Read Rongmei Naga ISAIA 55 Bible Online

ISAIA 55 - Rongmei Naga bible

ISAIA 55

¹RINGHPOUC rui sa e, “Tarimei kathuicna guang o khou hei dui nai e! Syandui maekmei nangniw taektw laa tu tho! Guang tho! Drakhadui khatni guaihnoudui guang laa tho mi hei katy kamanv maek ge!

²Nggu lakmei khang rui tabui khang syandui nting bam nina cho? Tabui swna nang tuang zaengphy ntinglou lana ndaapcna bam nina cho? Ai rui samei hei nkingna taanc o, kum e thei tugay zangvgay liangmei taektw tutow puni.

³“Amei nuncle, ai rui samei hei ntaw nking o, kumna akhou guang o; akhou guang o, nangniw ringc puni! ai rui nangniw khou tingsaengzaeng latdyng swlou puni kumna David khou nrianhloumei suaihiam tei nangniw khou tiilou puni.

⁴Zauclo! Ai rui kata zaatc nunc tuang kapy khatni rihpy tiswlou the, kumna ai rui kakhou rui angamv meic nunc khou lyanlou kan the.

⁵Ntaw thu nangniw rui zaatc baihmei nunc ta kabai puni the; rey khou kaniw nangniw ta thay mak bam khwan e, tiki ntaw thu kaniw nangniw khou kazauh khang pak guang puni the! RINGHPOUC nangniw Racguangc, Isaraelmei tuang nthanmei Racguangc, ai rui mi guay hei taanclou puni the; ai rui nangniw khou hym khatni chingkhiuhmei tiilou puni the.”

⁶RINGHPOUC ta phutow nuhpui ganv khou phu tho Kamei anana bam khou kata kaw tho.

⁷Meicsimei nunc tei kaniw panty kalaic kan diu khatni kaniw lungning ni kalaic kan diu. Kaniw tei RINGHPOUC aniu Racguangc khou hanc guang kan diu; kamei hei zauzian thaymeipu e kuaklou khang katumhmeipu e.

⁸RINGHPOUC rui sa e, “Alungning hei nangniw lungning kumh mak ge, atuang chaeng hei ni nangniw tuang chaeng kumh mak ge.

⁹Tingpuk rui kandih suangc kauhmei kumc, achaeng hei nangniw chaeng suangc kauh e, alungning hei nangniw lungning suangc kauh e.

¹⁰Alat hei phunling tithau khang kandih zwan timcloumei gunh khatni ting kumhmei tuang e. Hei tei rui ramh bwan tithaulouna nap-bi tithuihlou kumh tuang e.

¹¹Ai rui sa patmei latkaeng tei ni hei tei kumc puni mi hei nsa taan ni tuang hamh e; ai rui taanh khang thouc patmei taanv kaguayna tei taanc puni.

¹²“Nangniw neihlana Babilon khou rui tatpat dat puni; nangniw ta nchu-nzaenghna mi kaidai khou tei rui nduangh pat puni. Chyngbut khatni luanghbut guay rui neihlana lu suan puni, ramvpuk thingbang guay ni neihlana baanhhiw puni.

¹³Ntaw sauhraengh thau bammei bamv khou tei saipres bang rui thau lyn puni the; sauh bang phaan mirtal bang pang thau lyn puni the. Mi hei tingsaengzaeng RINGHPOUC ai rui taancloumei taanv ta tiningtowmei swna bam puni the.”