Kamei rui ata nchumhmei pailu tiswlou the.

³Kamei rui akhou sa e, “Isaraelmei nang hei abangc e; nang paan rui meic nunc ata thuanc puni.”

⁴Ai rui sa the, “Ai tanc the, tiki ramh ngam mak ge! Apumtan guay sinsw ngam the, ramhkhat na sini taanc pat mak ge.” Kum bam sini ata sa gaeklou pw khang ai RINGHPOUC khou lwm e; ai rui taancloumei swan kamei tii puni de twmei ai lwm e.

⁵Ata puanclou mak khou rui, RINGHPOUC rui ata kataanvtaanh khang laalou the; kamei nunc ta phungc guang dat khang kamei rui ata kabangc tiswlou the, zinphak kanmei Isaraelmei ta phungc guang dat khang. RINGHPOUC rui ata chakhwang swlou the; kamei rui akhang pumtan tiilou the.

⁶RINGHPOUC rui akhou sa e, “Nang khang taanv daihmei akhat nai e, abangcpule. Nang rui nsaekcloumei Isaraelmei ta tidaicloumei na hamhna ai rui nang ta zaatc nunc khang gaanhmei tiswlou puni kandih kapwm ta kanlou khang e.”

⁷Isaraelmei Racguangc khatni Isaraelmei ta kanloumeipu rui zaatc nunc rui malamei khatni karaengmeipu, khatni kandih kaipouc nunc tuang bangcpu khou kumna sa e: “Nang ta ricpatloumei ta how lana guangh nunc chakhwang swna ding thau puni, guangh nac nunc rui ni nkhum keyna kalum puni.” Mi hei guang tangc puni the kalam thu RINGHPOUC kabangc ta kadahlou the; Isaraelmei tuang nthanmei Racguangc thu kalat suai zat mak ge.

⁸RINGHPOUC rui kamei nunc khou sa e, “Nangniw ta kanlou nimei ganv guang pwkhou, ai rui nangniw ta zauc nzianlou puni khatni nkhavlou khang nangniw kapna huaymei chulou puni. Ai rui nangniw ta gaeklou puni kumna nangniw khou rui meic guayna lev ai latdyng sw puni. Ai rui nangniw ta nangniw kandic ntaw lungctaekna ganclou bammei kandic khou hei tilungclou dat puni.

⁹Ai rui kang bammei nunc khou kumna sa puni, ‘Nyng swna tat tho!’ khatni zinghmei khou bammei nunc khou sa puni, ‘Gaanhmei khou pat tho!’ kaniw tei luanghbut guay khou kataek mpac bammei lauziu nunc kumc puni the;

¹⁰kaniw ndaapc dat zat lak khe, tari ni tari dat zat lak khe. Neih rui khatni sypungramv neic thiu rui kaniw ta sw kasic lak khe, kalam thu kaniw ta nzianmeipu rui kaniw ta chaengzaylou puni. Kamei rui kaniw ta duipuakkai ding khou zaylou puni.

¹¹“Chyngbut guay kaanna ai rui kaniw khang chaengdai kasiamhlou puni, kumna amei nunc tat khang chaeng kasiamhlou puni.

¹²Amei nunc duh thangc rui guang puni, dihpy thangc rui, neihkey thangc rui khatni dihba thangc Aswan khou rui guang puni.”

¹³He tingpukle, suan o! Kandihle, neihlana kauc o! Luanghbut guayna suan thau diu! Kalam thu RINGHPOUC rui kamei nunc ta swmlou puni; ryanra bammei kamei nunc ta kamei rui zauc nzianlou puni.

¹⁴Tiki Jerusalemmei nunc rui kumna sa the, “RINGHPOUC rui aniu ta ganclou the! Kamei rui aniu ta amuclou the.”

¹⁵Khoutei RINGHPOUC rui daw the, “Meicpui akhat rui kamei rui puanc nouc bammei ngasatna ta amuc ngam dina cho khatni kamei rui puancloumei nac kahak ta nzian taan ngam dina cho? Meicpui akhat rui kanac ta amuc ngam khwan sini, ai rui thu nangniw ta amuclou zat lak ge.

¹⁶He Jerusalem, ai nang ta amuc ngam zat lak ge! Ai rui nang zanc abaancpav khou hiaklou the.

¹⁷“Nangniw ta kasiamh thau dat nimei nunc guang zay puni the, nangniw ta swkamut kamaimei nunc tat kan puni the.

¹⁸Zauc kari-kariangna tabui pat bam cho zauc o! Nangniw mei nunc guang kaduai bam the kaniw kai guang dat pw the! Ai ringhmei Racguangc swmei hei suai makmei kumna nowpeic rui tuh-tah khang kazaw kauhmei kumc nangniw hei nangniw mei nunc khang zaw kauh puni the.

¹⁹“Nangniw kandic tei sw kasic karoucna meic lungctaekna ganclou the tiki guang lungc datmei nunc khang hei tei lungc chanv ni tuang hamh the. Nangniw ta sw kasic karoucloumei nunc ta tei nangniw khou rui ducna laa ganc puni the.

²⁰Nangniw meic bangc sw tatmei dic thangc rui puancloumei nunc rui ‘Mi kandic hei nthyam langv khe aniu lungh khang kabamv daicna kage nai the!’ twna sa puni.

²¹Khou kiu nangniw rana kumna sa puni, ‘Mi nac nunc hei thow rui akhang puanclou tina cho? Anac guay amaan ngam the, nah ni puanc dat ngam mak khe. Ati hei bangh nym tat the kumna nthau ganc the thow rui mi nac nunc ti hei makuat thaulou tina cho? Arana ta ganclou duc di the— mi nac nunc hei tabui thangc rui guangna cho?’ ”

²²Kauh Liangmei RINGHPOUC rui kamei nunc khou sa e, “Ai rui zaatc nunc khou baanh zaapna kaw puni, kumna kaniw rui nangniw nac mpouh nunc khatni aluh nunc ta kai khou nduangh guanglou dat puni.

²³Nangniw khang guangh nunc tei nangniw pu nunc kumc; liammav nunc tei pui nunc kumc puni the. Kaniw rui nangniw hu khou nkhum keyna ngamvziw sw puni the; kaniw rui niamhna nangniw ta chakhwang sw puni the. Khou kiu ai hei RINGHPOUC e twmei nangniw thay puni the; ai rui nkhavlou khang nkhwanna bammei meic gaanv khat na sini lungh hamhmei nai dat pw lak khe.”

²⁴Tancbauhmei nunc rui asut guangmei puat guay tei nangniw asut pat ngam cho? Meicsimei nunc rui bangclou bammei kangmei nunc ta tei nangniw kanlou ngam cho?

²⁵RINGHPOUC rui daw e, “Taanclou pw nimei kiu mi kahak hei the. Bangclou bammei rihmei nunc ta tei laa pat kan puni, khatni meicsimei nunc tuang nsuc guangmei puat guay tei asut pat kan puni. Nangniw ta adowmei nunc ta ai rui adow puni, kumna ai rui nangniw nac nunc ta kanlou puni.

²⁶Nangniw ta rairiu bammei nunc ta tei ai rui kaniw rana ta kaniw zanc titu puni; kaniw ta tei kaniw rana zei tizangv mba puni. Khoutei ai hei RINGHPOUC e twmei maansei zaatc guayna rui thay puni, nangniw ta kanlouna mpatloumeipu e twmei thay puni. Ai hei ngammei Isaraelmei Racguangc e twmei kaniw thay puni.”