Read Rongmei Naga ISAIA 52 Bible Online

ISAIA 52 - Rongmei Naga bible

ISAIA 52

¹He Jerusalem, tanc tho khatni daicthau dat tho! Ravguangc tuang nthanmei kaidaile, chingkhiuhmei pheybaan piu tho! Rav baihmei ta kalummei nunc nang tuang raengh lungc khou gut dat pw lak khe.

²He Jerusalem, mbut guay tei kathanh ganc tho! Mbut ding khou rui thauna nang guangc bamvpaeng khou dungc tho! Zaionmei kangmei nuncle, nangniw ta bangclou bammei kangriang guay tei ric ganc tho!

³RINGHPOUC rui kamei nunc khou sa e, “Nangniw bangh mbaihpui ganv khou tei nangniw khang syandui akhat na sini tii mak ge; hei tei kumcna nangniw ta riclou dat khang ni ramhkhat na sini tii lak ge.

⁴Nangniw Izip khou gin swna lungh khang keymei tei nangniw rui key niina keymei tuang de; Tiki Asiriamei rui thu nangniw ta namna zay tat the kumna nangniw khang ramhkhat na sini tii mak ge.

⁵Ntaw Babilon khou ni hei kumc muay the nangniw ta bangh swna rihnym tat the, nangniw khang ramhkhat na sini tii mak ge. Nangniw ta sin bammei nunc rui kaniw gaengh sw the khatni ata malana sw the.

⁶Ai hei Ravguangc e kumna mi hei dinc kasuakcloumei hei ai rui e twmei nangniw thay puni.”

⁷Gaymei chamv, nchu-nzaenghmei chamv phungcna chyngbut luanghbut kaanna guangmei chamv phunghmeipu chaengkaamv tei adih gay tu cho; kamei rui rihngammei chamv tei kauc pat the, Zaion khou kumna sa the, “Nangniw Racguangc rui guanghtu the!”

⁸Kaidai rigaanv ding bammei nunc tei kauc thau the neihlana meic geihna kauc thau the! RINGHPOUC Zaion khou guang datmei tei kaniw mik kahak rui how the.

⁹Neihlana kauc pat tho, swkasicna ganclou bammei Jerusalemle! RINGHPOUC rui mi kaidai ti hei kanlou puni kumna kamei nunc ta swmgaylou puni.

¹⁰RINGHPOUC rui katuang nthanmei ngamv sinsw puni; kamei rui katuang mei nunc ta kanlou puni, khatni mi kandic kapwm rui how puni.

¹¹Isaraelmei tuang taanv na phunghmei nangniw guay, Babilon khou rui tatpat tho, meicnumei puat guay tei kahi riu; nangniw nthanna bam o.

¹²Mi lwan hei thu nangniw chadi- chadana tat ni tuang hamh e; nangniw pak duak khang sw ni tuang hamh e. RINGHPOUC nangniw Racguangc rui nangniw ta chaengzay puni khatni kamei rui baanzat baandau, thei-hu gaeklou puni.

¹³RINGHPOUC rui sa e, “Abangcpu tei kataanv tei kathai nthai puni; kahym tidaiclou puni the.

¹⁴Kata how pwkhou meic mpeyna rui rup khwan the; kalwn tei heidihkamv khang sw kasic karouclouna maansei sini luih mak khwan the.

¹⁵Tiki ntaw thu zaatc mpeyna rui kata ngak the, khatni guangh nunc charyn langvna lat sa khang thay mak khe. Kaniw rui thaylou zat makmei tei kaniw how puni the khatni kabah thay puni the.”