Read Rongmei Naga ISAIA 56 Bible Online

ISAIA 56 - Rongmei Naga bible

ISAIA 56

¹RINGHPOUC rui kamei nunc khou sa e, “Nzihmei khatni nchumhmei tei taanc o, kalam thu ai nangniw ta gulou nipui ganv ana guang the.

²Sabbathneic ngaekpui mei khatni mi ti hei piu laanhna piu makpui mei ta tei ai rui suaihiamlou puni. Simei taanh makmei nunc ta tei ai rui suaihiamlou puni.”

³Zaatc baihmei RINGHPOUC tuang mei pang khou kazauhmei nunc tei rui “RINGHPOUC rui ata kamei nuncle tikalum kariu ni tuang hamh e,” twna sa mak kan diu. Thowkumhmei kapumc siampui mei rui “Ai thu anac nai ni tuang hamh thena ai Ravguangc mei sw nuh ni tuang hamh the,” twna kakhanh lak nina e.

⁴Mi kumhmei nunc khou tei RINGHPOUC rui heikumna sa e, “Nang rui Sabbathneic ngaek lana lwmnuhmei swna khatni ai kahawmei tei taancna atuang latdyng nzuanh makna ngaek ge thei,

⁵nang zanc tei atuang Ravkai khou ningtow bam puni khatni kanac mpouh aluh nai geihmei nunc ta suangc nang ta amei pang khou ningtow saengc bam puni. Nang ta amuc dat zat lak khe.”

⁶RINGHPOUC rui gin nunc katuang mei swmei nunc, kata nzianna kasiamruai swmei nunc, Sabbathneic ngaekmei nunc khatni kalatdyng tei piu chuyna piumei nunc khou tei sa e:

⁷“Ai rui nangniw ta atuang nthanmei chyng khou phungc guang puni, atuang kalummei kai khou nangniw ta tineihlalou puni, khatni nangniw rui atuang ravchapaeng khou khaengmei guay tei ai rui laalou puni. Atuang Ravkai tei zaatc kaguayna tuang kalummei kai twna kaw puni.”

⁸Kauh Liangmei RINGHPOUC, bangc sw tatmei khou rui kamei Isaraelmei nunc ta phungc guanglou datmeipu kamei rui meic baihmei ta ni kaniw pang khou kariu khang kaw guang puni twna latdyng swlou the.

⁹Nwmbangc khouringc nunc kumc guangna Isaraelmei ta thaek tu khang RINGHPOUC rui zaatc baihmei nunc khou sa the.

¹⁰Kamei rui kumna sa e, “Amei nunc ta kasiatc thay khang ncham bam nimei kapy nunc tei kamik tiat ngam the! Kaniw ramhkhat na sini thay mak khe. Kaniw kasangv makmei si kumc the kaniw zipna mang na manvna bam e. Kaniw zip nana zip bam nii e.

¹¹Kaniw hei nggu zat makmei agaamvmei si nunc kumc e. Lauziu gaenghpouc nunc hei khat sini kabah thay mak khe. Kaniw meic kathuicna kamei kamei rui kahawmei taanc the khatni kakhang kakhang kadou chamei na phu the.

¹²Mi zouh mbamei nunc rui ‘Aniu zouh laa di kho, zangv nii saanv zangv di kho! Nthuanh kiu aseic suangc gay ranv puni he!’ twna sa the.”