Read Rongmei Naga ISAIA 6 Bible Online

ISAIA 6 - Rongmei Naga bible

ISAIA 6

¹Guangh Uzzia theihmei kwm, ai RINGHPOUC ta how the. Kamei tei kauh nganv thangc, kaguangc bamvpaeng khou dungcna bam e, kumna katuang pheytin rui Ravkai kapwm tei padik the.

²Kadaeng khou kerubim nunc ding nkuayna bam e; kaniw tei kaswkaeng charuk charuk nai e. Kaniw kathuic tei kaswkaeng kanei rui kazaw gum liam e, kanei rui kaphay gum liam e khatni baihmei kanei tei rui samc e.

³Kaniw tei khat lev khat khou kumna sa bam e: “Nthanmei, nthanmei, nthanmei! Ngamparymei RINGHPOUC hei nthanmei e! Kahym rui kandih kapwm padik ge!”

⁴Kaniw khwan tei rui Ravkai chaengphut guay tei kachinliuh liu the, kumna Ravkai tei maikhou rui padik the.

⁵Ai rui sa the, “Ai hei sansimei e dav! Ai hei theic puni the! Amik kahak rui Guangh, Ngamparymei RINGHPOUC ta how the. Kalam thu ai hei kamwang mphuammei pang khou lungc bammei e kumna amwang ni mphuam the!”

⁶Khoutei kerubim akhat rui tiangkap rui ravchapaeng khou rui chuanghmei maithyn tiap lana adaeng khou samc key the.

⁷Kamei rui mi chuanghmei maithyn tei rui achy khou kahilouna, “Mi hei rui nang chy ta kahilou the, kumna ntaw thu nang khuay tei laa ganc kan the, khatni nang paap guay kuaklou kan the,” twna akhou sa the.

⁸Khoutei RINGHPOUC rui “Thow ta ai ndiu nina cho? Thow rui aniu latdiu tat nina cho?” twna samei ta ai chu the. “Ai tat ni the! Ata thouclou tho!” twna ai rui daw the.

⁹Kumna tatna mi lat hei sa tho twna kamei rui akhou sa the: “Nangniw azuh nkingna chu bam sini, nangniw kabah thay ni tuang hamh e. Nangniw zaucna azuh how bam sini tabui pat bam tu cho twmei nangniw thay ni tuang hamh e.”

¹⁰Khoutei kamei rui akhou sa the, “Meic nunc hei how mak khang, chu mak khang, khatni kabah thay mak khang kaniw lung khatni kaniw nu ti-ndylou tho, kaniw mik ni titiatlou tho. Kum mak ge thei kaniw akhou hanc guang datna kaniw ta tigay dat kan nuh e.”

¹¹“RINGHPOUC, asaanh heikum bam nina cho?” twna ai rui thanv the. Kamei rui daw the, “Mi kaidai guay hei sw kasic ngamna karaeng ganclou mak saanv, kai guay tei lungc taekna ganclou mak saanv mi kandic kahak hei ganc rym lou mak saanv mi hei kum bam puni.

¹²Ai rui meic nunc ti hei kandih duh thangc thouc ganclou puni kumna mi kandic hei meic lungc taekna ganc rymlou puni.

¹³Mi kandic khou hei meic gaanv ruh khou gaanv khat na sini nsaekclou e thei, mi ta kiuc ni swluai puni; kamei tei gaibau tangmei mphauhbang mui kumc puni the.” (Kamui hei Ravguangc mei nunc bwan suanh dat nimei tuang maengc e.)