Read Rongmei Naga ISAIA 59 Bible Online

ISAIA 59 - Rongmei Naga bible

ISAIA 59

¹Nangniw ta kanlou khang RINGHPOUC baanc dui mak ge, khatni nangniw rui huayneymei dawlou mak bam khang kanu ndy mak ge.

²Tiki nangniw khuay zaeng rui kamei chulou makmei tuang de. Nangniw paap rui Ravguangc lev nangniw kak khou daengc khamv the kumc tina kamei rui nangniw ta chulou mak khe.

³Nangniw saraamc the, meicngam meicliammei taanv taanc the, khatni meicbiw meicdow the.

⁴Nangniw latzankai khou tat re, tiki nangniw nchumhmei sw mak khe. Nangniw ngam khang rui saraamhmei khou ngangvlou the. Nangniw simei taanh khang kakhanhna taanc the.

⁵Kaniw rui ruigamduy tikak pat re khatni cherapui raanv ti raanv pat re. Thow pwni hei tei tumei guay rui theic puni, hei tei thowkumhmei rui sw baklou e thei kanac kak puni the.

⁶Kaniw tuang cherapui raanv tei phey kumcna baanv nuhpui tuang hamh e hei tei gaeng mak ge, kaniw taanv tei simei rana de, kaniw baanc rui suc-rih tipat re

⁷Nangniw simei taanv ramhkhat thu taanh khang sw tanh tan the, kumna hei tei taanh khang nkhwan liat lakna bam e. Kakhuay maekmei ta swluai swtiat khang nangniw rouh mak ge. Nangniw tatlou tat guangmei bamv kathuic khou sw kasic karoucna ganclou the,

⁸Kumna nangniw bammei bamv khou tei meic gaanv khat na sini giuga makna bam khang mak ge. Nangniw nchumhmei taanv khat sini taanh mak ge. Nangniw nkhuaimei chaeng khou tat the. Mi chaeng khou tei tatmei gaanv khat na sini nchu- nzaenghna tat ngam ni tuang hamh e.

⁹Meic nunc rui sa e, “Aniu ta rairiu bammei nunc baanc khou rui Ravguangc rui aniu ta kanlou mak ge. Aniu tat khang gaanhriw ta machunh khwan e, tiki zingc ngam the,

¹⁰kumna aniu hei mik tiatmei nunc kumc kathamna tat bam the. Aniu zingbangc kumcna, taruaih tuang zinghmei dic khou kumna phay kalanv the.

¹¹Aniw hei ping the khatni lungh ryanra the. Rairiumei khatni nkhuaimei khou rui Ravguangc rui aniu ta kanlou pw khang agwn khwan e, tiki kanlou mak khe.

¹²“He RINGHPOUC, aniw rui nang hu khou nkhuailoumei hei geic the. Aniw tuang paap rui aniw khuay dinc bam e. Mi kaguayna tei aniw thay e.

¹³Aniw nang ta liam the, nang ta ganc the kumna nang thei lay nii mak khe. Aniw rui meickai ta rai the kumna nang khou rui ducna tat the. Aniw tuang lungning guay hei nkhuai the khatni laanh the. Aniw lat guay hei saraamc the.

¹⁴Nchumhmei ta alay ganc kan the, nzihmei hei guang ana ngam mak khe. Chaengdai guay khou nchumhmei phay kalanv the, kumna hei khou tei lungning nthanmei khang kabamv maek khe.

¹⁵Lungning nthanmei heidikamv khang rau the twmei thu thow thow pwni simei taanhmei ta thinghpui mei tei ryanramei khou keylou the.” RINGHPOUC rui mi hei how the, kumna nchumhmei maek khe twna kamei neihla mak khe.

¹⁶Nkangh karai bammei nunc ta nkhavlou nimei maek ge twmei howna kamei hahlahla the. Kumna kaniw ta kanlou khang khatni rihngam khang kamei rui kapumtan sinsw puni the.

¹⁷Kamei nchumhmei rui ngaengvthuapc swna khatni rihngammei rui rih pyrun swna piu puni. Khwm khangh nimei rui pheybaan swna khatni lungpuamhmei rui phey swna piu the.

¹⁸Kamei rui katuang zauczihmei nunc ta kaniw tuang taanv theilayna dandi tii puni, duhmei kandic thangc bammei nunc ta nganvna riap tangc puni.

¹⁹Neihpat khou rui neihkey nganvna meic kathuicna rui kata khatni daihmei kangamv ta ping puni. Kamei duidai luangh kumc guang puni, pwanzingh kumc guang puni.

²⁰RINGHPOUC rui kamei nunc khou sa e, “Jerusalem ta gaeklou khang khatni kapaap khou rui lunghlaih guangmei nangniw ta kanlou khang ai Jerusalem khou guang puni.

²¹Ai rui nangniw khou kumna latdyng swlou the: tingsaengzaeng khang ai rui nangniw khou apumtan khatni alatdyn tiilou the, kumna ntaw khou rui thauna nangniw alat piu nina e RINGHPOUC rui sa e, khatni nangniw nac nunc khatni nangniw tou nunc rui guang nimei ganv guay khou alat piuna bam khang nchamlou nina e.”