Read Rongmei Naga ISAIA 54 Bible Online

ISAIA 54 - Rongmei Naga bible

ISAIA 54

¹He Jerusalem, nang hei nakamcpeic kumc bam khwan the, tiki ntaw thu nang ni neihlana kaucna lu suan tho! Ntaw thu nang hei kagaanv rui ganclou zat makmeipui suangc nang nac geic puni the!

²Nang lungc bammei pheykai tei tidaic pat tho; kariang nsuk saengc pat tho, katiangc guay hian ntip tho!

³Nangniw tuang ramvrei baanzat baandau tidaic pat puni the; ntaw zaatc baihmei rui sin bammei nangniw tuang kandic hei nangniw mei nunc rui laa dat puni the. Ntaw lungctaekna ganclou bammei kaidai guay hei maansei lungc padik dat puni the.

⁴Ping dat ri tho nangniw ta tizaklou dat lak khe; nangniw ta zaw tisilou dat lak khe. Nang alauc douc lwmnuh makmeipui swna swmmay swna zakna bammei ta tei amuc puni the.

⁵Nangniw ta Damcloumeipu hei nangniw gaanv sw puni the kazanc hei Ngamparymei RINGHPOUC e. Nthanmei Isaraelmei Racguangc rui nangniw ta kanlou puni kamei kandih kapwm guangc e.

⁶He Isaraelmei, nang hei kagaanv rui mulou tina ryanrana bammei puiliauh kumc khwan the, tiki RINGHPOUC rui nang ta kakhou kaw guang datna kumna sa e:

⁷“Matat akhat ai nang ta ganclou the; nzian changhna ai nang ta laalou dat puni the.

⁸Matat akhat alungpuamcna karih nthei tat the, tiki ai nang ta tingsaengzaeng nzianlou dat puni the.” Nangniw ta kanloumeipu RINGHPOUC rui kumna sa the.

⁹“Kandih ta dui tithum dat lak khe twna Nouha ganv khou ai rui latdyng sw kan the. Nang ta lunghpuamh dat lak khe twna ntaw ai rui latdyng sw the; ai nang ta luh dat lak khe, riap ni riap dat lak khe.

¹⁰Chyngbut ni luanghbut ni pangv key bam nuh e, tiki ai nangniw ta nzian taan dat lak khe; mi nchu-nzaenghmei latdyng hei ai tingsaengzaeng ngaek ni.” Nangniw ta nzianmei RINGHPOUC rui kumna sa the.

¹¹RINGHPOUC rui sa e, “He Jerusalem, ryanra ryanriumei, ngangvbamv maekmei, swmloumei maekmei kaidai, ai rui nang tuang kaiphwn guay tei kamanv kunghmei ntauc rui kasiamh thau dat puni.

¹²Ai rui nangniw tuang kai kauhmei guay tei tagiatc tauc haenghmei rui, raenghkat guay tei mai kumhmei karanmei ntauc rui, khatni raengh tei kaphut rui swlou puni.

¹³“Ai kahak rui nang mei nunc ta nchamlou puni, kumna kaniw khou lungcgay chingkhiuhmei khatni nchu-nzaenghmei tiilou puni.

¹⁴Nchumhmei khatni nzihmei rui nangniw ta titanclou puni. Nangniw rairiumei khatni ramh pingmei maekna lungc puni.

¹⁵Thowkumhmei rui nangniw ta adow e thei hei tei ai rui nuhlou makna karana taanhmei tuang e, nangniw ta thow pwni adowpui mei tei bow puni.

¹⁶“Mai sw thauna buy-baeng dy bammei nunc tei ni ai rui damcloumei tuang de. Swluai swtiat khang buy-baeng sin bammei rihmei nunc tei ni ai rui damcloumei tuang e.

¹⁷Tiki buy-baeng akhat na rui sini nangniw ta kabiu ngam pw lak ge; nangniw ta khuay nkham bammei kathuicna khou tei nangniw daw khang nai puni. Ai rui abangc nunc ta gaek puni kumna kaniw ta rih tingamlou puni.” RINGHPOUC rui sa the.