Read Rongmei Naga ISAIA 57 Bible Online

ISAIA 57 - Rongmei Naga bible

ISAIA 57

¹Meicgaymei nunc ni theic e, kumna meic gaanv khat na sini kabah thay mak ge, kadan ni kadan mak ge. Tiki kaniw theic pwkhou, sw kasic karoucmei rui kaniw ta kabiu dat ngam mak khe.

²Ravchaptatmei nunc tei theic pwkhou nchu-nzaenghna zaeng sw the.

³Nangniw duaih-raengh sinmei nac nunc, lungcmaanv lungcmowmei khatni mangcsangmeiluc nac nuncle, nangniw ta latzan sw khang guang tho.

⁴Nangniw thow ta nuic bam tu cho? Thow ta nangniw sinnuina bam tu cho? Nangniw saraamhmei khatni agay agi tanhmei kikta nac nunc hamhna cho?

⁵Nangniw tuang thingbang bangc khou tei lungcmaanv lungcmowna rav ta kalum e. Nangniw rui duithuak daeng khou khowlang khou nangniw nac nunc ta khaeng the.

⁶Nangniw hei khou tei rui tauthingc khuaic lana mi ta tei rav swna kalum the. Nangniw rui mi khou tei katna thauh bunlou the kumna mi khou tei nap-bi katlou the. Mi guay rui ata tineihla puni de twna nangniw ningna cho?

⁷Nangniw rui chyngbut kauh kauhmei thangc tei ku lana rav khaengna lungcmaanv lungcmow the.

⁸Nangniw tuang kaizaengc kaikhamv thei khou tei ravmaengc daanclou the. Nangniw ata amuc the; nangniw pheybaan paliucna kamanv tiina liuloumei luh nunc tei lev twna laeng guang khou ku the. Khoutei nangniw tuang nthah boulahmei tei tipian the.

⁹Nangniw rui mwndui thauc, laengkic thauc teyna Molek rav ta kalum the. Nangniw kalum khang rav phuna latdiumei duh duh thangc thoucna, taruaih thangc nganvna thouc the.

¹⁰Nangniw rav baihmei ta phuna lak the, tiki nangniw nthaekc zat mak ge. Nangniw tuang ravmaengc rui nangniw khang pumtan tii bam e twna nangniw kakhanh e, kumna nangniw lak key zat mak ge.

¹¹RINGHPOUC rui sa e, “Nangniw ta tipinglou tina nangniw akhou saraamcna ata amucpary rina bammei hei tabui rav rui cho? Ai rui hei saan reih reina bammei zaeng rui nangniw ata ping taan tu cho?

¹²Nangniw rui sw bammei hei nchumh de twna nangniw kakhanh e, tiki ai rui nangniw kheiliak lyan pat puni the, kumna nangniw tuang ravmaengc nunc rui nangniw ta nkhavlou ngam ni tuang hamh the.

¹³Nangniw rui nkhavlou khang kapna huay pwkhou nangniw tuang ravmaengc nunc tei rui nangniw ta kanlou kan diu! Thiu amuan pat guaimei rui kaniw ta amuan ganc kan puni! Tiki akhou lwmloumei guay tei mi kandic khou lungc bam puni kumna kaniw atuang Ravkai khou ata kalumna bam puni.”

¹⁴RINGHPOUC rui sa e, “Amei nunc akhou hanc guang dat kan diu. Kaniw tuang chaeng khou khamvmei tuang naimei kaguayna tei laa ganc o! Chaengdai kasiamhlou o, kumna mi chaeng tei chamdaanvlou tho!

¹⁵“Ai hei kauhmei khatni nthanmei Racguangc e, tingsaengzaeng ringc bammeipu e. Ai hei kauhmei khatni nthanmei bamv khou bam e, tiki kaniw lung tikaluan thaulou dat khang lungh niamhmei khatni lungh laihmei pang khou ni ai bam e.

¹⁶Ai rui amei nunc khang ringhmei tiilou puni, kumna ai rui kaniw khuay chak tanh tan bam dat lak khe khatni kaniw ta tingsaeng lunghpuamc bam dat lak khe.

¹⁷Ai rui kaniw ta kaniw paap zaeng rui khatni kaniw agaamvmei zaeng rui kaniw ta alungpuamcna riap khwan e khatni ganclou khwan e. Tiki kaniw nu tancna kaniw rana chaeng khou tat bam khwan e.

¹⁸“Kaniw akumhna sw kan tu cho twmei ai how the, tiki ai rui kaniw ta tigaylou dat puni. Ai rui kaniw ta zaylou puni khatni nkhavlou puni, khatni latluna bammei nunc ta swmlou puni.

¹⁹Ai rui meic guayna khou duh thangc ni ana khou ni nchu-nzaenghmei tiilou puni. Ai rui amei nunc ta tigaylou puni.

²⁰Tiki meicgay makmei nunc tei nthaekc key makna kamuatcna bammei, mphuam tanacmei rana kamuatc patna bammei duipui kumhmei tuang e.

²¹Paapcmei nunc khang nchu-nzaenghmei maek ge,” twna RINGHPOUC rui sa e.