Read Rongmei Naga ISAIA 50 Bible Online

ISAIA 50 - Rongmei Naga bible

ISAIA 50

¹RINGHPOUC rui sa e, “Gaanv khat rui now muloumei kumc ai rui nangniw ta thouc ganh tu e twna nangniw ningna cho? Kum e thei nangniw ta muloupui latrik kiu tabui tei cho? Meic gaanv khat rui kanac nunc ta zuanhmei kumc ai rui nangniw ta ginramdic thangc zuanclou tu e twna nangniw ningna cho? Kiuc hamh e, nangniw hei nangniw tuang paap zaeng rui bangh sw tatmei tuang de; nangniw tuang taanc twan taanc lyamloumei zaeng rui nangniw ta thouc ganhmei tuang de.

²“Ai rui amei nunc ta kanlou me twna kaniw daeng khou guang tiki tabui swna amei nunc meic gaanv khat na sini bam mak tu cho? Ai rui kaw khou tabui swna daw mak tu cho? Ai rui kaniw ta kanlou ngam pw lak ge twna cho? Ai rui luh ti khou duipui thip kangc the, duithuak guay tei sypungramv mbaih kan the; dui maekna khav guay tei theic taamc ngam kan the.

³Ai rui tingpuk ta theihmei ta latlumei kumna tizingclou kan the.”

⁴Lakmei nunc ta titanclou khang ai rui sa nimei lat Ngamparymei RINGHPOUC rui akhou nchamlou the. Kamei rui ata nchamlou nimei lat tei chu nii khang lauthwan kathuic tiilou the.

⁵RINGHPOUC rui akhang kabah thaymei tiilou the, kumna ai kata liam mak khe khatni kakhou rui tatpat mak khe.

⁶Ata baimei nunc khang tei ating nzuhlou the kaniw rui ata tizakmei tei ni ai khaam mak khe, kaniw rui abiangc hiw phuay bam puni, azaw khou teih nsuklou puni ai nzuh the.

⁷Tiki kaniw rui ata tizak bammei tei rui ata tikabiu ngam mak ge kalam thu Ngamparymei RINGHPOUC rui ata nkhavlou e. Hei guay tei ai akhaengv ni the twna ding the. Ata zaw tisilou ni tuang hamh e twmei ai thay e,

⁸kalam thu Ravguangc adaeng khou tuancna bam e, ai hei nkhuai makmei e twmei kamei rui salou puni e. Latzankai khou guang ding khou thow rui ata ti-nkhuailou nimei naina cho? Kamei rui nkhamlou khang naimei guay kiu nkham zauc kan diu!

⁹Ngamparymei RINGHPOUC kamei kahak rui akhang dingna bam de— thow rui ata ti-nkhuailou ngam nina cho? Akhuay phu bammei nunc tei amaan puni, nthumc tumei phey kumc kaniw amaan puni.

¹⁰RINGHPOUC ta pingmei nunc khatni RINGHPOUC bangcpu lat piumei nangniw guay, nangniw rui tat bammei chaeng tei zingc changh bam nuh e, tiki RINGHPOUC khou lwmlou o, nangniw Ravguangc khou ngangvlou o.

¹¹Meickai ta sw kasic khang sw bammei nangniw guay ta nangniw rui meickai ta sw kasic khang sw bammei raeng tei rui sw kasic puni. Mi hei RINGHPOUC kamei rui tiguang puni the; sa ngam lakmei ramrianra nangniw ariw puni the.