Read Rongmei Naga ISAIA 58 Bible Online

ISAIA 58 - Rongmei Naga bible

ISAIA 58

¹RINGHPOUC rui sa e, “Nang khwan daeklou makna kauc ranvna kauc o! Amei Isaraelmei nunc khou kaniw tuang paap guay tei dinclou tio!

²Kaniw tingmik pum ata kalumna kaniw achaeng thay nii e khatni alatdanv guay piu nii e twna sa bam e. Kaniw khou ai rui nchumhmei latdyn tiiloumei ta laa nii e khatni kaniw ata kalum nii e twna sa e.”

³Meic nunc rui kumna thanv e, “RINGHPOUC rui thaylou mak sihna tabui swna aniu munthiangc bam nina cho? Kamei rui chulou mak ge thei tabui sw khang aniu taektw thiangcna bam nina cho?” RINGHPOUC rui kaniw khou sa e, “Munthiangcna nangniw rui kahawmei taancna bam e khatni nangniw taanvtaanhmei nunc ta namtuna bam e.

⁴Nangniw munthiangcna agay agina khatni abay adapna bam e. Hei kumhmei ram munthiang ti hei ai chulou puni twna nangniw ningna cho?

⁵Nangniw munthiangc bammei tei nangniw py napnuy kumc nkhum paliakh liak keyna khamseiphey khou khatni mbut khou nliauna bammei tei ryanra khang na de. Nangniw rui munthianghmei tw bammei kiu mi hei the cho? Hei tei rui ata tipian puni de twna nangniw ningna cho?

⁶“Ai rui kahawmei ram munthiang kiu thu: Rairiu bammei kangriang tei laa ganc o khatni nchumh makmei guangkhap tei luak ganc o, kumna rairiu bammei nunc ta tei nangniw rui mpatlou tio.

⁷Ndaapcmei nunc lev tuzangv nzanh o khatni kakai maekmei lungcsi lungcroucmei nunc khang nang kai laanclou tio. Nsuay mbaanv khang maekmei nunc khang nang pheybaan tii tio, khatni nang riang nang luaic ta nkhow-nkhav khang azih rio.

⁸“Kum pwkhou azauzian nangniw ruc khou lauthwan neic kumc gaanclou puni, kumna nangniw tuang zamzei guay katumcna tigaylou dat puni. Ai rui nangniw ta kanlou khang bam nchamc tanh tanlou puni; ai nangniw ta bam nduanghna thei-hu gaeklou puni.

⁹Nangniw rui huayney pwkhou, ai rui dawlou puni. Nangniw rui ata kaw pwkhou, ai rui dawlou puni. “Nangniw meickai ta rairiu taan e thei, meickai ta karaengna baanhzung souc taan e thei, simei latsav sa taan e thei,

¹⁰nangniw rui ndaapcmei nunc ta titu-tizangvlou e thei khatni lungcsi lungcroucmei ta tikimlou e thei nangniw ta gumbin bammei zinghmei hei kalaanv kumc gaanc dat puni.

¹¹Kumna ai rui nangniw ta zaylou tanh tan bam puni khatni tuzangv khang gaat dat lak khe. Ai rui nangniw ta titanclou puni khatni tigaylou puni. Nangniw hei dui gaymei pikwan kumc puni, luangc taek zat makmei duipuakkai kumc puni.

¹²Tingsaengcna meic lungh makna ganclou bammei guay tei kaiphwn raan khou tei rui kasiamh thau dat puni. Nangniw ti hei raengh kasiamh thau datmei nunc, lungctaekna gancloumei kai guay kasiamh thau dat puni. Nangniw ti hei raengh kasiamh thau datmei nunc, lungctaekna gancloumei kai guay kasiamh thau datmei nunc twna thay puni.”

¹³RINGHPOUC rui sa e, “Nangniw rui Sabbathneic ti hei nthanmei swna sw e thei kumna mi nungc tei nang khang gaeng khang karamh mak ge thei; nangniw rui atuang nthanmei tingmik guay tei nthukmei swna laana mi nungc tei ngginphaylaanh makna, taanvtaanh makna, khatni nsa pary racna kaganv swmaan makna mi tingmik ta tei champouhna sw e thei,

¹⁴Asiamruai swmei khou naimei neihla kiu nangniw laatow puni. Kumna nangniw ta ai rui kandih kapwm khou tichampouhlou puni, kumna ai rui nangniw pupouc Jakob khou tiiloumei kandic khou hei nangniw amanvna bam puni. RINGHPOUC ai rui sa the.”