Read Rongmei Naga ISAIA 5 Bible Online

ISAIA 5 - Rongmei Naga bible

ISAIA 5

¹Ai rui ai nzianmeipu khang katuang drakhalau tuang lu suanlou nii e: Kandih gaymei chyngbut khou ai nzianmeipu tuang drakhalau akhat nai e.

²Kamei rui kandih tei phuak lana ntauh guay ganc ngam the; kamei rui amingna kadahloumei drakha bang khou tei lingclou the. Lau nkhwan khang paengkai swlou the, drakhadui sunhmei bamv ni kasiamhlou the. Drakhathai tei minc patmei ta nkhwanna bam khwan e, tiki kathai guay tei khiangc ngam the.

³Kumna ai nzianmeipu rui sa e, “Jerusalem khatni Juda khou lungc bammei nuncle, ai lev atuang drakhalau kak khou hei latzan swlou zauc o.

⁴Ai rui alau khang tei taanc ntanghlou makmei tuang nai bu cho? Kathai gaymei nthai pw khang lwm bam tiki tabui swna khianghmei rana nthai bam tu cho?

⁵“Ntaw thu ai rui atuang drakhalau khou tei kumna swlou puni the: ai rui karaeng guay ra ganc puni the, ntauh raeng guay ni ra ganc puni the; nwmbangc khouringc nunc rui kathai tu puni the khatni niipuat key puni the.

⁶Ai rui rap ni rap dat lak khe ruaic ni ruaiclou dat lak khe; sauhraengh bang rui thau padik bam dat kan di tho. Muangh ta ni ting tiriu keylou dat lak khe.”

⁷Isaraelmei hei Ngamparymei RINGHPOUC tuang drakhalau e; Judamei nunc hei kamei rui lingcloumei drakhabang tei e. Kamei rui kaniw ta gaymei taanc pw khang lwmgay e, tiki kaniw tei meicbiw meicdow the. Kamei rui kaniw ta nchumhmei taanv taanc pw khang lwmgay e, tiki kaniw rui sintu bammei nunc rui kapmei khwan chu e.

⁸Kai nai geihmei khou rui kai laa haapna, ramvdui nai geihmei khou rui laa haap katinna bammei, meicrammei khang thu lunghmei bamv khang sini maekna bam khou karana lungc bammei nunc tei sansi e dav!

⁹Ngamparymei RINGHPOUC rui kumna samei ai chu the, “Mi kai gaymei daihmei kai guay hei karaeng ganc rymlou puni the.

¹⁰50 laupuk tuang drakhalau khou rui kadui tinbungc akhat kapaek na laa puni the. Napphwn giuhpaek ruh lingc keyloumei khou giuhpaek akhat na tay guang puni the.”

¹¹Zouh zangv khang lauthwan thwanzingh thau lana zingbangc nyanna zouh zangv mbana bammei nangniw sansi e dav!

¹²Nangniw tuang khumngai khou nangniw nrah downa, syamtuaic khuangc hiwna, alim amuanna, zouh zangvna bam e, tiki RINGHPOUC tuang taanv ta nangniw thay mak ge.

¹³Kumhpui zaeng rui nangniw ta kangmei swna nymzay tat puni the. Nangniw tuang kapy swmei nunc ndaapcna theic puni the, khatni meicpui meicnac nunc rui tarina theic puni the.

¹⁴Taruaih tei kaniw ta tu niina ndaapc puni the kumna kamwang khaanc tangc lakmei di hahpat puni the. Jerusalem khou meicsaengc meicdaihmei nunc khatni kachin karo bammei meicpui meicnac guay ta tei nluakc key puni the.

¹⁵Meic guayna zak puni the, khatni daic tuh tu bammei nunc tei nthyam key puni the.

¹⁶Khatni Ngamparymei RINGHPOUC rui nchumhmei taancna kahym lyanlou puni khatni nthanmei Ravguangc rui nchumhmei latzan swna karam nthan ndauhlou puni.

¹⁷Lungctaekloumei kaidai guay khou tei lauziunac nunc kataek binc tu puni the khatni ziuhnay nunc rui kataek mpacmei bamv sw puni the.

¹⁸Kaniw paapc khou rui duakpat ngam makmei nunc tei khatni simei taanc nthaekc makna taanc bammei nunc tei sansi e dav!

¹⁹“RINGHPOUC rui taanc ni twna samei kiu katumcna taanc kan di tho, aniu mi kiu zauc di kho. Nthanmei Isaraelmei Ravguangc rui kamei rui taanc nimei kiu taanc kan di tho; kamei kalung khou ning bammei kiu aniu zauc zauc di kho,” twna sa bammei nunc tei sansi e dav!

²⁰Simei ta gaymei, gaymei ta simei, twna kawmei; zinghmei ta gaanhmei, gaanhmei ta zinghmei tiguanhloumei, nkhucmei ta ndeihmei, ndeihmei ta nkhucmei tiswloumei nangniw sansi e dav!

²¹Nangniw rana nangniw ta ningtyng e, ntak ge twna kakhanh bammei nangniw sansi e dav!

²²Zouh zangvmei khou kangamv patna bammei nunc, khay loumei zouc khou tancbauhmei swna bammei nunc,

²³lanvbiwmei laana nkhuaimei ta kuakloumei khatni khuay maekmei nunc khou nchumhmei latzan taanclou makmei nangniw sansi e dav!

²⁴Nangniw rui Ngamparymei RINGHPOUC tuang latdyn laalou makpui zaeng rui khatni Isaraelmei tuang nthanmeipu tuang lat ta thouh swlou makmei zaeng rui, maibwang rui napgou ta kahap mutmei kumc, maibwang khou ngeic kanghmei tuai kanmei kumc, nangniw maan guay taamc mut puni the, nangniw pwang guay kangc keyna mpwan rui aliu ganc puni the.

²⁵RINGHPOUC kamei nunc ta kalungpuamc the kumna kaniw ta riap khang kabaanc ntyng pat the. Chyngbut guay kadunh puni the, theihmei pumc nunc tei chaengdai chaengdai khou kaliang gancloumei puat kumc ganclou puni the. Kum bam sini RINGHPOUC tuang lungpuam luai ni tuang hamh e; kaniw ta riap khang kabaanc ntyng patna bam puni.

²⁶Duh thangc bammei zaat ta kaw guang khang RINGHPOUC rui chuang daanc the. Kaniw tei kandih tin thangc rui guang khang kaw the. Kaniw nthanna katumcna guang the!

²⁷Kaniw gaanv khat na sini lak mak ge; kaniw gaanv khat na sini phay kalanv kalow mak ge. Kaniw tanguih mak ge khatni zip mak ge, bungkam na sini aliu mak ge, phaythuapcriang akhat na sini tap mak ge.

²⁸Kaniw tuang pailu guay ntuk ge, khatni kaniw saucpai guay mbwnglou the. Kaniw tuang takuanh ngianc guay tei maidowtauc kumc siakh siak ge, khatni kaniw tuang takuanh gari hyang guay tei pwansa karai kumc e.

²⁹Kaniw tuang ricmei nunc ra tei khouringh nym lana asut dat tangc lakmei bamv thangc puanc tat kanmei kamangliangpui ra kumc e.

³⁰Mi tingmik kiu guang pwkhou kaniw rui duipui kamuatcmei ra kumc Isaraelmei nunc ruc khou rah puni. Mi kandic ti hei zauc tho! Zinghmei khatni ryanra ryanriumei rana! Gaanhmei ta zinghmei rui aluakc kan the.