Read Rongmei Naga ISAIA 51 Bible Online

ISAIA 51 - Rongmei Naga bible

ISAIA 51

¹RINGHPOUC rui sa e, “Ai rui samei hei nking o, kanlou pwmei ta laa niimei nangniw, nkhavlou pw khang akhou guangmei nangniw. Nangniw hian patmei taudaic ta tei kakhanh o, nangniw ta kalat patmei tauc bamv ta tei.

²Nangniw lungc guangmei puipu Abraham khatni Sara ta ningtow o. Ai rui Abraham ta kawmei ganv khou tei kamei ngana maekna bam khwan e, ai rui kata suaihiamlouna ngana mpeyna tiilou the. Ai rui kakikta tigeiclou the.

³“Ai rui Jerusalem ta zauc nzianlou puni, kasic ngammei Jerusalem khou lungc bammei nunc ta ni swmgaylou puni. Katuang ramv hei ramvkaeng bam sini, ai rui mi ti hei pikwan tiguanhlou puni, ai rui kasiamhloumei Eden pikwan kumclou puni. Khoutei neihla zaenggaymei, khatni ata thuanhmei lu rui padik puni.

⁴“Ai rui samei hei nking o, he amei nuncle, ai rui samei hei nking o: Ai rui zaatc nunc khou alatdyn tii kan the; atuang latdyn guay rui kaniw khou gaanhmei tiguang puni.

⁵Ai katumcna guangna kaniw ta kanlou puni; ai rui rihngamlou nimei ganv ana the. Ai kahak rui zaatc nunc ruc khou guangh sw puni. Duhmei kandic guay rui ai guangmei ta nkhwanna bam e; kaniw ta kanpatlou pw khang lwm gayna nkhwan bam e.

⁶Tingpuk thangc zauc ku o, kandih khou zauc o! Tingpuk hei maikhou kumc amaan kan puni; kandih ni pheyraan kumc raam key kan puni; kandih mei maansei guay ni simkui pang kumc theic kan puni. Tiki ai rui kanpatlou nimei thu nganvmei nai dat lak khe; ai rui rihngamlou nimei hei rui nkhamhmei di the.

⁷“Ai rui samei hei nking o, nchumhmei ta thaymei nangniw, ai rui dincloumei lat kalung khou ryloumei nangniw. Meic nunc rui nangniw ta ntanvna tizak khang sw pwkhou ping riu;

⁸Kaniw tei nthumc tumei phey kumc amaan kan ni de! Tiki kanpatlou nimei hei thu tingsaengzaeng khang e; ai rui tingamlou nimei hei tingsaengzaeng nai bam puni.”

⁹Thauna aniw ta nkhavlou o, he RINGHPOUC! Nang pumtan rui aniw ta nkhavlou o; reynungc tei kumc hei tei sinswlou o. Nang rui duipui thaanngangc Rahab ta dan puat paruatlou kanmei tuang e.

¹⁰Nang rui duipui ta tithiplouna duipui laa khou chaeng swlouna, nang rui kanpatloumei nunc tei tat kaan kanmei tuang e.

¹¹Nang rui kanpatloumei nunc tei neihla zaenggayna, lu suanna, khatni kaucna Jerusalem guang tangc puni. Kaniw tei tingsaengzaeng neihla bam puni the, ryanra zaengsimei khou rui tingsaengzaeng duak puni the.

¹²RINGHPOUC rui sa e, “Nangniw pumtan titancloumei hei ai rui e. Tabui swna maansei ta ping bam nina cho? Maansei panty thu pucbwanna kumhmei tuang de.

¹³Nangniw ta damcloumeipu RINGHPOUC ta tingpuk katinghloumeipu khatni kandih bamv duancloumeipu ta nangniw amuc thena cho? Nangniw ta rairiu bammei nunc lungpuam ta tei, nangniw ta swkamut kamai khang na swna bammei nunc ta tei tabui swna nangniw ping tanh tan bam nina cho? Kaniw tuang lungpuam tei nangniw ta kahitow dat ngam lak khe.

¹⁴Kangmei nunc ta tei katumcna riclou puni the; kaniw panty lungsingna lungc puni the khatni tuzangv khang gaat dat lak khe.

¹⁵“Ai hei RINGHPOUC nangniw Racguangc e; ai rui duipui ta kaguatc thauna kachin karona tikamuatclou the. Azanc hei Ngamparymei RINGHPOUC e!

¹⁶Ai rui tingpuk ta laamv ntyng patlou the khatni kandih bamv duanclou the, ai rui Jerusalem khou kumna sa e, “Nangniw hei amei nunc e! Ai rui nangniw khou alatdyn tiilou kan the, khatni abaanc rui nangniw ta gaeklou the. ”

¹⁷Zipthau tho, zipthau tho! Dingthau tho, he Jerusalem! RINGHPOUC lungpuam tuang riapmei zoucbuangc tei nangniw zangv kan the. Hei tei nangniw karang zangv tangcna zangv kan the kumna nangniw mba kan the.

¹⁸Nangniw ta chaengzaylou nimei maek khe, nangniw baanc zayna zaylou nimei nangniw pang khou meic maek khe.

¹⁹Ryanramei kadam kanei nangniw ruc khou keylou kan the: nangniw kandic tei suc-rih rui swpuat paruatlou kan the, khatni nangniw ndaapc akhaengv kan the. Nangniw ta zauc nzianlou nimei maansei maek khe.

²⁰Chaengkwn kathuic khou nang mei nunc ngam makna bow keylou bam the; kaniw tei phah khou manhmei asanh kumc the; Ravguangc lungpuamh tuang pumtan tei kaniw laatow kan the.

²¹Ryanramei Jerusalemmei nuncle, zouh mbamei nunc kumcna bammei nuncle,

²²RINGHPOUC nangniw Racguangc rui nangniw ta gaek bam e kumna kamei rui sa e, “Ai rui alungpuamcna nangniw khang tiimei buangc tei ai rui laa ganc the. nangniw ta ti-mba bammei zouc tei nangniw zangv dat ni tuang hamh the.

²³Hei tei nangniw ta rairiumei nunc khang tei tii dat puni the, nangniw ta chaengkui khou nziloumei nunc khang tei, nangniw ta taniang ta kumc nii bin key kanmei nunc khang tei.”