Read Rongmei Naga ISAIA 53 Bible Online

ISAIA 53 - Rongmei Naga bible

ISAIA 53

¹Meic nunc rui daw e, “Aniu rui samei lat hei thow rui lwm pw nina cho? Mi khou hei thow rui RINGHPOUC tuang taanv how pw nina cho?

²RINGHPOUC bangcpu tei tasicramv khou kamaan zangc keymei thingbang kumc thaumei hei RINGHPOUC rui chwnmei e. Aniu rui kata thaylou biuc rapmei gunc khatni mangui kakhou maek ge. Aniu ta kakhou zay guang nuhmei kakhou kahaw nuhmei ramhkhat sini maek ge.

³Aniu rui kata mala the kumna ganc pat the; kamei ryanra sucnumei akhaengv the. Kata meic gaanv khat na rui sini zauclou mak ge aniu rui kata thaylou mak ge.

⁴“Tiki aniu rui phungc nimei ryanra tei, aniu rui akhaengv nimei ramsu tei kamei rui phungc lyn the. Kamei rui ryanra bammei tei Ravguangc rui riapmei tuang e twna aniu ning bam khwan e.

⁵Tiki aniu paap guay zaeng rui kata swzamh the, aniu rui taanvsic taancloumei zaeng khang rui kata kathamv the. Kamei rui dandi tei phungcloumei paan rui aniu ta tigaylou the. Kathamvmei zam tei kamei rui phungcloumei paan rui aniu ta sw nthanlou the.

⁶Aniu hei tat amaanmei lauziu nunc kumc khwan the, aniu kaguayna kamei kamei ningmei chaeng tat bam khwan the. Tiki RINGHPOUC rui aniu rui phungc nimei dandi tei karuc khou tikeylou the.

⁷“Kata swkasicna rairiu khwan e, tiki nzaenghna akhaengvlou khwan e; kamei kara karing pat mak ge. Dowluai nimei lauziu kumc, kahiw guat nimei lauziu kumc, kamei kakhwan karing pat mak ge.

⁸Kata rairiuna latzan sw the kumna swluai khang zay pat the, meic gaanv khat na sini kakhang lunghsuhlou mak ge. Aniu meic nunc paap zaeng rui kata swluai the.

⁹Kamei rui nkhuaimei taanc zat mak sini khatni saraamc zat mak sini, kata meicsimei nunc lev tarou khou mbeihlou nchamc the, kata lungcgaymei lev mbeihlou the.”

¹⁰RINGHPOUC rui sa e, “Kamei ryanra akhaengvmei hei ai rui chwnmei e; kamei theicloumei tei paapc kuaklou khang khaengloumei tuang e. Kumna kamei kakik kata how puni the; kamei tingpui maruina lungc puni the, kumna kapaan rui ai ningmei tei guang tangc puni the.

¹¹Ryanra ryanriumei tangv, kamei neihla dat puni; kamei nsa khou ryanra kan tuang hamh e twmei kamei thay puni. Ai rui pianmei, nchumhmei bangc tei meic mpeyna tuang dandi phungc puni, kazaeng khang rui ai rui kaniw paap kuaklou puni.

¹²Kumna ai rui kakhang champouhmei bamv tiilou puni, saengcdaihmei khatni Tancbauhmei nunc baanc khou. Kalam thu kamei rui chwnna kapanty tiipat the, kumna maansei nunc rui phungc nimei dam tei kamei rui phungclou the. Kamei rui paapcmei mpeyna phaan lynna kaniw paap kuaklou khang huayney the.”